ដូចដែលលោកអ្នកបានស្គាល់រួចហើយ ពីសកម្មភាពរបស់បណ្តាញព្រះសង្ឃឯករាជ្យ ដើម្បីយុត្តិធម៌សង្គម។ ពេលនេះ បណ្តាញព្រះសង្ឃនេះ កំពុងរៀបចំបង្កើតវិទ្យុផ្សាយសំឡេងមួយទៀត បន្ថែមពីសកម្មភាពរបស់ខ្លួនរាល់ថ្ងៃនេះ។ ជាវិទ្យុធ្វើការផ្សព្វផ្សាយតាមប្រព័ន្ធអ៊ិនធឺណែត នូវព័ត៌មានប្រចាំថ្ងៃ ហើយរៀបចំឡើងដោយព្រះសង្ឃសុទ្ធសាធ។ ព្រះសង្ឃជាអ្នកបច្ចេកទេស ព្រះសង្ឃជាអ្នកសារព័ត៌មាន។ នៅពេលការផ្សាយនឹងចាប់ផ្តើមនៅប៉ុន្មានថ្ងៃទៀតនេះ មានការរិះគន់ថា ព្រះសង្ឃមិនគួរណានាំគ្នាបង្កើតវិទ្យុ ហើយធ្វើជាអ្នកកាសែតនោះឡើយ ប៉ុន្តែក្រុមព្រះសង្ឃឯករាជ្យអះអាងថា សកម្មភាពរបស់ក្រុមព្រះអង្គនេះ មិនខុសពីវិន័យអ្នកបួសឡើយ។
