អ្នកភូមិឡពាង ហែក្បួនថ្មើរជើង ទៅកាន់តុលាការខេត្តកំពង់ឆ្នាំង
នៅព្រឹកថ្ងៃអង្គារនេះ ក្រុមអ្នកភូមិឡពាង ដោយមានការចូលរួមពីព្រះសង្ឃ និងប្រជាពលរដ្ឋ បឹងកក់ សរុបជាង ១០០ នាក់ បានដើរហែក្បួន ចេញពីភូមិ តាមផ្លូវជាតិលេខ៥ ឆ្ពោះទៅកាន់តុលាការខេត្តកំពង់ឆ្នាំង។ ក្រុមអ្នកភូមិ ដែលមានជម្លោះដីធ្លីជាមួយក្រុមហ៊ុន KDC ចំនួន ៨ នាក់ ត្រូវបានតុលាការបង្គាប់ឲ្យចូលខ្លួន ទៅបំភ្លឺតុលាការ នៅព្រឹកថ្ងៃទី៥សីហានេះ។ សកម្មជនសិទ្ធិមនុស្ស ដែលបានតាមឃ្លាំមើលក្បួនដង្ហែរបស់អ្នកភូមិ បារម្ភថា អ្នកភូមិទាំង ៨ នាក់ នឹងត្រូវចៅក្រម ចាប់ឃុំខ្លួន ខណៈដែលអ្នកភូមិពីរនាក់ហើយ ត្រូវបានចៅក្រម ចាប់ឃុំខ្លួនដោយសារតែជម្លោះដីធ្លីនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ចាប់តាំងពីព្រឹកព្រលឹម ថ្ងៃអង្គារ ទី៥សីហានេះ ក្រុមអ្នកភូមិឡពាង និងអ្នកភូមិបឹងកក់ នៅឃុំតាជេស ស្រុកកំពង់ត្រឡាច រួមទាំងប្រជាពលរដ្ឋបឹងកក់ និងព្រះសង្ឃបណ្តាញឯករាជ្យ ទៅពីភ្នំពេញ សរុបជាង ១០០ នាក់ បានហែក្បួនថ្មើរជើង លើកបដា ស្រែកមេក្រូ ឆ្ពោះទៅកាន់តុលាការខេត្តកំពង់ឆ្នាំង។
ក្នុងចម្ងាយផ្លូវជាង ៣០ គីឡូម៉ែត្រ តាមផ្លូវជាតិលេខ៥ ក្បួនដង្ហែរបស់អ្នកភូមិ ត្រូវបានឃ្លាំមើលដោយសកម្មជនសិទ្ធិមនុស្ស និងអាជ្ញាធរសមត្ថកិច្ច តែមិនមានការរារាំងនោះទេ។
ក្រុមអ្នកភូមិឡពាង និងអ្នកភូមិបឹងកក់ ចំនួន ៨ នាក់ ត្រូវចៅក្រម កោះហៅឲ្យចូលបំភ្លឺ នាព្រឹកថ្ងៃទី៥សីហានេះ ពាក់ព័ន្ធនឹងជម្លោះបង្កហឹង្សា រវាងអ្នកភូមិ និងក្រុមកម្មករក្រុមហ៊ុន KDC របស់លោកស្រី ជា ខេង ភរិយាលោកស៊ុយសែម រដ្ឋមន្ត្រីក្រសួងរ៉ែ និងថាមពល កាលពីថ្ងៃទី១៧កក្កដា។
បន្ទាប់ពីកើតជម្លោះនោះ ក្រុមកម្មករ បានដាក់ពាក្យប្តឹងទៅតុលាការ ប្តឹងអ្នកភូមិពីបទប្រើអំពើហិង្សា និងធ្វើឲ្យខូចខាតទ្រព្យសម្បត្តិរបស់ក្រុមហ៊ុន។ រឿងក្តីនោះ ត្រូវបានចៅក្រមចាត់ការ ហើយបរុសអ្នកភូមិ ២ នាក់ ត្រូវបានចាប់ឃុំ។
សកម្មជនអង្គការអាដហុក លោកចាន់សុវ៉េត ដែលបានចុះទៅឃ្លាំមើលសកម្មភាពហែក្បួនរបស់អ្នកភូមិ បានបង្ហាញក្តីបារម្ភ ខ្លាចចៅក្រម សម្រេចឃុំខ្លួនអ្នកភូមិទាំង ៨ នាក់ ព្រោះសំណុំរឿងក្តីនោះ មានអ្នកភូមិ ២ នាក់ហើយ ត្រូវបានចាប់ឃុំខ្លួន។
ចំណាត់ការលឿនរបស់តុលាការខេត្តកំពង់ឆ្នាំង ត្រូវបានលោក ស្ងួន ញឿន អ្នកភូមិឡពាង ស្ថិតក្នុងចំណោមអ្នកភូមិ ៨ នាក់ ដែលត្រូវចូលបំភ្លឺតុលាការ បានចាត់ទុកចៅក្រម លម្អៀងទៅរកភាគីក្រុមហ៊ុន ព្រោះបណ្តឹងរបស់អ្នកភូមិ ប្តឹងក្រុមហ៊ុន KDC ធ្វើរបងលើដី ដែលមានជម្លោះ បែរជាតុលាការមិនចាត់ការទេ ទោះបីជាមានលិខិតរបស់រដ្ឋមន្ត្រីក្រសួងយុត្តិធម៌ ចុះថ្ងៃទី១កក្កដា បង្វិលសំណុំរឿងតវ៉ារបស់អ្នកភូមិ ទៅអោយតុលាការខេត្តកំពង់ឆ្នាំង ពិនិត្យ និងចាត់ការក៏ដោយ។
រហូតដល់ពេល ជម្លោះដីរវាងអ្នកភូមិ និងក្រុមហ៊ុន KDC ត្រូវបានតំណាងអ្នកភូមិ អះអាងថា នៅសល់ប្រជាពលរដ្ឋនៅភូមិឡពាង ១៦ គ្រួសារទៀត មិនទាន់ដោះស្រាយចប់។ ចំណែកនៅភូមិបឹងកក់ មាន ២៣ គ្រួសារ បានប្តឹងទាមទារសំណងបន្ថែម ហើយប្រជាពលរដ្ឋ ៤៣ គ្រួសារ នៅភូមិបឹងកក់ បានប្តឹងតវ៉ានៅក្រៅប្រព័ន្ធតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ