តំណាងរាស្ត្រគណបក្សសង្គ្រោះជាតិ២រូបបន្ថែមទៀត ត្រូវបានឃុំខ្លួន
ក្រោយការសាកសួរដេញដោលរយៈពេលមួយព្រឹក តុលាការក្រុងភ្នំពេញ នៅព្រឹកថ្ងៃទី១៨ កក្កដានេះ បានសម្រេចឃុំខ្លួនតំណាងរាស្ត្រជាប់ឆ្នោតមកពីគណបក្សសង្គ្រោះជាតិ លោក ឡុង រី និងលោក នុត រំដួល បន្ថែមទៀតហើយ។ ការឃុំខ្លួននេះ គឺតុលាការបានចោទប្រកាន់លើបទល្មើសចំនួន៣ ដូចគ្នាទៅនឹងតំណាងរាស្ត្រគណបក្សសង្គ្រោះជាតិចំនួន៥រូបផ្សេងទៀតផងដែរ។
ចុះផ្សាយនៅថ្ងៃ៖
ស្តាប់ - ០១:៥៧
នៅទីបំផុតលោក ឡុង រី និងលោក នុត រំដួល ដែលជាតំណាងរាស្ត្រជាប់ឆ្នោតមកពីគណបក្សសង្គ្រោះជាតិ ក៏មិនអាចគេចផុតពីការឃុំខ្លួននៅពន្ធនាគាព្រៃសដូចសហការីទាំង៥នាក់របស់ ខ្លួននោះទេ។
តុលាការសាលាដំបូងរាជធានីភ្នំពេញ បានចោទប្រកាន់តំណាងរាស្ត្រទាំង២រូបនេះ ក្រោមបទល្មើសចំនួន៣ដូចតំណាងរាស្ត្រមុនៗផងដែរ។ ទី១-បទចោទដឹកនាំកុបកម្ម ទី២-បទចោទញុះញង់ឲ្យប្រព្រឹត្តអំពើហិង្សា និងបទល្មើសទី៣ បទផ្តើមគំនិតបង្កអំពើហិង្សា ដោយចេតនាមានស្ថានទម្ងន់ទោស។ នេះបើតាមលោកមេធាវី កែត ឃី ដែលជាអ្នកការពារក្តីឲ្យគណបក្សសង្គ្រោះជាតិ។
សូមរំលឹកថា លោក ឡុង រី និងលោក នុត រំដួល ត្រូវបានអាជ្ញាធរស្លៀកសម្លៀកបំពាក់ស៊ីវិលនាំខ្លួនទៅកាន់ស្នងការក្រុងកាលពីម្សិលមិញ នៅគេហដ្ឋានលោកឡុង រី ក្នុងសង្កាត់ចោមចៅ។ សូមបញ្ជាក់ផងដែរថា ការសួរដេញដោលតំណាងរាស្ត្រគណបក្សសង្គ្រោះជាតិទាំងពីររូបនេះ គឺមិនមានស្ថានការណ៍អ្វីតានតឹងនោះទេ។ ពោលគឺមិនមានការដាក់កម្លាំងបិទផ្លូវ និងការប្រមូលផ្តុំទ្រង់ទ្រាយធំពីអ្នកគាំទ្ររបស់គណបក្សសង្គ្រោះជាតិឡើយ។
ទាក់ទងនឹងការឃាត់ខ្លួនតំណាងរាស្ត្រជាបន្តបន្ទាប់នេះ ប្រធានស្តីទីគណបក្សសង្គ្រោះជាតិ លោក កឹម សុខាដែលត្រូវបានតុលាការចេញដីកាកោះហៅដែរនោះ បានអំពាវនាវដល់អ្នកគាំទ្រគណបក្សសង្គ្រោះជាតិទាំងអស់កុំឲ្យមានការតក់ស្លុត និងទៅឃ្លាំមើលការសួរដេញដោលរបស់លោក នៅថ្ងៃទី២៥កក្កដាខាងមុខនេះផងដែរ។ ប៉ុន្តែ ជាការជួបជុំឃ្លាំមើលដោយអហិង្សា នេះបើតាមលោក កឹម សុខាដដែល។ អនុប្រធានគណបក្សសង្គ្រោះជាតិដែលធ្លាប់ជាប់ពន្ធនាគារព្រៃសម្តងហើយនោះ បានអះអាងថា ខ្លួនមិនមានការតក់ស្លុតចំពោះព្រឹត្តិការណ៍ដែលគណបក្សប្រឆាំងកំពុងតែប្រឈមនោះទេ។
រហូតមកដល់ថ្ងៃទី១៨ កក្កដានេះ តំណាងរាស្ត្រគណបក្សសង្គ្រោះជាតិ ចំនួន៧រូប និងសកម្មជន១រូបហើយត្រូវបានជាប់ឃុំខ្លួននៅពន្ធនាគារព្រៃស ដោយតុលាការចោទពីបទជាប់ពាក់ព័ន្ធនឹងអំពើហិង្សាបង្ហូរឈាមកាលពីថ្ងៃទី១៥កក្កដា នៅក្បែរទីលានប្រជាធិបតេយ្យ។ ការឃុំខ្លួនតំណាងរាស្ត្រគណបក្សសង្គ្រោះជាតិចំនួន២រូបបន្ថែមទៅពន្ធនាគារព្រៃសនេះ គឺធ្វើឡើងខណៈដែលលោកសម រង្ស៊ី ប្រធានគណបក្សសង្គ្រោះជាតិ ប្រកាសនឹងវិលមកកាន់កម្ពុជាវិញ នៅថ្ងៃទី១៩ កក្កដាស្អែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ