CCHRនិងក្រុមអ្នកច្បាប់ នៅមានសង្ឃឹមលើការកែប្រែច្បាប់ស្តីពីតុលាការ
ព្រះមហាក្សត្រនេះព្រះរាជាណាចក្រកម្ពុជា កាលពីថ្ងៃទី១៦កក្កដាកន្លងទៅនេះ បានឡាយព្រះ ហស្តលេខាលើព្រះរាជក្រម ដើម្បីឲ្យសេចក្តីព្រាងច្បាប់ចំនួនបីទាក់ទងនឹងតុលាការចូលជាធរមាន បន្ទាប់ពីសភាដែលមានតែសមាជិកមកពីគណបក្សប្រជាជនកម្ពុជាអនុម័ត។ តែយ៉ាងណាក៍ដោយ ក្រុមអ្នកច្បាប់ និងសង្គមស៊ីវិលនៅមានសង្ឃឹមថា ច្បាប់នេះនឹងត្រូវបានកែរប្រែឡើងវិញ នៅពេលរដ្ឋសភាពហុបក្សដំណើរការពេញលេញក្រោយការចូលប្រជុំសភារបស់បក្សប្រឆាំង។
ចុះផ្សាយនៅថ្ងៃ៖
ស្តាប់ - ០២:២៨
ឥឡូវអង្ករបានក្លាយជាបាយទៅហើយ! ពោលគឺក្រោយពីព្រះមហាក្សត្របានឡាយព្រះហស្តលេខាលើព្រះរាជក្រមចំនួនបីប្រកាសឲ្យប្រើច្បាប់ស្តីពីការរៀបចំអង្គការតុលាការ ច្បាប់ស្តីពីការរៀបចំ និងការប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម និងច្បាប់ស្តីពីលក្ខន្តិកៈនៃចៅក្រម និងព្រះរាជអាជ្ញា កាលពីថ្ងៃទី១៦កក្កដាកន្លងទៅនេះ។ មានន័យថា កិច្ចខិតខំប្រឹងប្រែងរបស់សង្គមស៊ីវិលនិងអ្នកច្បាប់ក្នុងការតស៊ូមតិ ដើម្បីកុំអោយសេចក្តីព្រាងច្បាប់ថ្មីទាំងបីនេះចេញរួច។ តែនៅទីបំផុត ច្បាប់ទាំងបីបានឆ្លងផុតដៃរដ្ឋសភា ព្រឹទ្ធសភា និងចុងក្រោយគឺស្ថាប័ណព្រះមហាក្សត្រដោយរលូន និងដោយមិនមានការកែប្រែអ្វីទាំងអស់។
ច្បាប់ទាំងបីនេះ ត្រូវបានអង្គការសង្គមស៊ីវិល និងសហគមន៍អន្តរជាតិរិះគន់ថា ធ្វើអោយប៉ះពាល់ដល់ឯករាជ្យភាពរបស់តុលាការ។ នៅថ្ងៃខួបនៃការបង្កើតក្រុមប្រឹក្សាធម្មនុញ្ញកម្ពុជា កាលពីថ្ងៃ១៥ ខែមិថុនា អង្គការ លីកាដូ បានចេញសេចក្តីថ្លែងការណ៍មួយដោយស្នើសុំក្រុមប្រឹក្សាធម្មនុញ្ញ បដិសេធច្បាប់ថ្មីចំនួនបី ដែលក្នុងអត្ថន័យបច្ចុប្បន្នមានការប៉ះពាល់ដល់ឯករាជ្យភាពនៃប្រព័ន្ធតុលាការ។
តែយ៉ាងណាក៍ដោយ សំរាប់លោក អ៊ូ វីរៈ ប្រធានក្រុមប្រឹក្សាភិបាលនៃមជ្ឈមណ្ឌលសិទ្ធិមនុស្សកម្ពុជា និងលោក សុខ សំអឿន ប្រធានក្រុមអ្នកច្បាប់ការពារសិទ្ធិកម្ពុជានៅមានក្តីសង្ឃឹមថា ច្បាប់នេះ នឹងត្រូវកែរប្រែឡើងវិញ នៅពេលដែលក្រុមអ្នកតំណាងរាស្ត្របក្សប្រឆាំងទាំង៥៥រូបចូលប្រជុំសភា។ បើតាមអ្នកទាំងពីរ គឺមានតែមធ្យោបាយតែមួយគត់ នោះគឺការធ្វើវិសោធនកម្ម នៅពេលដែលសភាដំណើរការពេញលេញនាពេលខាងមុខនេះ។សូមបញ្ជាក់ថា ច្បាប់ទាំងបីត្រូវបានរដ្ឋសភាដែលមានតែសមាជិកគណបក្សប្រជាជនកម្ពុជាបើកកិច្ចប្រជុំ ពិភាក្សា និងអនុម័តនៅព្រឹកថ្ងៃទី២០ ឧសភា ក្រោយពីច្បាប់នេះ ត្រូវបានគណៈរដ្ឋមន្ត្រីអនុម័តកាលពីព្រឹកថ្ងៃទី១៨ ខែមេសា ឆ្នាំ២០១។ សំរាប់រដ្ឋាភិបាល ការរៀបចំច្បាប់គោល ទាំង ៣នេះ គឺជាការចាប់ផ្តើមដ៏សំខាន់មួយ សម្រាប់នីតិកាលទី៥ នៃរដ្ឋសភានេះ លើការងារកំណែទម្រង់ច្បាប់ និងប្រព័ន្ធយុត្តិធម៌ ដែលជាផ្នែកមួយដ៏សំខាន់ នៃស្នូលយុទ្ធសាស្ត្រ ចតុកោណរបស់ រាជរដ្ឋាភិបាល។ ច្បាប់គោលទាំង៣នេះ នឹងបង្កើតបានជាមួលដ្ឋានដ៏សំខាន់ ដើម្បីឈានទៅសម្រេចឲ្យបាន នូវចក្ខុវិស័យរបស់រាជរដ្ឋាភិបាល ក្នុងការពង្រឹងអភិបាលកិច្ចល្អ និងនីតិរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ