ផ្ទុះអាវុធ១យប់៤ករណីនៅភ្នំពេញបង្កការព្រួយបារម្ភដល់ពលរដ្ឋក្នុងការគ្រប់គ្រងអាវុធ
យ៉ាងហោចណាស់ មនុស្សចំនួន២នាក់បានស្លាប់ភ្លាមៗនិងមួយចំនួនទៀតបានរងរបួសក្នុងហេតុការណ៍ប្រើប្រាស់អាវុធនិងផ្ទុះអាវុធចំនួន៤ករណីនៅកន្លែងផ្សេងគ្នាក្នុងរាជធានីភ្នំពេញ។ការផ្ទុះអាវុធទាំងអស់នេះគឺកើតឡើងនៅយប់តែមួយគឺយប់ថ្ងៃទី១៨និងឈានចូល១៩ខែធ្នូនេះ។ ប៉ុន្តែសមត្ថកិច្ចអះអាងថានឹងចាត់វិធានការលើអ្នកប្រើប្រាស់អាវុធបាញ់បោះដោយខុសច្បាប់ទាំងនោះទៅតាមផ្លូវច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការប្រើប្រាស់អាវុធបាញ់បោះដោយខុសច្បាប់នេះ គឺករណីខ្លះកើតឡើងដោយសារជម្លោះបុគ្គលនិងករណីខ្លះទៀតជាអំពើប្លន់ប្រដាប់អាវុធ ដែលត្រូវបានគេស្តីបន្ទោសថា បានបង្កការភ័យខ្លាចដល់សុវត្តិភាពរបស់ប្រជាពលរដ្ឋនៅក្នុងទីក្រុងភ្នំពេញ។
ករណីទី១ គឺបុរសម្នាក់ត្រូវបានជនមិនស្គាល់អត្តសញ្ញាណបានបើករថយន្តតាម បាញ់១គ្រាប់ពីក្រោយស្លាប់ក្នុងថ្លុកឈាម នៅលើស្ពានអាកាសស្ទឹងមានជ័យ ខណ្ឌចំការមន។ ហេតុការណ៍រន្ធត់នេះ កើតឡើងនៅម៉ោងប្រមាណជាង៣ទៀបភ្លឺ ខណៈដែលជនរងគ្រោះដែលជាអ្នកចំរៀងបានជិះម៉ូតូចេញពីក្លឹបកំសាន្តរាត្រី។
ករណីទី២គឺការបាញ់ប្លន់ចំនួន២គ្រាប់ សង្កាត់បឹងទំពុន២ ខណ្ឌមានជ័យ រាជធានីភ្នំពេញ បណ្តាលជនរងគ្រោះរបួសជើងផ្នែកខាងឆ្វេង។ ប៉ុន្តែជនសង្ស័យម្នាក់ត្រូវបានប្រជាពលរដ្ឋវាយសម្លាប់នៅនឹងកន្លែង។
ករណីទី៣ បុរសម្នាក់ជាមេធាវីម្នាក់ ត្រូវសង្ស័យថា បើករថយន្ត Luxus 470 ទៅឈប់មុខផ្ទះ នាយឧត្តមសេនីយ៍ នេត សាវឿន អគ្គស្នងការនគរបាលជាតិ នៅម្តុំស្តាតអូឡាំពិក វេលាអាធ្រាធឆ្លងថ្ងៃថ្មី ហើយបានបាញ់ឡើងលើចំនួន២គ្រាប់ បង្កអោយមានការភ្ញាក់ផ្អើលដល់សមត្ថកិច្ចចុះឃាត់ខ្លួនបានភ្លាមៗផងដែរ។
រីឯករណីទី៤ គឺបុរសម្នាក់បានរត់ទៅយកកាំភ្លើងអាកា៤៧ ពីមន្រ្តីនគរបាលដែលកំពុងប្រចាំការ នៅប៉ុស្តិ៍យាមរបស់ស្ថានទូតវៀតណាម ក្នុងខណ្ឌចំការមន ដើម្បីបាញ់ទៅលើគូជម្លោះ២នាក់ ដោយសារតែខឹងគេវាយរហូតបែកក្បាល។
ចំពោះករណីទាំងអស់នេះធ្វើឲ្យមានការលើកឡើងជាសំណួរពីអ្នកតាមដានសង្គម ស្តីពីសុវត្ថិភាពក្នុងការប្រើប្រាស់អាវុធទាំងត្រូវច្បាប់និងខុសច្បាប់ ព្រមទាំងមានការ រិះគន់ផងដែរ ពីភាពកំសោយនៃគ្រប់គ្រងអាវុធជាតិផ្ទុះ។ ប៉ុន្តែអ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថាសមត្ថកិច្ចនឹងចាត់វិធានការណ៍ចំពោះករណីទាំងអស់នេះទៅតាមផ្លូវច្បាប់ដោយមិនមានការលើកលែងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ