សហគមន៍អន្ដរជាតិ ថ្កោលទោសកងសមត្ថកិច្ច ដែលប្រើវិធានការបង្ក្រាបហួសហេតុ លើបាតុករ
ការបង្ក្រាបបាតុកម្មដោយហិង្សា រហូតបណ្ដាលឲ្យមានមនុស្សស្លាប់ កាលពីថ្ងៃម្សិលមិញ បានធ្វើឲ្យកក្រើករញ្ជួយដល់សហគមន៍អន្ដរជាតិ។ ប្រតិកម្មពីសហគមន៍អន្ដរជាតិ ព្រមទាំងអង្គការសហប្រជាជាតិ បានធ្លាក់មកជាបន្តបន្ទាប់ ថ្កោលទោសកងកម្លាំងសមត្ថកិច្ច ដែលប្រើវិធានការបង្ក្រាបហួសហេតុ លើក្រុមបាតុករ។ក្រៅពីនេះ ក៏មានផងដែរ សេចក្ដីអំពាវនាវឲ្យគ្រប់ភាគី អត់ធ្មត់ និងចៀសវាងនូវសកម្មភាពហិង្សាគ្រប់ប្រភេទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៤
សហរដ្ឋអាមេរិក បានសម្ដែងការសោកស្ដាយចំពោះការបាត់បង់ជីវិតនៅកម្ពុជា ក្នុងការប៉ះទង្គិចដោយហិង្សា រវាងអ្នកតវ៉ា និងកងកម្លាំងរបស់រដ្ឋាភិបាល។ អ្នកនាំពាក្យក្រសួងការប្រទេសអាមេរិក លោកស្រី Marie Harf មានប្រសាសន៍បន្ថែមថា សហរដ្ឋអាមេរិក ថ្កោលទោសចំពោះការប្រើប្រាស់អំពើហិង្សា ជាមធ្យោបាយដើម្បីឈានទៅសម្រេចគោលដៅនយោបាយណាមួយ។ លោកស្រី បានឲ្យដឹងបន្ថែមទៀតថា អាមេរិកបានជំរុញឲ្យសហជីព និងរដ្ឋាភិបាល ធ្វើការរួមគ្នា ដើម្បីដោះស្រាយជម្លោះការងារនៅកម្ពុជាដោយសន្តិវិធី។ អ្នកនាំពាក្យរូបនេះ បានអំពាវនាវដល់គ្រប់ភាគីទាំងអស់ ត្រូវអត់ធ្មត់ឲ្យបានជាអតិបរមា ព្រមទាំងត្រូវបង្ហាញនូវឆន្ទៈគោរពច្បាប់។
ចំណែកអង្គការលើកលែងទោសអន្ដរជាតិ នៅក្នុងសេចក្ដីថ្លែងការណ៍មួយចេញផ្សាយនៅថ្ងៃសុក្រ បានអំពាវនាវឲ្យមានការស៊ើបអង្កេត ដើម្បីឈានទៅដល់ការចាប់ខ្លួនកងកម្លាំងសន្តិសុខ ដែលជាអ្នកទទួលខុសត្រូវក្នុងការបង្ក្រាបដោយហិង្សាទៅលើកម្មករអ្នកតវ៉ា។ សេចក្ដីថ្លែងការណ៍ដដែលបានលើកឡើងពីច្បាប់អន្ដរជាតិដែលថា ការប្រើប្រាស់គ្រាប់ពិតដោយកងកម្លាំងសមត្ថកិច្ច អាចធ្វើទៅបាន ក្នុងស្ថានភាពដែលមិនអាចចៀសបាន ដើម្បីការពារជីវិតខ្លួនតែប៉ុណ្ណោះ។
ការបង្ក្រាបដ៏បង្ហូរឈាមចុងក្រោយនៅកម្ពុជា បានធ្វើឲ្យអ្នករាយការណ៍ពិសេស អ.ស.ប.ទទួលបន្ទុកសិទ្ធិមនុស្សនៅកម្ពុជា លោកស៊ូរីយ៉ា ស៊ូបេឌី ព្រួយបារម្ភយ៉ាងខ្លាំង។ នៅក្នុងសេចក្ដីថ្លែងការណ៍ចុះថ្ងៃទី៣មករា លោកស៊ូបេឌី បានបញ្ជាក់ថា ការប្រើប្រាស់កងកម្លាំងរបស់រដ្ឋាភិបាល ត្រូវអនុលោមទៅតាមគោលការណ៍នៃភាពស្របច្បាប់ ចាំបាច់ និងសមាមាត្រទៅនឹងកម្លាំងអ្នកតវ៉ា។ លោកបានថ្លែងអំពាវនាវដល់អាជ្ញាធរ ឲ្យអត់ធ្មត់នៅចំពោះមុខអ្នកតវ៉ា។ ចំណែកអ្នកតវ៉ាដែលបានប្រើហិង្សា គប់ដុំថ្មបំផ្លាញទ្រព្យសម្បត្តិសាធារណៈនិងឯកជន ក៏ត្រូវបានលោកស៊ូបេឌី អំពាវនាវឲ្យបង្កើនការអត់ធ្មត់ផងដែរ។
អង្គការសហប្រជាជាតិប្រចាំកម្ពុជា បានចេញសេចក្ដីថ្លែងការណ៍ ក្នុងនាមការិយាល័យអង្គការសហប្រជាជាតិទាំងអស់នៅកម្ពុជា បានថ្កោលទោសចំពោះការប្រើគ្រាប់ពិតទៅលើអ្នកតវ៉ា រហូតបណ្ដាលឲ្យមានមនុស្សស្លាប់និងរបួសជាច្រើន ក្នុងរយៈពេលពីរថ្ងៃចុងក្រោយនេះ។ មន្ដ្រីតំណាងអង្គការសហប្រជាជាតិ បានអំពាវនាវដល់អាជ្ញាធរ អោយបញ្ឈប់ការប្រើប្រាស់គ្រាប់កាំភ្លើងពិត ដើម្បីទប់ទល់ការតវ៉ា។ ចំណែក តំណាងកម្មករ និយោជក ព្រមទាំងអាជ្ញាធរ ត្រូវបានអំពាវនាវឲ្យព្យាយាមស្វែងរកយន្តការនៃការចរចា ដើម្បីដោះស្រាយបញ្ហាដែលកំពុងតែកើតមាននេះ។
ដោយឡែកប្រតិភូសហភាពអឺរ៉ុប ទើបតែបានចេញសេចក្ដីថ្លែងការណ៍មួយ នៅថ្ងៃទី៤មករានេះ ដោយសម្ដែងក្ដីព្រួយបារម្ភយ៉ាងខ្លាំង អំពីបាតុកម្មហិង្សា ដែលបានកើតមាននៅទីក្រុងភ្នំពេញក្នុងរយៈពេលពីរថ្ងៃចុងក្រោយនេះ។ សេចក្ដីថ្លែងការណ៍ដដែល បានសម្ដែងការសោកស្ដាយ ចំពោះសកម្មភាពរបស់កងកម្លាំងសន្តិសុខ ដែលបានប្រើប្រាស់កម្លាំងហួសប្រមាណ បង្ក្រាបទៅលើក្រុមកម្មករអ្នកតវ៉ា។ ប្រតិភូសហភាពអឺរ៉ុប បានអំពាវនាវឲ្យគ្រប់ភាគីពាក់ព័ន្ធក្នុងជម្លោះការងារទាំងអស់ ឲ្យបញ្ឈប់អំពើហិង្សា ហើយងាកមកពិភាក្សាគ្នានៅលើតុចរចា ដើម្បីស្វែងរកដំណោះស្រាយដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ