បុណ្យឯករាជ្យជាតិឆ្នាំនេះ ប្រារព្ធឡើងក្រោមការរឹតបន្តឹងសន្តិសុខខ្លាំងជាងសព្វមួយដង
០៩ វិចិ្ឆកា ១៩៥៣ - ០៩ វិចិ្ឆកា ២០១៩។ ថ្ងៃទី០៩ ខែវិច្ឆិកានេះ គឺជាខួបគម្រប់៦៦ឆ្នាំគត់ ដែលប្រទេសកម្ពុជា បានទទួលឯករាជ្យពេញបរិបូណ៌ពីសាធារណរដ្ឋបារាំង ក្រោមព្រះរាជបូនីយកិច្ចរបស់សម្តេចព្រះនរោត្តម សីហនុ ព្រះបរមរតនកោដ្ឋ អតីតព្រះមហាក្សត្រនៃព្រះរាជាណាចក្រកម្ពុជា។ នៅទីក្រុងភ្នំពេញ ពិធីត្រូវបានប្រារព្ធធ្វើជាផ្លូវការនៅឯវិមានឯករាជ្យ ក្រោមព្រះរាជាធិបតីភាពរបស់ព្រះមហាក្សត្រកម្ពុជា និងថ្នាក់ដឹកនាំ និងមន្ត្រីជាន់ខ្ពស់រដ្ឋាភិបាលកម្ពុជា រួមនឹងប្រជាពលរដ្ឋ។ តែបុណ្យឯករាជ្យជាតិឆ្នាំនេះ ប្រារព្ធឡើងក្រោមការរឹតបន្តឹងសន្តិសុខខ្លាំងជាងសព្វមួយដង ដោយសារតែការប្រកាសវិលចូលស្រុករបស់ លោក សម រង្ស៊ី។
ចុះផ្សាយនៅថ្ងៃ៖
ដូចរាល់ឆ្នាំដែរ ទិវាបុណ្យឯករាជ្យជាតិកម្ពុជាឆ្នាំនេះ ត្រូវបានប្រារព្ធធ្វើឡើងយ៉ាងឱឡារិក ក្រោមព្រះរាជាធិបតីភាព ដ៏ខ្ពង់ខ្ពស់របស់ព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី និងដោយមានការចូលរួមពីសមាជិក និងថ្នាក់ដឹកនាំរដ្ឋាភិបាល រដ្ឋសភា និងព្រឹទ្ធសភា និងប្រជាពលរដ្ឋយ៉ាងច្រើនកុះករនៅវិមានឯករាជ្យ។ ព្រះមហាក្សត្រកម្ពុជាបានយាងថ្វាយភ្លើងជ័យ នៅក្នុងថ្ងៃប្រវត្តិសាស្រ្តនៃទិវាបុណ្យឯករាជ្យជាតិលើកទី ៦៦។
ជាការកត់សម្គាល់ ពិធីបុណ្យឯករាជ្យជាតិកម្ពុជានាឆ្នាំនេះ ធ្វើឡើងក្រោមការរឹតបន្តឹងសន្តិសុខខ្លាំងជាងសព្វមួយដង។ កងកម្លាំងប្រដាប់អាវុធ ក្រៅពីមានដាក់ពង្រាយនៅបរិវេណប្រារព្ធពិធីនាវិមានឯករាជ្យហើយ ក៏មានផងដែរ នៅតាមទីតាំងផ្សេងៗទៀតក្នុងទីក្រុងភ្នំពេញ ពិសេសតាមបណ្ដោយមហាវិថីសហព័ន្ធរុស្ស៊ី មុខព្រលានយន្តហោះពោធិ៍ចិនតុង និងត្រង់ចំណុចទីស្ដីការគណៈរដ្ឋមន្ដ្រី។ កងកម្លាំងចំរុះទាំងនេះ ត្រូវបានចែកចេញជាកម្លាំងប្រចាំការតាមគោលដៅសំខាន់ៗ កម្លាំងចល័ត ដែលមានឯកសណ្ឋាន និងមានបំពាក់អាវុធផងដែរ។ ការត្រៀមពង្រាយកម្លាំង ចំហរ និងសម្ងាត់ដ៏ច្រើនសន្ធឹកសន្ធាប់ដូច្នេះ ត្រូវបាន លោក ខៀវ សុភ័ក អ្នកនាំពាក្យក្រសួងមហាផ្ទៃ លើកឡើងថា គឺដើម្បីទប់ស្កាត់ការគម្រាមកំហែងសន្តិសុខជាតិ ដែលមានជាប់ទាក់ទងទៅនឹងការគ្រោងចូលមកអុកឡុករបស់លោក សម រង្ស៊ី និងអ្នកគាំទ្រ ចំថ្ងៃបុណ្យឯករាជ្យជាតិ ៩វិច្ឆិកា ឆ្នាំ២០១៩នេះ។
គួររំលឹកថា ប្រទេសកម្ពុជា បានទទួលឯករាជ្យពេញបរិបូរណ៌ពីអាណានិគមនិយមបារាំង នៅថ្ងៃទី០៩ វិច្ឆិកា ឆ្នាំ១៩៥៣ ក្រោមព្រះរាជបូជនីយកិច្ចរបស់ព្រះករុណា ព្រះបាទសម្ដេច ព្រះនរោត្តម សីហនុ ព្រះបរមរតនកោដ្ឋ។ នៅពេលបានទទួលឯករាជ្យ ព្រះមហាវីរក្សត្រ ព្រះបរមរតនកោដ្ឋ បានសរសេរលិខិតផ្លូវការទៅរដ្ឋាភិបាលបារាំង ដោយអះអាងថា ចាប់ពីថ្ងៃទី ៩វិច្ឆិកា ឆ្នាំ១៩៥៣ តទៅ គឺកម្ពុជា ជាប្រទេសឯករាជ្យមួយ មិនស្ថិតនៅក្រោមអាណានិគមរបស់ប្រទេសណាមួយនោះឡើយ ហើយកម្ពុជា នឹងស្រលាញ់រាប់អានបារាំង ក្នុងឋានៈជាប្រទេសឯករាជ្យដូចគ្នា។ បណ្តាញសង្គមរបស់ព្រះបរាមរាជវាំង Royal du Cambodge បានដកស្រង់នូវព្រះរាជឱង្ការនៃអតីតព្រះមហាក្សត្រកម្ពុជា ដែលមានអត្ថន័យយ៉ាងដូច្នេះថា “ខ្ញុំជឿជាក់ថា ការរួបរួមគ្នារបស់យើងជាធ្លុងមួយនេះនឹងជួយស្រោចស្រង់ប្រទេសយើង និងឯករាជ្យយើងឲ្យឆ្លងសមុទ្រគ្រោះថ្នាក់ ដែលមាននៅមុខយើងនេះ បានផុតស្រឡះដោយជ័យមង្គល”។
ចំណែក លោកនាយករដ្ឋមន្ដ្រី ហ៊ុន សែន វិញ បន្ទាប់ពីបានចូលរួមអបអរសាទរទិវាបុណ្យឯករាជ្យជាតិនាព្រឹកថ្ងៃសៅរ៍នេះ លោកបានសរសេរសារនៅលើទំព័រហ្វេសបុកផ្លូវការរបស់ខ្លួនថា “ប្រជាពលរដ្ឋខ្មែរ នៅថ្ងៃនេះ មានតែអំណរសាទរ និងក្តីសប្បាយរីករាយចំពោះមោទនៈភាពជាតិ ដែលមិនត្រូវអោយមានអ្វីមករំខានដល់សេចក្តីសុខ និងសន្តិភាពរបស់កម្ពុជាតទៅទៀតឡើយ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ