លោក ហ៊ុន សែន ចាត់ទុកជំនួបរវាងលោក និងពលរដ្ឋខ្មែរនៅក្រៅប្រទេសគឺជាការលើកមុខមាត់ជាតិ
លោកនាយករដ្ឋមន្ត្រី ហ៊ុន សែន នឹងធ្វើដំណើរមកដល់ប្រទេសកម្ពុជានៅថ្ងៃទី១៨ខែមីនានេះ ក្រោយលោកដឹកនាំគណៈប្រតិកម្ពុជាទៅចូលរួមកិច្ចប្រជុំកំពូលអាស៊ាន អូស្ត្រាលី។ នៅក្នុងអំឡុងពេលជួបពលរដ្ឋខ្មែរ លោកនាយករដ្ឋមន្ត្រី ហ៊ុន សែន ចាត់ទុកជំនួបរវាងលោក និងពលរដ្ឋខ្មែរនៅអូស្រ្តាលី និង ញូវហ្សេលេន គឺជាការលើកមុខមាត់ជាតិ។
ចុះផ្សាយនៅថ្ងៃ៖
លោកនាយករដ្ឋមន្ត្រី ហ៊ុន សែន ក៏បានចាត់ទុកវត្តមានពួកគេជាកម្លាំងចិត្តផងដែរ។ ពីប្រទេសអូស្រ្តាលី លោក ហ៊ុន សែន បានបន្តគូសបញ្ជាក់ថា ប្រទេសកម្ពុជាសព្វថ្ងៃមិនអាក្រក់ដូចការលាបព័ណ៌របស់បុគ្គលមួយចំនួនឡើយ។ លោកនាយករដ្ឋមន្ត្រីបានថ្លែងបែបនេះ នៅយប់ថ្ងៃទី ១៧ មីនា ក្នុងឱកាសជួបសំណេះសំណាលជាមួយពលរដ្ឋខ្មែរនៅអូស្ត្រាលី។ បន្ថែមលើនេះ លោកបានបង្ហាញពីជោគជ័យនៅលើទឹកដីអូស្ត្រាលីទៅកាន់ពលរដ្ឋខ្មែរនៅទីនោះ តាមរយៈជំនួយរបស់អូស្ត្រាលីប្រមាណជាង ៨៧ លានដុល្លារមកអភិវឌ្ឍន៍កម្ពុជា។ ក៏មានដែរ ការស្នើឲ្យអូស្ត្រាលី ពិចារណាក្នុងការបើកជើងហោះហើរ កម្ពុជា-អូស្រ្តាលី ខណៈប្រជាពលរដ្ឋខ្មែររស់នៅអូស្រ្តាលីប្រមាណជា៦ម៉ឺននាក់ ។ នេះបើតាមលោកនាយករដ្ឋមន្ត្រី។
នៅចំពោះមុខពលរដ្ឋខ្មែរអូស្ត្រាលី លោក ហ៊ុន សែន ថា កម្ពុជាបានប្រឹងប្រែងពីប្រទេសគ្មានចំណូល មកជាប្រទេសមានចំណូលមធ្យមកម្រិតទាបនាពេលបច្ចុប្បន្ន ។ ក្រៅពីនេះ លោក ហ៊ុន សែន បានស្នើឲ្យពលរដ្ឋខ្មែររស់នៅអូស្រ្តាលី និងញូវហ្សេលេនជួយគាំទ្រ តាមរយៈការទិញផលិតផលកសិផលរបស់ខ្មែរដែលបាននាំយកទៅលក់នៅ ប្រទេសអូស្ដ្រាលី។ ការជួយគាំទ្រ និងទិញផលិតផលរបស់ខ្មែរគឺជាការលើកទឹកចិត្តដល់ការផលិតនៅក្នុងស្រុក និងលើកស្ទូយជីវភាពរបស់ពលរដ្ឋ។ នេះបើតាមលោកនាយករដ្ឋមន្ត្រី ហ៊ុន សែន ។
ទោះជា លោកនាយរដ្ឋមន្ត្រី ហ៊ុន សែន បានបង្ហាញពីជោគជ័យជាច្រើននៅប្រទេសអូស្ត្រាលីយ៉ាងណាក៏ដោយ ប៉ុន្តែលោកក៏បានទទួលស្គាល់ពីវត្តមានជួបជុំប្រឆាំងរូបដែរ ដោយបានចាត់ទុកបាតុករប្រឆាំងរូបលោកតាមរយៈ ការដុតរូបទិញមោង មកពីមានការញុះញង់ពីក្រុមប្រឆាំង។ ជុំវិញការធ្វើការបាតុកម្មប្រឆាំងរូបនេះដែរ លោក ហ៊ុន សែន បានស្នើឲ្យអ្នកស្រី ប៊ូ រចនា ភរិយា លោក កែម ឡី កុំចាត់ទុកលោកជាសត្រូវ។ការស្នើនេះបន្ទាប់ពី អ្នកស្រី ប៊ូ រចនា ក៏ស្ថិតនៅក្នុងការជួបជុំតវ៉ានោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ