សកម្មជនសិទ្ធិមនុស្សមួយចំនួន រក្សាជំហរហែក្បួនថ្ងៃ១០ធ្នូ ទោះបីសាលាក្រុងហាមឃាត់
សកម្មជនសិទ្ធិមនុស្សមួយចំនួន អះអាងថាអង្គការ និងសមាគមរបស់ពួកគេ នៅតែរក្សាជំហរដដែល ពោលគឺថ្ងៃសិទ្ធិមនុស្ស១០ធ្នូស្អែកនេះ នឹងមានការហែក្បួនដូចការគ្រោងទុក។ ជាការអះអាងបន្ទាប់ពីសាលាក្រុងភ្នំពេញ កាលពីថ្ងៃម្សិលមិញបានចេញសេចក្តីប្រកាសមួយដោយ មិនអនុញ្ញាតឲ្យមានការហែក្បួនសិទ្ធិមនុស្សទេ ក្រោមហេតុផលប៉ះពាល់សណ្តាប់ធ្នាប់។
ចុះផ្សាយនៅថ្ងៃ៖
លោក វន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ ប្រាប់វិទ្យុបារាំងអន្តរជាតិនៅថ្ងៃទី០៩ ខែធ្នូ នេះថា សមាគមរបស់លោកមិនមានការព្រួយបារម្ភអ្វីទេចំពោះការហាមឃាត់របស់អាជ្ញាធរមិនឲ្យហែក្បួន។ លោកបន្ថែមថា ដោយសារតែថ្ងៃទី១០ ខែធ្នូ គឺជាទិវាសិទ្ធិមនុស្សអន្តរជាតិ ដែលបង្ហាញពីសិទ្ធិរបស់ប្រជាពលរដ្ឋ អាជ្ញាធរនឹងមិនធ្វើអ្វីផ្តេសផ្តាស ដែលធ្វើឲ្យប៉ះពាល់មុខមាត់របស់ខ្លួនទេ។ លោកអះអាងថាសមាគមរក្សាជំហរដដែល។
លោក ស ម៉ូរី អនុប្រធានសមាគមបណ្តាញយុវជនកម្ពុជា បានឆ្លើយតបនឹងលិខិតរបស់សាលាក្រុងភ្នំពេញ និងក្រសួងមហាផ្ទៃតាមបណ្តាញសង្គមហ្វេសប៊ុករបស់លោកថា ក្រសួងមហាផ្ទៃមិនបានផ្តល់មូលហេតុច្បាស់លាស់ទេ ចំពោះការបដិសេធមិនឱ្យមានការដើរក្បួនចេញពីសួនច្បារក្រុមប្រឹក្សាអភិវឌ្ឍន៍កម្ពុជា CDC ទៅទីលានប្រជាធិបតេយ្យ។ សាលារាជធានីនៅតែប្រើហេតុផលដដែលៗ គឺការកកស្ទះចរាចរ និងប៉ះពាល់ដល់សណ្តាប់ធ្នាប់ និងសន្តិសុខសង្គម ដើម្បីបដិសេធសិទ្ធិក្នុងការជួបប្រជុំ និងសម្តែងមតិដោយសន្តិវិធី។
កាលពីថ្ងៃទី០៨ ខែធ្នូ សាលាក្រុងភ្នំពេញបានចេញលិខិតមួយជម្រាបមក លោក ស ម៉ូរី អនុប្រធានសមាគមបណ្តាញយុវជនកម្ពុជា, លោក ទុយ ស៊ីធៀង អគ្គលេខាធិការសហព័ន្ធសហជីពកម្មករ ចំណីអាហារ និងសេវាកម្មកម្ពុជា, លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងលោក ថេង សាវឿន ប្រធានសមាគមសម្ព័ន្ធកសិករកម្ពុជា ដោយពុំអនុញ្ញាតឲ្យមានការហែក្បួនក្នុងថ្ងៃសិទ្ធិមនុស្សឡើយ។
សាលាក្រុងភ្នំពេញបញ្ជាក់តាមលិខិតរបស់ខ្លួន បន្ទាប់ពីមានចំណារពីលោក ស ខេង រដ្ឋមន្ត្រីក្រសួងមហាផ្ទៃថា រដ្ឋបាលរាជធានីភ្នំពេញ អនុញ្ញាតឲ្យជួបជុំ និងរៀបចំពិធីអបអរទិវាសិទ្ធិមនុស្សនៅទីលានប្រជាធិបតេយ្យ ដោយពុំមានការដង្ហែក្បួនតាមផ្លូវសាធារណៈឡើយ។ សាលាក្រុងភ្នំពេញ បញ្ជាក់ថា ក្នុងករណីនៅតែធ្វើការជួបជុំខុសពីតាំង ដែលបានអនុញ្ញាតជូន ហើយមានការហែក្បួនតាមផ្លូវសាធារណៈ ដែលបណ្តាលឲ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈនោះ អ្នករៀបចំត្រូវទទួលខុសត្រូវទាំងស្រុង។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ អះអាងថា ការលើកឡើងរបស់សាលាក្រុងភ្នំពេញថាខូចសណ្តាប់ធ្នាប់សាធារណៈ គឺជាការលើកឡើងដដែលៗ នៅពេលសង្គមស៊ីវិល សហជីព និងសមាគមឯករាជ្យរៀបចំធ្វើអ្វីមួយនៅរាជធានីភ្នំពេញ។ លោកបន្ថែមថា សាលាក្រុងភ្នំពេញមិនដែលមើលឃើញសកម្មភាពហែអ្នកតានៅទីក្រុងភ្នំពេញថាធ្វើឲ្យខូចសណ្តាប់ធ្នាប់សាធារណៈឡើយ។
សូមជម្រាបជូនថាតាមលិខិតជូនដំណឹងរបស់ក្រុម សង្គមស៊ីវិល សហជីព និងសមាគមទៅកាន់សាលាក្រុងភ្នំពេញ ការរៀបចំប្រារព្ធពិធីអបអរសាទរខួបលើកទី៧០ នៃទិវាសិទ្ធិមនុស្សអន្តរជាតិ នាថ្ងៃទី១០ ខែធ្នូ នឹងធ្វើឡើងចាប់ពីម៉ោង៧ព្រឹក រហូតដល់ម៉ោង១២ថ្ងៃត្រង់ ដោយមានអ្នកចូលរួមប្រមាណ១ពាន់នាក់ នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC រួចដង្ហែទៅទីលានប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ