ពលរដ្ឋអំពាវនាវឲ្យតំណាងរដ្ឋាភិបាលចូលរួមពិភាក្សានឹងស្តាប់ក្តីកង្វល់ក្នុងឱកាសសមាជប្រជាជនកម្ពុជាលើកទី៥
តំណាងប្រជាពលរដ្ឋដែលចូលរួមរៀបចំសមាជប្រជាជនកម្ពុជាលើកទី៥ ដែលនឹងត្រូវធ្វើឡើងនៅថ្ងៃទី ១៥ និងទី១៦ វិច្ឆិកាខាងមុខនេះ បានអំពាវនាវ និងសំណូមពរឲ្យតំណាងរដ្ឋាភិបាលចូលរួមស្តាប់ និងឆ្លើយតបរាល់បញ្ហារបស់ប្រជាពលរដ្ឋដែលបានលើកឡើងនៅក្នុងឱកាសនោះ។ ជាការឆ្លើយតប ដែលតំណាងប្រជាពលរដ្ឋយល់ឃើញថា ជាមធ្យោបាយតែមួយគត់ដើម្បីផ្តល់ទំនុកចិត្ត និងទាក់ទាញប្រជាប្រិយភាពពីប្រជាពលរដ្ឋនៅអាណត្តិក្រោយ។
ចុះផ្សាយនៅថ្ងៃ៖
ស្តាប់ - ០២:៥៣
ក្នុងសន្និសីទសារព័ត៌មាននៅផ្ទះមេត្តាហៅស៍ នៅរសៀលថ្ងៃទី ១២ វិច្ឆិកានេះ តំណាងប្រជាពលរដ្ឋមកពីបណ្តាញពហុវិស័យបានអំពាវនាវឲ្យតំណាងរដ្ឋាភិបាលចូលរួមនៅក្នុងសមាជប្រជាជនកម្ពុជាលើកទី៥ ដែលនឹងត្រូវធ្វើឡើងនៅថ្ងៃទី១៥ និងទី១៦ វិច្ឆិកា ខាងមុខនេះ ក្រោមប្រធានបទ «សមាហរណកម្មអាស៊ាន៖កិច្ចសន្ទនារវាងរាស្ត្រ និងរដ្ឋដើម្បីទទួលបានដំណោះស្រាយរួម»។
លោកកន សុខុម តំណាងមកពីសិល្បៈសហគមន៍នៃសមាគមកសិករឯករាជ្យដើម្បីអភិវឌ្ឍន៍សហគមន៍ បានលើកឡើងនៅក្នុងសន្និសីទកាសែតថា សមាជប្រជាជនកម្ពុជាត្រូវបានរៀបចំឡើងដើម្បីបង្ហាញពីក្តីកង្វល់របស់ប្រជាពលរដ្ឋដែលរងគ្រោះពិតប្រាកដ ទៅកាន់មន្ត្រីរដ្ឋាភិបាល ដើម្បីទទួលបានដំណោះស្រាយ។ លោកបានបន្តថា វត្តមានរបស់មន្ត្រីរដ្ឋាភិបាលពិតជាមានសារៈសំខាន់ខ្លាំងណាស់នៅក្នុងកម្មវិធីនៅថ្ងៃទី ១៦ វិច្ឆិកាខាងមុខនៅឯទីលានប្រជាធិបតេយ្យ ព្រោះជាពេលមួយដែលមន្ត្រីរដ្ឋាភិបាលបង្ហាញពីភាពយកចិត្តទុកដាក់ចំពោះពលរដ្ឋរបស់ខ្លួន ហើយក៏ដើម្បីបង្កើតទំនុកចិត្តនិងទាក់ទាញប្រជាប្រិយភាពពីប្រជាពលរដ្ឋបានផងដែរ។
ក្រុមការងាររបស់បណ្តាញពហុវិស័យបានដាក់លិខិតអញ្ជើញតំណាងមន្ត្រីរដ្ឋាភិបាលឲ្យចូលរួមនៅក្នុងសមាជប្រជាជនលើកទី៥ ទៅកាន់ក្រសួងចំនួន១០ ចាប់តាំងពីថ្ងៃទី ៥ វិច្ឆិកាមក។ ប៉ុន្តែរហូតមកដល់នឹងថ្ងៃនេះមានតែក្រសួងពីរទេ ដែលបានឆ្លើយតប ហើយការឆ្លើយតបនោះគឺបញ្ជាក់ថា រដ្ឋមន្ត្រីក្រសួងទាំងពីរនោះមិនអាចអញ្ជើញចូលរួមបាននោះទេ ដោយជាប់បំពេញបេសសកម្មទៅក្រៅប្រទេស។ ក្រសួងទាំងពីរនោះមានក្រសួងបរិស្ថាន និងក្រសួងកិច្ចការនារី។ ដោយឡែកក្រសួង៨ផ្សេងទៀត ដែលមានក្រសួងមហាផ្ទៃ ក្រសួងសុខាភិបាល ក្រសួងអប់រំ យុវជននិងកីឡា ក្រសួងការងារនិងបណ្តុះបណ្តាលវិជ្ជាជីវៈ ក្រសួងសង្គមកិច្ច និងអតីតយុទ្ធជន ក្រសួងដែនដី នគរូបនីយកម្មនិងសំណង់ ក្រសួងកសិកម្ម រុក្ខាប្រមាញ់ និងនេសាទ និងក្រសួងអភិវឌ្ឍន៍ជនបទនៅមិនទាន់បានឆ្លើយតបនៅឡើយនោះទេ។
លោកកន សុខុម បានបញ្ជាក់ថា ប្រសិនបើមន្ត្រីរដ្ឋាភិបាលមិនចូលរួមនៅក្នុងសមាជនៅថ្ងៃទី ១៦ វិច្ឆិកានោះទេ តំណាងប្រជាពលរដ្ឋនឹងនាំគ្នាទៅដាក់ញត្តិដល់ក្រសួងនោះផ្ទាល់តែម្តង ដើម្បីទទួលបានដំណោះស្រាយជាបន្តទៀត។
គួរជម្រាបជូនផងដែរថា លោកស្រីយិន ប៉ិចជាសកម្មជននិងតំណាងបណ្តាញភ្នំគុកនៅខេត្តកំពង់ឆ្នាំង បានបង្ហាញថា ការធ្វើសមាជប្រជាជនពីមួយឆ្នាំទៅមួយឆ្នាំ ឃើញថាទទួលបានលទ្ធផលល្អ ព្រោះមានអាជ្ញាធរនៅក្នុងតំបន់ខ្លះបានចូលរួមសហការស្តាប់ពីទុក្ខលំបាករបស់ប្រជាពលរដ្ឋ ហើយក៏បានផ្តល់ដំណោះស្រាយជាទីគាប់ប្រសើរ។ លោកស្រីបានលើកឧទាហរណ៍ទាក់ទងនឹងការកាត់ដីសម្បទានសេដ្ឋកិច្ចពីក្រុមហ៊ុនឯកជនមួយចំនួនជូនដល់ប្រជាពលរដ្ឋជាដើម។
ក្រុមបណ្តាញពហុវិស័យបានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា នៅរាល់កម្មវិធី បណ្តាញពហុវិស័យសង្កត់ធ្ងន់លើគោលជំហរ និងហេតុផលរបស់ប្រជាពលរដ្ឋសម្រាប់ការចូលរួមក្នុងសកម្មភាពប្រជាជនពិតប្រាកដ។ បណ្តាញពហុវិស័យមិនប្រឆាំងនិងរដ្ឋាភិបាល មិនចូលរួមនិងគណបក្សនយោបាយណាមួយ ហើយប្រកាន់ខ្ជាប់គោលការណ៍សន្តិភាព និងអហិង្សា។ គោលដៅសំខាន់របស់ក្រុមនេះគឺលើកឡើងពីបញ្ហារបស់ប្រជាជន និងការទាមទារដំណោះស្រាយពិតប្រាកដក្នុងភាពយូរអង្វែង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ