កម្ពុជាព្រមានក្រុមហ៊ុនអាមេរិកាំង Chevron ចំពោះការរុករកប្រេង
រដ្ឋាភិបាលកម្ពុជាព្រមានលុបកិច្ចសន្យារុករកប្រេងជាមួយក្រុមហ៊ុន អាមេរិក Chevron ប្រសិនបើក្រុមហ៊ុនដ៏ធំមួយនេះ មិនអាចផលិតប្រេង នៅក្នុងដែនសមុទ្រកម្ពុជា នៅត្រឹមឆ្នាំ២០១២។ តំណាងក្រុមហ៊ុន Chevron បានសន្យាថា នឹងខិតខំប្រឹងប្រែងធ្វើតាមការទាមទាររបស់រដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
កាលពីថ្ងៃអង្គារម្សិលម្ង៉ៃ លោកនាយករដ្ឋមន្ត្រីហ៊ុន សែន បានព្រមានជាសាធារណៈថា ក្រុមហ៊ុន Chevron ដែលជាក្រុមហ៊ុនដ៏ធំរបស់អាមេរិកអាចនឹងបាត់បង់សិទ្ធិរុករកប្រេង នៅតំបន់ឆ្នេរសមុទ្រកម្ពុជា ប្រសិនបើ ក្រុមហ៊ុននេះមិនអាចផលិតប្រេង នៅដំណាច់ឆ្នាំ២០១២។
ក្នុងពិធីបិទសន្និបាតក្រសួងកសិកម្ម លោកប្រមុខរដ្ឋាភិបាលហ៊ុន សែនបានលើកឡើងថា រដ្ឋាភិបាលកម្ពុជាបានកំណត់ឲ្យក្រុមហ៊ុន Chevron ផលិតប្រេងឲ្យបាននៅដំណាច់ឆ្នាំ២០១២ បើមិនដូច្នេះទេ រដ្ឋាភិបាលកម្ពុជានឹងលុបចោលកិច្ចសន្យាជាមួយក្រុមហ៊ុនអាមេរិកមួយ នេះ។
ចំពោះការព្រមានរបស់ប្រមុខរដ្ឋាភិបាលកម្ពុជាខាងលើ ត្រូវបានតំណាងក្រុមហ៊ុន Chevron អះអាងថា ក្រុមហ៊ុននឹងប្រឹងប្រែងធ្វើតាមការចង់បានរបស់រដ្ឋាភិបាល ដើម្បីផលិតប្រេងនៅប្លុក Aឲ្យបានឆាប់តាមដែលអាចធ្វើទៅបាន។
រដ្ឋាភិបាល កម្ពុជាបានចុះកិច្ចព្រមព្រៀងសម្រាប់ការរុករកប្រេងនៅប្លុក A កាលពីឆ្នាំ២០០២-២០០៣ ដើម្បីផ្តល់សិទ្ធិដល់ក្រុមហ៊ុនអាមេរិក Chevron និងក្រុមហ៊ុនដៃគូមួយចំនួនទៀត។ ប្លុក A ជាតំបន់ដែលអាចផលិតប្រេងបានច្រើនជាងគេ ក្នុងចំណោមតំបន់មានប្រេងចំនួន ៦ប្លុក នៅដែនសមុទ្រកម្ពុជា។
អាជ្ញាធរ ជាតិប្រេងកាតកម្ពុជាបានប្រកាស កាលពីពេលថ្មីៗនេះថា បន្ទាប់ពីការខួងអណ្តូងសាកល្បង កាលពីឆ្នាំ២០០៧ ក្រុមហ៊ុនអាមេរិក Chevron បានព្យាករណ៍ថា នៅប្លុក A អាចមានប្រេងឆៅពី ៤០០ ទៅ ៧០០ លានធុង។
យ៉ាងហោចណាស់ មានក្រុមហ៊ុនជាង ១០ មកពីប្រទេសអាមេរិក ជប៉ុន ចិន កូរ៉េ បារាំង ម៉ាឡេស៊ី ឥណ្ឌូនេស៊ី សឹង្ហបូរី និងប្រទេសថៃបានចុះកិច្ចព្រមព្រៀងវិនិយោគរុករកប្រេងក្នុងដែន សមុទ្រកម្ពុជាទាំង ៦ប្លុក។
ការប៉ាន់ស្មានបានបង្ហាញថា ក្នុងបាតសមុទ្រកម្ពុជាអាចទាញយកប្រេងឆៅ រហូតដល់២ ពាន់លានធុង ដើម្បីអភិវឌ្ឍន៍សេដ្ឋកិច្ចកម្ពុជាឲ្យចេញផុតពីភាពក្រីក្រ និងបញ្ឈប់ការពឹងផ្អែកប្រាក់ជំនួយបរទេស។ ក៏ប៉ុន្តែ ព័ត៌មាននៃដំណើរការរុករកប្រេង និងឧស្ម័ននៅកម្ពុជាមិនត្រូវបានបើកទូលាយប៉ុន្មានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ