សហព័ន្ធនិស្សិតបញ្ញវន្តកម្ពុជាគ្រោងធ្វើបាតុកម្មប្រឆាំងស្ថានទូតវៀតណាមនៅកម្ពុជា
សហព័ន្ធនិស្សិតបញ្ញវន្តកម្ពុជាកាលពីថ្ងៃពុធម្សិលមិញ បានប្រកាសថានឹងធ្វើបាតុកម្មអហិង្សាមួយនៅមុខស្ថានទូតវៀតណាមប្រចាំនៅកម្ពុជានៅថ្ងៃទី ០៨ កក្កដា ខាងមុខនេះ ដើម្បីទាមទារឲ្យអ្នកនាំពាក្យស្ថានទូតទទួលស្គាល់ការពិតនៃប្រវត្តិសាស្ត្រនៃការបាត់បង់ទឹកដីកម្ពុជាក្រោម។ កាលពីម្សិលមិញ សហព័ន្ធនេះ ក៏បានជូនដំណឹងអំពីគម្រោងធ្វើបាតុកម្មនេះទៅកាន់សាលារាជធានីភ្នំពេញផងដែរ។ ប៉ុន្តែសាលាធានីភ្នំពេញមិនទាន់សម្រេចបែបណានៅឡើយនោះទេ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
នេះជាគម្រោងធ្វើបាតុកម្ម ប្រឆាំងស្ថានទូតវៀតណាមប្រចាំនៅកម្ពុជា ជាលើកទីពីរហើយជុំវិញប្រវត្តិសាស្ត្រនៃការបាត់បង់ទឹកដីកម្ពុជាក្រោមទៅឲ្យវៀតណាម។ក្រុមអ្នកតវ៉ាបានព្រមាណថា ដរាបណា អ្នកនាំពាក្យស្ថានទូតវៀតណាមប្រចាំនៅកម្ពុជាមិនសូមទោសចំពោះការលើកឡើងរបស់ខ្លួននោះទេ ដរាបនោះការធ្វើបាតុកម្មប្រឆាំងវៀតណាមលើទឹកដីកម្ពុជា នឹងអាចកើតឡើងនៅពេលខាងមុខ។
លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា បានថ្លែងប្រាប់វិទ្យុបារាំងអន្តរជាតិនៅថ្ងៃ ទី ០៣ កក្កដា ថា សហព័ន្ធនិស្សិតបញ្ញវន្តកម្ពុជាគ្រោងជួបជុំគ្នាប្រមាណ១០០ នាក់ នៅពីមុខស្ថានទូតវៀតណាម ដើម្បីតវ៉ាទាមទារអ្នកនាំពាក្យស្ថានទូតវៀតណាមទទួលស្គាល់ការពិតនៃប្រវត្តិសាស្ត្រនៃការបាត់បង់ទឹកដីកម្ពុជាក្រោម។ ប្រធានសហព័ន្ធរូបនេះ លើកឡើងថា គម្រោងធ្វើបាតុកម្មខាងមុខនេះ នឹងធ្វើឡើងដោយអហិង្សាហើយអាចនឹងមានការលើកបដាតវ៉ាផងដែរ។
រឿងរាវដែលនាំឲ្យកើតមានគម្រោងធ្វើបាតុកម្មប្រឆាំងស្ថានទូតវៀតណាមប្រចាំនៅកម្ពុជា ជាបន្តបន្ទាប់បែបនេះ គឺ ក្រោយពីអ្នកពាក្យស្ថានទូតវៀតណាមបានប្រាប់ប្រព័ន្ធផ្សព្វផ្សាយនាពេលកន្លងមកថា ទឹកដីកម្ពុជាក្រោមមិនមែនបារាំងកាត់ឲ្យវៀតណាមនោះទេ តែជាទឹកដីវៀតណាមតាំងពីយូរយារណាស់មកហើយ។
លោក ម៉ៅ ពិសេស បានហៅការលើកឡើងនេះថា ជាការបំផ្លើសប្រវត្តិសាស្ត្រពិត និងមើលងាយប្រជាពលរដ្ឋ ជាពិសេសនិស្សិតបញ្ញវន្តខ្មែរនាពេលបច្ចប្បន្ន។
កាលពីថ្ងៃពុធ សហព័ន្ធនិស្សិតបញ្ញវន្តកម្ពុជាបានអំពាវនាវឲ្យ សិស្ស និស្សិត បញ្ញវន្ត និងយុវជនខ្មែរទាំងអស់ចូលរួមធ្វើបាតុកម្មអហិង្សានៅទី ថ្ងៃទី ០៨ កក្កដាខាងមុខនេះនៅពីមុខស្ថានទូតវៀតណាមប្រចាំនៅកម្ពុជា។ កាលពីថ្ងៃពុធដែរ សហព័ន្ធនេះក៏បានជូនដំណឹងទៅកាន់សាលារាជធានីភ្នំពេញអំពីគម្រោងធ្វើបាតុកម្មនេះ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់ប្រាប់វិទ្យុបារាំងអន្តរជាតិ ថាសាលារាជធានីភ្នំពេញបានទទួលលិខិតជូនដំណឹងនេះហើយ ប៉ុន្តែមិនទាន់សម្រេចយ៉ាងណានៅឡើយទេ គឺកំពុងតែពិចារណា និង ពិនិត្យលើលិខិតនេះ។
សូមរម្លឹកឡើងវិញថា សមាគមខ្មែរកម្ពុជាក្រោម ក៏បានចេញប្រតិកម្មជាបន្តបន្ទាប់ផងដែរចំពោះការលើកឡើងរបស់អ្នកនាំពាក្យស្ថានទូតវៀតណាមប្រចាំនៅកម្ពុជានេះ។ ហើយកាលពីថ្ងៃអង្គារ សមាគមខ្មែរកម្ពុជាក្រោមបានចេញសេចក្តីជូនដំណឹងមួយដោយគ្រោងនឹងរៀបចំវេទិកាសាធារណៈមួយស្តីពីទឹកដីកម្ពុជាក្រោមនៅថ្ងៃទី ០៦ កក្កដាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ