សកម្មជនបរិស្ថានទាមទារឱ្យរដ្ឋាភិបាលការពារព្រៃឈើ
ប្រជាពលរដ្ឋប្រមាណជា៣០០នាក់ នៅព្រឹកថ្ងៃព្រហស្បតិ៍ទី៥ មិថុនានេះ បានប្រមូលផ្តុំគ្នានៅលើកំណាត់ផ្លូវជិតស្ថានទូតរុស្ស៊ី ដើម្បីសម្តែងពីទុក្ខកង្វល់ ក្នុងការកាប់បំផ្លាញព្រៃឈើ និងសុំអន្តរាគមន៍ពីរដ្ឋាភិបាលដើម្បីការពារព្រៃឈើ។ ដោយឡែក រដ្ឋាភិបាលក៏បានប្តេជ្ញារឹតបន្តឹងការអនុវត្តន៍ច្បាប់ ប្រឆាំងការកាប់បំផ្លាញព្រៃឈើផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
នៅក្នុងថ្ងៃទិវាបរិស្ថាននេះ សកម្មជនបរិស្ថាន បានសុំកិច្ចអន្តរាគមន៍ចំនួន៥ចំណុចដល់រដ្ឋាភិបាលកម្ពុជា ដើម្បីទប់ស្កាត់សកម្មភាពកាប់បំផ្លាញព្រៃឈើ និងធនធានធម្មជាតិ។ សំណើទាំងនោះរួមមាន ការពិនិត្យទៅលើក្រុមហ៊ុនដីសម្បទានសេដ្ឋកិច្ច សម្បទានរ៉ែនៅតំបន់ព្រៃឡង់ ការបញ្ឈប់សកម្មភាពរាល់បទល្មើសព្រៃឈើដែលកំពុងកើតមាន និងការស្នើលុបចោលគម្រោងសាងសង់ទំបន់វារីអគ្គីសនី ស្ទឹងជាយអារែង និងទំនប់សេសានក្រោម២ រួមទាំងការបញ្ឈប់ការគម្រាមកំហែងគ្រប់រូបភាពមកលើសកម្មជនការពារបរិស្ថានជាដើម។
ក្នុងការជួបជុំប្រមូលផ្តុំនៅជិតស្ថានទូតរុស្ស៊ីនៅព្រឹកនេះ លោក ទឹម ម៉ាឡៃ ប្រធានបណ្តាញយុវជនកម្ពុជាដែលជាអ្នករៀបចំការប្រមូលផ្តុំនេះ បានហៅការជួបជុំសកម្មជនបរិស្ថាននេះ គឺជាសារមួយដាស់តឿនដល់មន្ត្រីរដ្ឋាភិបាលឱ្យគិតគូរពីការទាមទាររបស់ប្រជាពលរដ្ឋ។ ក្នុងសេចក្តីថ្លែងការណ៍រួមដែលមានការគាំទ្រពីសហគម និងសង្គមស៊ីវិល ប្រមាណជិត៣០ស្ថាប័ន បណ្តាញយុវជនដែលជាអ្នករៀបចំការជួបជុំនេះ បានលើកឡើងថាបើទោះបីជារដ្ឋាភិបាលបានដាក់ចេញនូវច្បាប់ព្រៃឈើ និងច្បាប់ស្តីពីការការពារបរិស្ថានក៏ដោយ ប៉ុន្តែសកម្មភាពការកាប់បំផ្លាញព្រៃឈើខុសច្បាប់នៅតែបន្តកើតមាន ក្រោមរូបភាពដីសម្បទានសេដ្ឋកិច្ច សម្បទានព្រៃឈើ សម្បទានរ៉ែ និងទំនប់វារីអគ្គិសនី។
សកម្មជនបរិស្ថានដែលមានសំលៀកបំពាក់អាវ ពណ៌បៃតង បានស្នើយ៉ាងទទួចដល់រដ្ឋាភិបាលកម្ពុជាឱ្យចាត់វិធានការជាបន្ទាន់ ប្រសិនបើរដ្ឋាភិបាលមិនបានចាត់វិធានការជាបន្ទាន់នោះទេ ព្រៃឈើ និងធនធានធម្មជាតិ រួមសត្វព្រៃនៅកម្ពុជា នឹងឈានទៅដល់ការវិនាសសាបសូន្យ។ ហើយបញ្ហានេះ នឹងជះឥទ្ធិពលយ៉ាងខ្លាំងដល់ជីវភាពរស់នៅរបស់ប្រជាជនកម្ពុជាដែលនៅអាស្រ័យនឹងធម្មជាតិទាំងនោះ។
ថ្លែងដើម្បីឧទ្ទិសដល់ថ្ងៃទិវាបរិស្ថានពិភពលោកលើកទី៤២នេះ រដ្ឋមន្ត្រីក្រសួងបរិស្ថានលោក សាយ សំអាល់ បានលើកឡើងថា ក្រសួងបាននិងកំពុងសហការគ្នា ចាត់វិធានការទប់ស្កាត់បទល្មើសព្រៃឈើគ្រប់ប្រភេទនិងរាល់សកម្មភាពបំផ្លិចបំផ្លាញព្រៃឈើ រួមទាំងការទន្ទ្រានកាន់កាប់ដីដោយខុសច្បាប់ផងដែរ។ ក្រៅពីនេះ លោករដ្ឋមន្ត្រីក៏បានព្រមានមន្ត្រីក្រោមឱវាទរបស់ខ្លួនត្រូវតែជៀសវាងឱ្យផុតពីការពាក់ព័ន្ធបទល្មើសបំផ្លិចបំផ្លាញព្រៃឈើ និងការទន្ទ្រានកាន់កាប់ដីធ្លី។
សូមបញ្ជាក់ថា ការជួបជុំគ្នានៅព្រឹកថ្ងៃព្រហស្បតិ៍នេះត្រូវបានរំសាយទៅវិញនៅម៉ោងប្រមាណជា១១ព្រឹកបន្ទាប់ពីសកម្មជនបរិស្ថានទាំងអស់បានក៏បានដាក់ញត្តិចំនួន៤ផ្សេងគ្នាទៅកាន់ក្រសួងបរិស្ថាន ក្រសួងកសិកម្ម ស្ថានទូតចិន និងស្ថានទូតវៀតណាម។ ហើយការជួបជុំនេះ មិនមានការប៉ះទង្គិចគ្នានោះទេ បើទោះបីជាមានការរាំងមិនឱ្យដង្ហែរក្បួន ពីក្រុមអាជ្ញាធរមូលដ្ឋាន និងក្រុមសន្តិសុខក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ