លោក សុខ អាន៖ ការកែលម្អជីវភាពរបស់គ្រូបង្រៀន គឺបង្កើនប្រសិទ្ធភាពអប់រំ
ក្នុងពិធីបើកសន្និបាតបូកសរុបការងារ និងលើកទិសដៅការងាររបស់ក្រសួងអប់រំ យុវជន និងកីឡា នៅថ្ងៃពុធនេះ លោក ឧបនាយករដ្ឋមន្ត្រីសុខ អាន បានថ្លែងថា ដើម្បីដោះស្រាយបញ្ហាប្រឈមនៃគុណភាពអប់រំនៅកម្ពុជាទាំងមូលនោះ កំណែទម្រង់ជីវភាពគ្រូបង្រៀនគឺជាគន្លឹះសំខាន់មួយ។ ក្រៅពីបញ្ហាកែលម្អជីវភាពគ្រូបង្រៀន នៅមានបញ្ហាផ្សេងៗទៀតដែលសុខ អានបានលើកឡើង។ ប្រធានសមាគមគ្រូបង្រៀនកម្ពុជាឯករាជ្យ បានស្វាគមន៍ចំពោះការលើកឡើងរបស់រដ្ឋាភិបាល ប៉ុន្តែទាមទារឱ្យមានការអនុវត្តពិតប្រាកដ។
ចុះផ្សាយនៅថ្ងៃ៖
ស្តាប់ - ០១:៥៧
“គួរយកចិត្តទុកដាក់លើការកែលម្អជីវភាពរស់នៅរបស់លោកគ្រូ អ្នកគ្រូនិង បុគ្គលិកសិក្សាទាំងអស់ ដើម្បីបង្កើនប្រសិទ្ធភាពការងារអប់រំឱ្យកាន់តែប្រសើរថែមទៀត” នេះជាការលើកឡើងរបស់លោក សុខ អានឧបនាយករដ្ឋមន្ត្រី ដែលបានថ្លែងក្នុងសន្និបាតបូកសរុបការងាររបស់ក្រសួងអប់រំនៅថ្ងៃពុធនេះ។
ថ្លែងទៅកាន់មនុស្សជាង ១១ម៉ឺននាក់ក្នុងអង្គសន្និបាតរបស់ក្រសួងអប់រំ លោក សុខ អាន បានបន្ថែមថា ដើម្បីដោះស្រាយបញ្ហាប្រឈមពាក់ព័ន្ធនិងវិស័យអប់រំនៅកម្ពុជា មានចំណុចចំនួន៩ផ្សេងទៀត ក្រៅពីបញ្ហាកំណែលម្អជីវភាពគ្រូបង្រៀន។ បញ្ហាទាំង៩នោះរូមមាន ការផ្តោតលើគុណភាពអប់រំជាចម្បង ការលើកកម្ពស់ការស្រាវជ្រាវដោយផ្សារភ្ជាប់ការអនុវត្តជាក់ស្តែង ការលុបបំបាត់អនក្ខរភាព ការផ្តល់ជំនាញដល់អ្នកគ្មានឱ្យកាសសិក្សា កំណែទម្រង់អភិបាលកិច្ចក្នុងវិស័យអប់រំ និងការកែលម្អកម្មវិធីសិក្សា រួមទាំងការកាត់បន្ថយរវាងការផ្គត់ផ្គង់ និងតម្រូវការជំនាញក្នុងទីផ្សារជាដើម។
ទាក់ទងនងបញ្ហាកម្រិតជីវភាពរបស់បុគ្គលិកអប់រំនៃដែរ លោក ហង់ ជួនណារ៉ុន រដ្ឋមន្ត្រីក្រសួងអប់រំ ដែលធ្លាប់បានប្រាប់វិទ្យុបារាំង កាលពីពេលកន្លងទៅ ក៏បានទទួលស្គាល់ដែរថា ការលើកកម្ពស់ជីវភាពគ្រូបង្រៀន គឺជាវិស័យមួយក្នុងចំណោមយុទ្ធសាស្ត្រកំណែទម្រង់របស់ក្រសួងអប់រំ។
សូមបញ្ជាក់ថា បញ្ហាកំរិតជីវភាពរបស់គ្រូបង្រៀនដែលនៅតែមានកម្រិតទាប និងបញ្ហាគុណភាពវិស័យអប់រំនៅកម្ពុជាទាំងមូល ត្រូវបានសាធារណៈមតិគេរិះគន់រដ្ឋាភិបាលមិនតិចនោះទេ។ ហើយបញ្ហាជីវភាពគ្រូបង្រៀននេះ ក៏បានក្លាយជាចំណុចរស៊ើបមួយនៃចំណុចយុទ្ធសាស្ត្រនៃគោលនយោបាយរបស់គណបក្សសង្គ្រោះជាតិក្នុងការបោះឆ្នោតអាណត្តិទី៥កន្លងទៅនេះផងដែរ។
បើទោះបីជាបែបណាក៏ដោយ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានស្វាគមន៍ចំពោះកាលើកឡើងរបស់មន្ត្រីជាន់ខ្ពស់របស់រដ្ឋាភិបាល។ សម្រាប់លោក រ៉ុង ឈុន បញ្ហាកម្រិតជីវភាពរបស់គ្រូវបង្រៀននេះ គឺសមាគមគ្រូបង្រៀនបានលើកឡើងតាំងពីយូរណាស់មកហើយ។ បើតាម លោករ៉ុង ឈុនដដែល ការលើកឡើងស្តីពីបញ្ហាកម្រិតជីវភាពរបស់គ្រូបង្រៀនឱ្យបានសមរម្យនោះ គឺត្រូវឱ្យរដ្ឋាភិបាលដោះស្រាយជាក់ស្តែង ជាជាងលើក្រដាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ