ក្រសួងពាក់ព័ន្ធស្រាក់ដៃគ្នាធ្វើឲ្យដំណើរការប្រឡងបាក់ឌុបថ្ងៃស្អែកប្រព្រឹត្តិទៅដោយរលូន
ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ឬ ហៅថាការប្រឡងបាក់ឌុប ប្រចាំឆ្នាំ ២០១៩ នឹងប្រព្រឹត្តិទៅ នៅថ្ងៃទី ១៩ និងថ្ងៃទី ២០ខែសីហាស្អែកនេះ។ មិនខុសពីប៉ុន្មានឆ្នាំចុងក្រោយនេះ ក្រសួងអប់រំ យុវជន និងកីឡា ប្តេជ្ញាថា នៅតែបន្តរឹតបន្តឹងការប្រឡង ដើម្បីទទួលយកគុណភាពពិតប្រាកដពីសិស្សានុសិស្ស។ ចំណែក ក្រសួងទេសចរណ៍ បានព្យាយាមអំពាវនាវកុំឲ្យមានការតម្លើងថ្លៃស្នាក់នៅ ក្នុងអំឡុងពេលនេះ ដើម្បីធ្វើយ៉ាងណាឲ្យដំណើរការប្រឡងបាក់ឌុប ប្រព្រឹត្តិទៅដោយរលូន។
ចុះផ្សាយនៅថ្ងៃ៖
តាមការបង្ហាញរបស់ក្រសួងអប់រំយុវជន និងកីឡា គឺមួយថ្ងៃមុនការប្រឡងបាក់ឌុប ឈានចូលមកដល់ ក្រសួងបានរៀបចំ ឲ្យគណៈមេប្រយោគ រួមនឹងភាគីពាក់ព័ន្ធ ដូចជាគណៈកម្មការអប្បមាទ ជំនួយការអប្បមាទ ប្រធាន និងអនុប្រធានមណ្ឌល ចុះពិនិត្យស្ថានភាពទូទៅ នៅតាមមណ្ឌលប្រឡង ដោយផ្ដោតសំខាន់ ទៅលើបរិវេណមណ្ឌលប្រឡង ឧបករណ៍បំពងសំឡេង អាគារនៅតាមមណ្ឌលប្រឡង និងស្ថានភាពនៃបន្ទប់ប្រឡងនីមួយៗ ដើម្បីធានាបានថា ដំណើរការប្រឡងបាក់ឌុប ប្រព្រឹត្តិទៅដោយភាពរលូន។
ក្រៅពីនេះ តាមមណ្ឌលខ្លះ ក៏មានសកម្មភាពចុះបាញ់ថ្នាំមូស ការពារកុំឲ្យមានបញ្ហាសុខភាពកើតឡើងដល់សិស្សានុសិស្សពេលកំពុងប្រឡងដែរ។ ចំណែកសិស្សានុសិស្សវិញ នៅថ្ងៃអាទិត្យនេះ គេសង្កេតឃើញថា បាននាំគ្នាសម្រុកទៅកាន់កន្លែងសក្ការៈបូជា ដើម្បីថ្វាយទៀនធូប និងផ្លែឈើ បន់ស្រន់ សូមឲ្យពួកគេប្រឡងជាប់។
មិនខុសពីរាល់ឆ្នាំ ក្រសួងអប់រំ បានអះអាងថា ការប្រឡងបាក់ឌុប នៅឆ្នាំ ២០១៩ ក៏មានការរឹតបន្តឹងដូចពេលកន្លងទៅដែរ ខណៈចំនួនបេក្ខជន និងមណ្ឌលប្រឡង មានការកើនឡើង។ ជាមួយគ្នានោះ ក្រសួងថែមទាំងបានសំណូមពរឲ្យម្ចាស់អាជីវកម្មថតចំលង បិទអាជីវកម្មបណ្តោះអាសន្នរយៈពេល ២ថ្ងៃនៃថ្ងៃប្រឡង ដើម្បីការពារបាតុភូតបែកធ្លាយវិញ្ញាសានានា។
ចំណែក ក្រសួងទេសចរណ៍វិញ ក៏បានប្រកាសអំពាវនាវដល់ម្ចាស់ផ្ទះសំណាក់ សណ្ឋាគារ និងអាហារដ្ឋាននានា កុំតម្លើងថ្លៃ និងត្រូវបម្រើរសេវាកម្មឲ្យបានល្អ ក្នុងអំឡុងពេលសិស្សប្រឡងបាក់ឌុបនេះផងដែរ។
សូមជម្រាបជូនថា ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ថ្ងៃទី១៩ និង២០ ខែសីហា ឆ្នាំ២០១៩នេះ មានមណ្ឌលប្រឡង សរុប២០២មណ្ឌល ក្នុងនោះ ថ្នាក់វិទ្យាសាស្ត្រមាន ៧៥មណ្ឌល និងថ្នាក់វិទ្យាសាស្ត្រសង្គមមាន ១២៧មណ្ឌល ដែលសរុបមាន ៤ ៧២៥បន្ទប់ និងមានបេក្ខជនប្រឡងសរុបចំនួន ១១៧,០២៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ