លោក ញឹក ប៊ុនឆៃ៖ គណបក្សខ្មែររួបរួមជាតិ អាចនឹងរួមជាមួយហ្វ៊ុនស៊ិនប៉ិចនាខែមករា
គណបក្សខ្មែររួបរួមកំពុងតែរងចាំការរៀបចំរបស់គណបក្សហ៊្វុនស៊ិនប៉ិច ហើយគ្រោងនឹងធ្វើសមាជបញ្ចូលគ្នានៅខែមករាខាងមុខនេះ។ នេះបើតាមលោក ញឹក ប៊ុនឆៃ ប្រធានគណបក្សខ្មែររួបរួមជាតិ។ សមាជរួមគ្នារវាងគណបក្សទាំងពីរនឹងអាចធ្វើឡើង ក្រោយពីគណបក្សហ្វ៊ុនស៊ិនប៉ិចដោះស្រាយបញ្ហាផ្ទៃក្នុងរបស់ខ្លួនរួច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានអះអាងប្រាប់វិទ្យុបារាំងអន្តរជាតិនៅថ្ងៃទី២៩ ខែធ្នូនេះ ថាគោលការណ៍នៃការរួមបញ្ចូលគ្នារបស់គណបក្សលោក ជាមួយនឹងគណបក្សហ្វ៊ុនស៊ិនប៉ិចនៅតែរក្សាដដែល ប៉ុន្តែរងចាំគណបក្សហ៊្វុនស៊ិនប៉ិច ដែលកំពុងដោះស្រាយបញ្ហាតែងតាំងប្រធានស្តីទីគណបក្សនេះ។
គណបក្សខ្មែររួបរួមជាតិ របស់លោក ញឹក ប៊ុនឆៃ និងគណបក្សហ្វ៊ុនស៊ិនប៉ិច របស់សម្តេចក្រុមព្រះ នរោត្តម រណឫទ្ធិ បានប្រកាសធ្វើសមាជច្របាច់បញ្ចូលគ្នា នៅថ្ងៃទី២៣ ខែធ្នូ ឆ្នាំ២០១៩កន្លងទៅនេះ។ ប៉ុន្តែគម្រោងនេះ ត្រូវបានលុបចោលទៅវិញ ដោយសារបញ្ហាពីភាគីគណបក្សហ្វ៊ុនស៊ិនប៉ិច។ វិទ្យុបារាំងអន្តរជាតិមិនអាចសុំការបំភ្លឺពីគណបក្សហ៊្វុនស៊ិនប៉ិចបានទេនៅថ្ងៃទី២៩ ខែធ្នូនេះ។
លោក ញឹក ប៊ុនឆៃ ប្រធានគណបក្សខ្មែររួបរួមជាតិបានអះអាងថាសមាជច្របាច់បញ្ចូលគ្នាអាចនឹងធ្វើឡើងនៅក្នុងខែមករា ឆ្នាំ២០១៩ខាងមុខនេះ។ លោកបន្ថែមថា ពេលនេះគឺគណបក្សរបស់លោករងចាំតែការរៀបចំរបស់គណបក្សហ្វ៊ុនស៊ិនប៉ិចប៉ុណ្ណោះ ហើយបន្ទាប់មកគឺអាចកំណត់យកថ្ងៃជាក់លាក់ ដើម្បីរៀបចំសមាជរួមបញ្ចូលគ្នា ដោយសារតែការងារផ្សេងៗទាក់ទងនឹងគោលនយោបាយ លក្ខន្តិក និងបទបញ្ជាផ្ទៃក្នុង គឺបានប្រជុំឯកភាពគ្នារួចរាល់អស់ហើយ។
ជុំវិញបញ្ហាផ្ទៃក្នុងរបស់គណបក្សហ្វ៊ុនស៊ិនប៉ិចនេះ, លោក ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ កាលពីថ្ងៃទី១៩ ខែធ្នូ ឆ្នាំ២០១៩ បានស្នើឲ្យគណបក្សនេះពន្យារពេលធ្វើសមាជវិសាមញ្ញារបស់ខ្លួន ជាបណ្តោះអាសន្នសិន រហូតដល់ដោះស្រាយបញ្ហាផ្ទៃក្នុង របស់គណបក្សចប់សព្វគ្រប់ជាមុនសិន។ នេះបើតាមលិខិតមួយច្បាប់ជូន សម្តេចក្រុមព្រះនរោត្តម រណឫទ្ធិ ព្រះប្រធានគណបក្សហ៊្វុនស៊ិនប៉ិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ