បក្សប្រឆាំងមិនចាប់អារម្មណ៍នឹងនយោបាយលើកកម្ពស់ប្រាក់បៀវត្ស និងបញ្ហាដីធ្លីរបស់បក្សកាន់អំណាច
គណបក្សប្រជាជនកម្ពុជាដែលជាគណបក្សកាន់អំណាចបានផ្សាយគោលនយោបាយរបស់ខ្លួនចំនួន៩ចំណុចសម្រាប់ឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌដែលគ្រោងធ្វើនៅពាក់កណ្តាលខែឧសភានេះ។ ក្នុងចំណោមគោលនយោបាយចំនួន៩ចំណុច ក៏មានដែរបញ្ហាដំឡើងបៀវត្សចំនួន១លានរៀលដល់មន្ត្រីរាជការ និង ១៦០ដុល្លារដល់កម្មករ កម្មការិនី។ ប៉ុន្តែនៅឆ្នាំ២០១៨តែប៉ុណ្ណោះ។ គណបក្សសង្គ្រោះជាតិវិញ បានបញ្ជាក់ថាខ្លួនមិនចាប់អារម្មណ៍ចំពោះការបោះឆ្នោតបែបអសកលនេះឡើយ ប៉ុន្តែនឹងចូលរួមបោះឆ្នោតដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
គោលនយោបាយដំឡើងប្រាក់បៀវត្សមន្ត្រីរាជការ និងកងកម្លាំងប្រដាប់អាវុធ រួមទាំងកម្មករនិយោជិត និងគោលនយោបាយដោះស្រាយបញ្ហាដីធ្លី ដែលជាបញ្ហាដ៏រសើបក្នុងសង្គមកម្ពុជានាពេលបច្ចុប្បន្ន គឺជាចំណុចអាទិភាពពីរក្នុងចំណោមគោលនយោបាយទាំង៩របស់បក្សកាន់អំណាច ក្នុងការបោះឆ្នោតក្រុមប្រឹក្សារាជធានីខេត្ត ក្រុង ស្រុក ខណ្ឌក្នុងខែឧសភាខាងមុខនេះ។ នេះបើតាមសេចក្តីប្រកាសព័ត៌មានកាលពីថ្ងៃសៅរ៍ទី១២មេសា។
គណបក្សកាន់អំណាចដែលបានបាត់បង់ប្រជាប្រិយភាពខ្លាំងក្នុងការបោះឆ្នោតតំណាងរាស្ត្រនីតិកាលទី៥កន្លងទៅ បានបញ្ចេញគោលនយោបាយសន្យាដំឡើងប្រាក់ខែដល់មន្ត្រីរាជការ និងកងកម្លាំងប្រដាប់អាវុធយ៉ាងហោចណាស់១លានរៀលក្នុងមួយខែចាប់ពីឆ្នាំ២០១៨តទៅ។ ដោយឡែកបញ្ហាកម្មករកម្មការនីវិញ បក្សកាន់អំណាចក៏បានសន្យាបង្កើនប្រាក់ឈ្នួលយ៉ាងហោចណាស់១៦០ដុល្លារក្នុងមួយខែដែរចាប់ពីឆ្នាំ២០១៨តទៅ។
ចំណែកឯបញ្ហាដីធ្លីដែលជាជំងឺមហារីកនៅកម្ពុជានោះ គណបក្សប្រជាជនកម្ពុជា បានសន្យាការពារសិទ្ធកាន់កាប់ដីធ្លីស្របច្បាប់ដល់ម្ចាស់កម្មសិទ្ធ និងការដោះស្រាយទំនាស់ដីធ្លីប្រកបដោយតម្លាភាព និងការបែងចែកដីធ្លីដល់ជនពលី និងជនក្រីក្រជាដើម។
ក្រៅពីបញ្ហាដីធ្លី និងប្រាក់បៀវត្សរបស់មន្ត្រីរាជការ-កងកម្លាំង រួមទាំងកម្មករនោះ បញ្ហាអភិបាលកិច្ចល្អ និងសណ្តាប់ធ្នាប់សង្គម និងការអភិវឌ្ឍផ្សេងទៀត ក៏ជាចំណុចអាទិភាពរបស់បក្សកាន់អំណាចក្នុងការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌនេះផងដែរ។
មន្ត្រីជាន់ខ្ពស់នៃការិយាល័យនយោបាយ បក្សកាន់អំណាច លោកជាម យៀប បានថ្លែងថាជាមួយគោលនយោបាយទាំង៩ចំណុចនេះ គណបក្សប្រជាជនកម្ពុជានឹងអាចប្រមូលការគាំទ្ររបស់ខ្លួនមកវិញ បើទោះបីជាអាណត្តិទី៥កន្លងទៅ បក្សកាន់អំណាចយូរជាងគេនេះ បានបាត់បង់ប្រជាប្រិយភាពរបស់ខ្លួនក៏ដោយ។
ដោយឡែកមន្ត្រីជាន់ខ្ពស់គណបក្សសង្គ្រោះជាតិវិញ បានបញ្ជាក់ថា នៅមិនទាន់មានគោលនយោបាយសម្រាប់ការឃោសនាបោះឆ្នោតបែបអសកលនេះនោះទេ។ លោកអេង ឆៃអ៊ាង បានបញ្ជាក់ថា ការបោះឆ្នោតដែលគ្រោងធ្វើនៅថ្ងៃទី១៨ ឧសភា២០១៤នេះ មិនសំខាន់នោះទេ។ ប៉ុន្តែតំណាងរាស្ត្រមណ្ឌលកណ្តាលរូបនេះ បានបន្ថែមថា គណបក្សនឹងរៀបចំគោលនយោបាយដើម្បីផ្សព្វផ្សាយនៅថ្ងៃធ្វើយុទ្ធនាការបោះឆ្នោតចាប់ពីថ្ងៃទី២ឧសភាតទៅ។
សូមបញ្ជាក់ថា ក្នុងថ្ងៃបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌនៅខែឧសភាខាងមុខ មានគណបក្សចំនួន៥បានចូលរួម។ ការបោះឆ្នោតអសកលនេះមានតែក្រុមប្រឹក្សាឃុំ សង្កាត់សរុបចំនួន១១.៤៥៩នាក់តែប៉ុណ្ណោះដែលមានសិទ្ធិបោះឆ្នោតជ្រើស តាំងប្រធាន និងសមាជិកក្រុមប្រឹក្សាក្នុង រាជធានីខេត្តក្រុង ស្រុកខណ្ឌ។
បើទោះបីជាយ៉ាណាក៏ដោយ ការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលគ្រោងធ្វើនៅថ្ងៃទី១៨មេសាខាងមុខ គឺជាការបោះឆ្នោតដែលអាចទស្សទាយលទ្ធផលដឹងជាមុន ប៉ុន្តែលទ្ធផលនេះអាចមានការប្រែប្រួលប្រសិនបើសមាជិកគណបក្សណាមួយបានបោះឆ្នោតគាំទ្រគណបក្សគូរប្រកួតប្រជែងជំនួសវិញនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ