រដ្ឋាភិបាលនិងបក្សប្រឆាំងស្វែងរកប្រជាប្រិយភាព ខណៈនយោបាយនៅទ័លច្រក
ខណៈដែលជម្លោះនយោបាយរវាងបក្សកាន់អំណាច និងបក្សប្រឆាំងនៅតែមិនទាន់មានពន្លឺនោះ ទាំងរដ្ឋាភិបាលដែលដឹកនាំដោយគណបក្សប្រជាជនកម្ពុជា និងគណបក្សសង្គ្រោះជាតិ ចុះពង្រឹងតាមមូលដ្ឋានថ្នាក់ក្រោមជាតិ។ ជាការចុះពង្រឹងសមត្ថភាព និងការកៀងគរប្រជាប្រិយភាពរៀងៗខ្លួន។ គណបក្សសង្គ្រោះជាតិនឹងផ្តើមចុះទៅកាន់ខេត្តកំពង់ស្ពឺក្រោយលោកសម រង្ស៊ីវិលចូលក្នុងស្រុកវិញ។ ដោយឡែក រដ្ឋាភិបាលអះអាងថា ក្រុមការងារថ្នាក់ជាតិរបស់រដ្ឋាភិបាលបានត្រៀមរួចរាល់អស់ហើយសម្រាប់អង្កេត និងដោះស្រាយបញ្ហាពិតប្រាកដរបស់ពលរដ្ឋនៅមូលដ្ឋាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
រដ្ឋាភិបាលកម្ពុជាដែលដឹកនាំដោយគណបក្សប្រជាជនប្រកាសថា ត្រៀមរួចរាល់សម្រាប់ស្តារប្រជាប្រិយភាពឡើងវិញ ខណៈដែលគណបក្សសង្គ្រោះជាតិរបស់លោកសម រង្ស៊ី ផ្តើមចុះមូលដ្ឋានសារជាថ្មីបន្តទៀតដើម្បីពង្រឹងរចនាសម្ព័ន្ធតទល់នឹងបក្សកាន់អំណាច។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានអះអាងថាក្រុមការងារថ្នាក់ជាតិដែលមានសមាសភាពចម្រុះ គឺបានត្រៀមរួចរាល់អស់ហើយដើម្បីប្រតិបត្តិការនៅតាមថ្នាក់មូលដ្ឋាន។ជាប្រតិបត្តិការដើម្បីស្តាប់ការទាមទាររបស់ពលរដ្ឋជាម្ចាស់ឆ្នោត និងផ្តល់គណនេយ្យភាពដល់ប្រជាពលរដ្ឋ និង កាត់បន្ថយការិយាធិបតេយ្យដែលកំពុងស៊ីរូងផ្ទៃក្នុងសង្គមកម្ពុជា។
អ្នកនាំពាក្យទីស្តីការគណៈរដ្ឋមន្ត្រីដដែលបានសង្កត់ធ្ងន់ថា តាមយុទ្ធនាការថ្នាក់ជាតិនៅថ្ងៃទី១៥ ខានស្អែកនេះ រដ្ឋាភិបាលនឹងយកមតិប្រជាពលរដ្ឋមកធ្វើជាគោលនយោបាយរបស់រដ្ឋាភិបាលកម្ពុជាតែម្តង។ លោក ផៃស៊ីផាន មិនបានបដិសេធឡើយថា មូលហេតុមួយ ដែលនាំឱ្យបក្សកាន់អំណាចធ្លាក់ចុះប្រជាប្រិយភាពនោះ គឺការឃ្លាតឆ្ងាយពីរដ្ឋអំណាចដែលជាអ្នកបម្រើរាស្ត្រ និងប្រជារាស្ត្រដែលជាម្ចាស់ឆ្នោត។
ដោយឡែកគណបក្សសង្គ្រោះជាតិវិញ នៅថ្ងៃទី១៣ កុម្ភៈស្អែកនេះ លោក សមរង្ស៊ី និងលោក កឹម សុខា នឹងផ្តើមការចុះពង្រឹងមូលដ្ឋាននៅខេត្តកំពង់ស្ពឺជាថ្មីបន្តទៀតដើម្បីពង្រឹងរចនាសម្ព័ន្ធនៅថ្នាក់មូលដ្ឋានក្រោយប្រធានគណបក្សសង្គ្រោះជាតិលោក សម រង្ស៊ីវិលត្រឡប់ពីបរទេសវិញថ្មីៗនេះ។ លោក កឹម សុខា អនុប្រធានគណបក្សសង្គ្រោះជាតិ បានថ្លែងប្រាប់វិទ្យុបារាំងអន្តរជាតិនៅថ្ងៃពុធនេះថា ការបន្តចុះមូលដ្ឋានគឺជាការពង្រឹងរចនាសម្ព័ន្ធថ្នាក់មូលដ្ឋានដើម្បីត្រៀមខ្លួនសម្រាប់ការបោះឆ្នោត ខេត្ត សុក្រ រាជធានីដែលគ្រោងធ្វើឡើងនៅខែឧសភាខាងមុខនេះ។ ហើយថា ជាការត្រៀមកម្លាំងគាំទ្រប្រសិនបើមានការបោះឆ្នោតនៅមុនអាណត្តិកើតឡើង។
សូមបញ្ជាក់ថា ក្រោយលទ្ធផលនៃការបោះឆ្នោតក្នុងអាណត្តិទី៥ដែល គណបក្សប្រជាជនកម្ពុជា និងគណបក្សសង្គ្រោះជាតិ មានកម្លាំងគាំទ្រប្រហាក់ប្រហែលនេះ លោកនាយករដ្ឋមន្ត្រីហ៊ុន សែន ដែលជាអនុប្រធានគណបក្សប្រជាជន បានប្រកាសយុទ្ធសាស្ត្រកំណែទម្រង់ស៊ីជម្រៅ និងតម្រូវឱ្យមន្ត្រីចុះទៅកាន់មូលដ្ឋានដើម្បីស្តាប់មតិប្រជាពលរដ្ឋ។ ចំណែកឯបក្សប្រឆាំងវិញ បានបង្កើនសកម្មភាពចុះមូលដ្ឋានច្រើនជាងពេលណាណាទាំងអស់។
បើទោះបីជា គណបក្សជម្លោះទាំងពីរកំពុងស្វែងរកប្រជាប្រិយភាពរៀងៗខ្លួនពីពលរដ្ឋនៅតាមមូលដ្ឋានក៏ដោយ ប៉ុន្តែគណបក្សទាំងពីរនៅតែមិនព្រមវិលចូលតុចរចារដោះស្រាយវិបត្តនយោបាយដែលនៅតែបន្តអូសបន្លាយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ