សមត្ថកិច្ចបន្តពង្រឹងសន្តិសុខក្នុងរាជធានី
ក្រោយពីការបោសសម្អាតការតវ៉ានៅលើទីលានប្រជាធិបតេយ្យ សមត្ថកិច្ចចម្រុះនៅបន្តឃ្លាំមើលនៅក្នុងរាជធានី ដើម្បីបញ្ជៀសការជួបជុំដោយខុសច្បាប់។ អ្នកនាំពាក្យសាលារាជធានីភ្នំពេញ លោកឡុង ឌីម៉ង់បានប្រាប់អោយដឹងនៅថ្ងៃអាទិត្យនេះថា ស្ថានភាពទូទៅស្ងប់ស្ងាត់ល្អហើយ ប៉ុន្តែវិធានការសន្តិសុខត្រូវនៅបន្តធ្វើ ដើម្បីសមត្ថកិច្ចអាចប្រាកដថា ស្ថានភាពនឹងត្រឡប់មកប្រក្រតីភាពវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ចរាចរណ៍នៅជុំវិញទីលានប្រជាធិបតេយ្យត្រូវបានបើកអោយដំណើរការធម្មតា។ នៅព្រឹកមិញនេះ ទីលានប្រជាធិបតេយ្យដែលត្រូវបានបោសសម្អាតទាំងបាតុករ និងសំរាមនោះ ត្រូវបានប្រើប្រាស់សម្រាប់ការជួបជុំរបស់កងកម្លាំងរយៈពេលខ្លី។ បើទោះជាចរាចរណ៍ត្រូវបានបើកអោយប្រើប្រាស់វិញមែន ប៉ុន្តែនៅជុំវិញទីលានប្រជាធិបតេយ្យនោះ នៅមានសភាពស្ងាត់ដដែល។ ទីកន្លែងដែលធ្លាប់ជាទីតាំងដាក់លក់រថយន្តនៅអមទីលានប្រជាធិបតេយ្យនោះ ក៏មិនទាន់ត្រឡប់មកដូចធម្មតានៅឡើយដែរ។
លោកឡុង ឌីម៉ង់អ្នកនាំពាក្យរបស់សាលារាជធានីភ្នំពេញ បានថ្លែងប្រាប់វិទ្យុបារាំងអន្តរជាតិអំពីស្ថានភាពទូទៅនៅក្នុងរាជធានីថា បានស្ងប់ស្ងាត់ល្អ ពិសេសនៅក្នុងតំបន់ទីលានប្រជាធិបតេយ្យ និងតំបន់ផ្លូវវេងស្រេង ដែលបានក្លាយជាតំបន់ប៉ះទង្គិចគ្នាយ៉ាងខ្លាំងកាលពីថ្ងៃសុក្រ រវាងក្រុមបាតុករ និងក្រុមប៉ូលីស។
ប៉ុន្តែសម្រាប់មន្ត្រីជាន់ខ្ពស់សាលារាជធានីដដែលនេះ ការធ្វើដំណើរឃ្លាំមើលរបស់សមត្ថកិច្ចនៅក្នុងរាជធានីជាទូទៅ នៅបន្តធ្វើដដែល ហើយថានេះគឺជាវិធានការជំនាញរបស់សមត្ថកិច្ចតែប៉ុណ្ណោះ។ ប្រសិនបើមានការរិះគន់ ឬការព្រួយបារម្ភថា សមត្ថកិច្ចបំបែករាល់ការជួបប្រជុំនោះ លោកឡុង ឌីម៉ង់បានពន្យល់ថា សមត្ថកិច្ចហាមប្រាមតែការជួបជុំណាដែលមានលក្ខណៈជាការរៀបចំការតវ៉ានានាតែប៉ុណ្ណោះ។
មិនមានការអះអាងអំពីសមត្ថកិច្ចជំនាញថា តើវិធានការឃ្លាំមើលរបស់ប៉ូលីសនឹងត្រូវធ្វើដល់ពេលនោះទេ។
នៅក្នុងសេចក្តីថ្លែងការណ៍របស់ក្រសួងមហាផ្ទៃដែលពន្យល់អំពីមូលហេតុនៃការបោសម្អាតបាតុកម្មគណបក្សសង្គ្រោះជាតិលើទីលានប្រជាធិបតេយ្យនោះ ក្រសួងមហាផ្ទៃបានសម្រេចផ្អាកជាបណ្តោះអាសន្ន ការធ្វើបាតុកម្ម ការជួបជុំជាសាធារណៈ ឬការដង្ហែក្បួននានា រហូតដល់សភាពការណ៍សន្តិសុខ និងសណ្តាប់ធ្នាប់សង្គមត្រឡប់មកជាធម្មតាវិញ។
ត្រង់ចំនុចនេះ អ្នកនាំពាក្យសាលារាជធានីភ្នំពេញក៏បានបញ្ជាក់អោយដឹងផងដែរថា ប្រសិនបើសភាពសន្តិសុខបានវិលមករកប្រក្រតីភាពវិញហើយនោះ សាលារាជធានីនឹងអាចពិនិត្យឡើងវិញគម្រោងធ្វើបាតុកម្មនានានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ