បក្សប្រឆាំង ផ្ញើលិខិតទី២ទៅសាលាក្រុង ស្នើសុំទីតាំងឃោសនាបោះឆ្នោតជ្រើសរើសក្រុមប្រឹក្សារាជធានីខណ្ឌ
គណបក្សសង្គ្រោះជាតិ នៅថ្ងៃទី២៣មេសានេះ បានផ្ញើលិខិតទៅអភិបាលក្រុងភ្នំពេញម្ដងទៀត ដើម្បីស្នើសុំទីលានប្រជាធិបតេយ្យ ឬសួនការ៉ូឡាខាងកើត ចំហៀងខាងត្បូងវត្តបុទុមវត្តី ដើម្បីជួបជុំ ធ្វើការឃោសនាបោះឆ្នោត ជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌ នៃរាជធានីភ្នំពេញ។ នេះជាលិខិតទី២ហើយ ដែលបក្សប្រឆាំងនេះផ្ញើជូនអភិបាលក្រុងភ្នំពេញ បន្ទាប់ពីលិខិតទី១ មិនទាន់ទាំងត្រូវបានអាជ្ញាធររាជធានីភ្នំពេញឆ្លើយតបផងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នៅថ្ងៃពុធទី២៣មេសានេះ គណបក្សសង្គ្រោះជាតិ បានផ្ញើលិខិតទៅកាន់អភិបាលរាជធានីភ្នំពេញ ដើម្បីស្នើសុំទីតាំងជួបជុំ ធ្វើការឃោសនាបោះឆ្នោត ជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌ នៃរាជធានីភ្នំពេញ ចាប់ពីថ្ងៃទី២ឧសភា រហូតដល់ថ្ងៃបិទយុទ្ធនាការ។
បក្សប្រឆាំង ធ្លាប់បានផ្ញើលិខិតដែលមានកម្មវត្ថុដូចគ្នានេះ ទៅកាន់សាលារាជធានីភ្នំពេញរួចហើយ កាលពីថ្ងៃទី១៨មេសាកន្លងទៅ។ ប៉ុន្តែមិនទាន់ទាំងបានទទួលការឆ្លើយតបផង គណបក្សនេះ ស្រាប់តែផ្ញើលិខិតទី២ ទៅកាន់អភិបាលរាជធានីភ្នំពេញជាថ្មីម្ដងទៀត។
ពាក់ព័ន្ធនឹងបញ្ហានេះ លោកឡុង ឌីម៉ង់ អ្នកនាំពាក្យសាលារាជធានីភ្នំពេញ មានប្រសាសន៍ប្រាប់វិទ្យុបារាំងអន្ដរជាតិថា សាលារាជធានីភ្នំពេញ ពិតជាមិនបានឆ្លើយតបចំពោះលិខិតស្នើសុំ ចុះថ្ងៃទី១៨មេសារបស់គណបក្សសង្គ្រោះជាតិមែន។ ការសម្រេចមិនឆ្លើយតប ព្រោះថា គណបក្សសង្គ្រោះជាតិ សរសេរលិខិតស្នើសុំនោះ ពុំបានត្រឹមត្រូវតាមនីតិវិធី។
ថ្វីត្បិតតែមិនបានឆ្លើយតប តែបើតាមអ្នកនាំពាក្យរូបនេះ សាលារាជធានីបានអញ្ជើញតំណាងគណបក្សសង្គ្រោះជាតិ ឲ្យមកពិភាក្សា និងពន្យល់អំពីនីតិវិធីត្រឹមត្រូវ។ ហើយនៅទីបំផុត គណបក្សសង្គ្រោះជាតិ ក៏បានដាក់លិខិតស្នើសុំ មកកាន់សាលារាជធានីភ្នំពេញម្ដងទៀត នៅថ្ងៃទី២៣មេសា។ លិខិតស្នើសុំលើកទី២នេះ ត្រូវបានមន្ដ្រីសាលារាជធានីភ្នំពេញអះអាងថា បានទទួលហើយ។ ហើយកំពុងត្រូវបានដាក់ជូនអភិបាលរាជធានីភ្នំពេញ ពិនិត្យ ដើម្បីសម្រេច។
លិខិតចុះថ្ងៃពុធទី២៣មេសា របស់គណបក្សសង្គ្រោះជាតិ ផ្ញើជូនអភិបាលរាជធានីភ្នំពេញ មានកម្មវត្ថុ ស្នើសុំទីលានប្រជាធិបតេយ្យ ឬសួនការ៉ូឡាខាងកើត ចំហៀងខាងត្បូងវត្តបុទុមវត្តី ដើម្បីជួបជុំធ្វើយុទ្ធនាការឃោសនាបោះឆ្នោត ជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌ នៃរាជធានីភ្នំពេញ។ ជាការឃោសនាដែលប្រព្រឹត្តធ្វើពីថ្ងៃទី២ខែឧសភា រហូតដល់ថ្ងៃបិទយុទ្ធនាការ ចាប់ពីម៉ោង៧ព្រឹក ដល់ម៉ោង៩យប់ ដោយមានអ្នកចូលរួមពី៣ពាន់ ទៅ៥ពាន់នាក់។
បើទោះបីជាសាលារាជធានីភ្នំពេញមិនទាន់ឆ្លើយតបយ៉ាងណាក្ដី គេហាក់ពិបាកសង្ឃឹមថាមានចម្លើយវិជ្ជមានណាស់។ មិនសង្ឃឹម ព្រោះថា អភិបាលរាជធានីភ្នំពេញ តាមរយៈសារព័ត៌មានក្នុងស្រុក បានបញ្ជាក់ជាថ្មីហើយថា អាជ្ញាធររាជធានី នៅតែបន្តមិនឲ្យមានការប្រមូលផ្ដុំ ឬធ្វើបាតុកម្មនៅទីលានប្រជាធិបតេយ្យឡើយ រហូតដល់តុលាការរកឃើញថា អ្នកណាជាអ្នកបង្កឲ្យមានអំពើហិង្សា ដែលកើតឡើងក្នុងពេលកន្លងមកជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ