អាជ្ញាធរស៊ីម៉ាក់ បញ្ជាក់ថា ការរុករកគ្រាប់បែកគីមីទីពីរនៅខេត្តស្វាយរៀង អាចប្រឈមនឹងការលំបាក
រហូតមកទល់ពេលនេះ ក្រុមការងារនៃអាជ្ញាធរមីនកម្ពុជា និងអង្គភាពគ្រប់គ្រងអាវុធគីមីកម្ពុជា កំពុងបន្តប្រតិបត្តិការរុករក គ្រាប់បែកគីមីទីពីរ ដែលស្ថិតក្នុងបរិវេណ វត្តគគីរ ស្រុករមាសហែក ខេត្តស្វាយរៀង។ លោក ហេង រតនា នាយកមជ្ឈមណ្ឌលសកម្មភាពកំចាត់មីនកម្ពុជា ស៊ីម៉ាក់ អះអាងប្រាប់វិទ្យុបារាំងអន្តរជាតិ នៅថ្ងៃអាទិត្យនេះថា ប្រតិបត្តិការរុករកគ្រាប់បែកគីមីទីពីរនេះ អាចប្រឈមនឹងការលំបាក ដោយសារតែសារធាតុគ្រាប់បែកគីមីនេះនៅតែមានគ្រោះថ្នាក់ខ្លាំង និងទាមទារបច្ចេកទេសខ្ពស់។
ចុះផ្សាយនៅថ្ងៃ៖ កែប្រែថ្ងៃទី៖
ក្រៅតែមានអនុភាពសារធាតុគីមីខ្លាំង គ្រាប់បែកគីមីទីពីរដែលសេសសល់ពីសម័យសង្រ្គាមនេះ ទំនងជាអាចកប់ក្នុងដីជ្រៅ ឬស្ថិតនៅខាងក្រោមអគារសាលាឆាន់ ឬក្បែរអគារសាលារៀន ដែលរឹងរឹតតែធ្វើឲ្យដំណើការដោះគ្រាប់ចេញកាន់តែប្រឈមនឹងបញ្ហាខ្ពស់។ នេះបើតាមការបញ្ជាក់របស់លោក ហេង រតនា នាយកមជ្ឈមណ្ឌលសកម្មភាពកំចាត់មីនកម្ពុជា។ លោក អះអាងថា អាជ្ញាធរ នឹងខិតខំពន្លឿនការដោះគ្រាប់បែកគីមីទីពីរ ឲ្យបានឆាប់រហ័សតាមដែលអាចធ្វើទៅបាន។ បើតាមគម្រោង អាជ្ញាធរ នឹងបញ្ចប់ការដោះគ្រាប់បែកគីមីដ៏គ្រោះថ្នាក់ចុងក្រោយ នៅក្នុងបរិវេណវត្តគគីរនេះ ក្នុងរយៈពេលពី ២ទៅ៣ ថ្ងៃទៀត។
យ៉ាងណាក៏ដោយ លោក ហេង រតនា មិនបានបញ្ជាក់លម្អិតពីវិធានការណ៍ ថាតើនឹងត្រូវធ្វើយ៉ាងទៀតនោះទេ ប្រសិនបើគ្រាប់បែកនោះពិតជាស្ថិតក្រោមអាគារសាលាឆាន់មែននោះ។
ខណៈប្រតិបត្តិការរុករកគ្រាប់បែកទីពីរ នឹងចាប់ផ្តើមជាបន្តទៀតនៅថ្ងៃច័ន្ទ ទី ០៩ តុលា នាយកមជ្ឈមណ្ឌលសកម្មភាពកំចាត់មីនកម្ពុជា ក៏បានបញ្ជាក់ដែរថា អាជ្ញាធរនឹងជម្លៀសប្រជាពលរដ្ឋដែលស្ថិតនៅក្បែរតំបន់ប្រតិបត្តិការនោះជាបណ្តោះអាសន្នដើម្បីបង្ការគ្រោះថ្នាក់នានា។ ប្រតិបត្តិការរុករកគ្រាប់បែកគីមីទីពីរនេះ ធ្វើឡើងបន្ទាប់ពីក្រុមការងារអាជ្ញាធរមីនកម្ពុជា និងអង្គភាពគ្រប់គ្រងអាវុធគីមីកម្ពុជា ដែលមានសមាជិកចំនួនជិត ៦០ នាក់ ដោយមានអ្នកជំនាញការអាមេរិកផង បានបញ្ចប់បេសកកម្មដោះគ្រាប់បែកគីមីទីមួយ កាលពីថ្ងៃទី ៦ ខែតុលា។
មកទល់ពេលនេះ អាជ្ញាធរ បានគ្របទុកគ្រាប់បែកគីមីទី១ដែលបានរកឃើញ ដោយអ្នកជំនាញបានយល់ស្រុះស្រួលគ្នាថា ពួកគេនឹងធ្វើការវេចខ្ចប់គ្រាប់បែកទាំង២ព្រមគ្នា ដើម្បីចៀសវាងគ្រោះថ្នាក់ដែលបង្កដោយចំហាយគីមីគ្រាប់បែក នៅពេលដែលរកឃើញគ្រាប់ទី២។
លោក ហេង រតនា បានបញ្ជាក់ប្រាប់វិទ្យុបារាំងអន្តរជាតិ RFI ទៀតថា បើសិនអាកាសធាតុល្អ មានភ្លៀងធ្លាក់នោះនឹងផ្តល់អំណោយផលដល់ប្រតិបត្តិការដោះយកគ្រាប់បែកគីមីទៅវិញទេ ដោយសារទឹកភ្លៀងអាចនឹងជួយទប់ស្កាត់ដល់ការសាយភាយធាតុវិទ្យុសកម្មបាន ក៏ប៉ុន្តែ បារម្ភពីការហូរសារធាតុគីមីតាមទឹកភ្លៀងផងដែរ។
សូមជម្រាបជូនថា ប្រតិបត្តិការដោះគ្រាប់បែកគីមី នៅក្នុងបរិវេណ វត្តគគីរ ស្រុករមាសហែក ខេត្តស្វាយរៀង គឺធ្វើឡើងបន្ទាប់ពីមានបទបញ្ជាពីប្រមុខរដ្ឋាភិបាលកម្ពុជា ឲ្យអ្នកជំនាញអាវុធគីមីនៃក្រសួងការពារជាតិកម្ពុជា កម្ទេច ដោយមិនរង់ចាំការផ្តល់ជំនួយពីសហរដ្ឋអាមេរិកនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ