សង្គមស៊ីវិលបន្តជជែកគ្នារឿងសេចក្តីព្រាងច្បាប់ស្តីពីគ.ជ.ប
សម្ព័ន្ធកំណែទម្រង់ការបោះឆ្នោត កាលពីព្រឹកមិញ បានបើកធ្វើកិច្ចពិភាក្សាតុមូលមួយស្តីពីការ បង្ហាញដោយសង្ខេបនៃបទបញ្ញត្តិសំខាន់ៗនៅក្នុងសេចក្តីព្រាងច្បាប់ ស្តីពីការរៀបចំ និងប្រព្រឹត្តទៅនៃ គ.ជ.ប។ កិច្ចពិភាក្សានេះបានផ្តោតទៅលើបញ្ញតិ្តផ្សេងៗដែលទាក់ទងទៅនឹងការប្រកាសនិងតែងតាំងសមាសភាពគ.ជ.ប ថ្មីដែលជាការព្រមព្រៀងកើតចេញពីការសម្របសម្រួលរវាងគណបក្សនយោបាយជាប់ឆ្នោតទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
សម្ព័ន្ធកំណែទម្រង់ការបោះឆ្នោត កាលពីព្រឹកថ្ងៃទី០១ខែកញ្ញានេះ បានបើកធ្វើកិច្ចពិភាក្សាតុមូលមួយស្តីពីការ បង្ហាញដោយសង្ខេបនៃបទបញ្ញត្តិសំខាន់ៗនៅក្នុងសេចក្តីព្រាងច្បាប់ ស្តីពីការរៀបចំ និងប្រព្រឹត្តទៅនៃ គ.ជ.ប នៅសណ្ឋាគារ អិមភឺរៀល។
ក្រុមអង្គការសង្គមស៊ីវិលបានលើកយកបញ្ហាលេខាធិការដ្ឋានមកពិភាក្សាដោយផ្តោតទៅលើសេចក្តីស្នើច្បាប់ដែលព្រៀងឡើងដោយសង្គមស៊ីវិល ត្រូវបាននិយាយលម្អិតពីគណៈកម្មការជ្រើសរើស អគ្គលេខាធិការ អគ្គលេខាធិការរង ដែលជាអ្នកប្រតិបត្តិដោយផ្ទាល់និងសមាជិកគ.ជ.ប ដទៃទៀត។ ការចែងពីការទទួលខុសត្រូវ បទបញ្ញត្តិ ទោសបញ្ញតិ្ត និងលក្ខខ័ណ្ឌផ្សេងៗរបស់សមាជិកគ.ជ.ប ការចែងពីបុព្វសិទ្ធិ និងស្វយ័តភាពរបស់ គ.ជ.ប ក៏ត្រូវបានលើកមកបង្ហាញផងដែរ។
លោក ហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោតនីកហ្វិក បានលើកពីការបង្កើតគណៈកម្មការគ្រប់គ្រងប្រព័ន្ធផ្សព្វផ្សាយរដ្ឋអំឡុងពេលមានការបោះឆ្នោត ដែលមានសមាសភាពមកពីផ្នែកពាក់ព័ន្ធនានា មានតំណាងគ.ជ.ប តំណាងគណបក្សនយោបាយដែលមកពីរដ្ឋាភិបាល និងបក្សនយោបាយដែលមានអាសនៈ។
លោកគល់ បញ្ញា នាយកប្រតិបត្តិអង្គការឃ្លាំមើលការបោះឆ្នោត Comfrel បានថ្លែងឲ្យដឹងដែរថា ការជួបជជែកគ្នា នឹងលើកជាសេចក្តីស្នើច្បាប់ដោយសង្គមស៊ីវិលនាពេលនេះ គឺមិនមានបំណងឲ្យគ.ជ.ប ឈានទៅដល់កំរិតស្តង់ដារអតិបរមានោះទេ គឺចង់ឲ្យគ.ជ.ប នៅក្នុង
កំរិតល្មមមួយអាចទទួលយកបានអប្បបរមាសម្រាប់គណបក្សជាប់ឆ្នោតទាំងពីរ។
សូមបញ្ជាក់ថា ការជជែកគ្នារបស់អង្គការសង្គមស៊ីវិល ស្តីពីសេចក្តីព្រាងច្បាប់ ស្តីពីការរៀបចំ និងប្រព្រឹត្តទៅនៃ គ.ជ.ប បានធ្វើឡើងបន្ទាប់ពីគណបក្សនយោបាយជាប់ឆ្នោតទាំងពីរគឺគណបក្សប្រជាជន និងគណបក្សសង្គ្រោះជាតិបានព្រមព្រៀងនយោបាយគ្នាកាលពីពេលថ្មីៗនេះលើការរៀបចំគ.ជ.ប តាមរូបមន្ត ៤នាក់មកពីគណបក្សម្ខាងៗ និងបុគ្គលទី៩ជាបុគ្គលឯករាជ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ