កម្ពុជា-ចិនជំរុញចង់ឃើញសមុទ្រចិនខាងត្បូងជាដែនសមុទ្រសហប្រតិបត្តិការចិន-អាស៊ាន
រដ្ឋមន្ត្រីការបរទេសអាស៊ាន បានជជែកគ្នានៅថ្ងៃចន្ទនេះអំពីដំណើរឆ្ពោះទៅរកការដោះស្រាយជម្លោះដែនសមុទ្រចិនខាងត្បូង។ ខណៈដែលអាស៊ាន កំពុងជជែកអំពីការតាក់តែងសេចក្តីព្រាងក្រមប្រតិបត្តិ(Code of Conduct) ហ្វីលីពីនដែលជាភាគីជម្លោះមួយនោះ បានអំពាវនាវអោយអាស៊ានព្រមព្រៀងរួមគ្នាលើខ្លឹមសារនៃសេចក្តីព្រាងក្រមនេះ មុននឹងជជែកជាមួយចិន។ រដ្ឋមន្ត្រីការបរទេសកម្ពុជា លោកឧបនាយករដ្ឋមន្ត្រី ហោ ណាំហុង អត្ថាធិប្បាយថា នៅពេលចិនត្រៀមជជែកអំពីក្រមប្រតិបត្តិនេះជាមួយអាស៊ាន អាស៊ានគួរតែឆ្លៀតពេលជួបជាមួយចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
រដ្ឋាភិបាលភ្នំពេញនិងប៉េកាំង បានឯកភាពគ្នាថាត្រូវធ្វើយ៉ាងណាអោយចិននិងងអាស៊ានត្រូវធ្វើការរួមគ្នាដើម្បីប្រែក្លាយតំបន់ជម្លោះនេះ ទៅជាសមុទ្រសន្តិភាព មិត្តភាព និងកិច្ចសហប្រតិបត្តិការសម្រាប់ ចិន និងបណ្តាប្រទេសអាស៊ាន។
ជំហររបស់កម្ពុជា និងចិនយ៉ាងនេះត្រូវបានប្រកាសឡើងនៅក្នុងសេចក្តីថ្លែងការណ៍រួមកម្ពុជាចិននៅថ្ងៃទី២មេសានេះ នៅក្នុងក្របខណ្ឌនៃការបញ្ចប់ដំណើរទស្សនកិច្ចរបស់ លោកប្រធានាធិបតីចិននៅកម្ពុជា។
សេចក្តីថ្លែងការណ៍នេះត្រូវបានផ្សព្វផ្សាយជាសាធារណៈ ខណៈដែលរដ្ឋមន្ត្រីការបរទេសអាស៊ានក៏កំពុងជជែកអំពីយន្តការនៃការដោះស្រាយជម្លោះដែនសមុទ្រចិនខាងត្បូងតាមរយៈការតាក់តែងសេចក្តីព្រាងក្រមប្រតិបត្តិ Code of Conduct ក្នុងចំណោមសមាជិកអាស៊ាន។
មានការលើកឡើងផ្សេងៗគ្នាខ្លះ នៅក្នុងដំណាក់កាលនៃការតាក់តែងសេចក្តីព្រាងក្រមប្រតិបត្តិ CoC នេះទៀត។ ហ្វីលីពីនដែលជាសមាជិកមួយរបស់អាស៊ាននិងជាភាគីជម្លោះមួយដែលនោះ បានអំពាវនាវអោយសមាជិកអាស៊ានព្រមព្រៀងគ្នាជាមុនចំពោះសេចក្តីព្រាងក្រមប្រតិបត្តិនេះ មុននឹងយកសេចក្តីព្រាងក្រមនេះ ទៅជជែកជាមួយចិន។
ចេញពីកិច្ចប្រជុំរដ្ឋមន្ត្រីការបរទេសអាស៊ាននៅព្រឹកថ្ងៃទី២មេសានេះ ប្រមុខការទូតខ្មែរ លោកឧបនាយករដ្ឋមន្ត្រីហោ ណាំហុងបានថ្លែងប្រាប់អ្នកសារព័ត៌មានយ៉ាងខ្លីថា៖ “នៅពេលដែលចិនយល់ព្រម និងត្រៀមជជែកអំពីបញ្ហា CoCនេះហើយ យើងគួរឆ្លៀតយកឱកាសនេះដើម្បីនិយាយជាមួយចិន”។
នៅពេលដែលទីក្រុងប៉េកាំងទើបបានយល់ព្រមក្នុងនាទីចុងក្រោយអោយមានការជជែកអំពីបញ្ហាជម្លោះសមុទ្រចិនខាងត្បូងក្នុងក្របខណ្ឌអាស៊ាននេះ បើតាមការអះអាងរបស់លោកកៅ គឹមហួន រដ្ឋលេខាធិការក្រសួងការបរទេសកម្ពុជា ទីក្រុងប៉េកាំងបានស្នើអោយមានការបង្កើតក្រុមឥស្សរជន និងក្រុមបច្ចេកទេសដើម្បីពិភាក្សាអំពីយន្តការនៃការដោះស្រាយជម្លោះ។
ទោះយ៉ាងណាក៏ដោយ អាស៊ាននិងចិនជំរុញអោយមានការប្រើប្រាស់យន្តការដោះស្រាយដែលមានស្រាប់ ដូចជាសេចក្តីថ្លែងការណ៍ស្តីពីការប្រតិបត្តិរបស់ភាគីនៅសមុទ្រចិនខាងត្បូង ដែលត្រូវបានចុះហត្ថលេខាតាំងពី១០ឆ្នាំមុន (៤ វិច្ឆិកា ២០០២)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ