អាជ្ញាធរបដិសេធ មិនឲ្យជួបជុំនៅវត្តសាមគ្គីរង្សី ដើម្បីប្រារព្ធខួបថ្ងៃបាត់បង់ទឹកដីខ្មែរកម្ពុជាក្រោមថ្ងៃ៤មិថុនា
សហគមន៍ខ្មែរកម្ពុជាក្រោមគ្រោងនឹងជួបជុំនៅថ្ងៃទី៤មិថុនានៅវត្តសាមគ្គីរង្សីដែលជាវត្តព្រះសង្ឃខ្មែរកម្ពុជាក្រោមនៅភ្នំពេញដើម្បីប្រារព្ធខួបគម្រប់៦៥ឆ្នាំថ្ងៃអាណានិគមបារាំងបានកាត់ទឹកដីខ្មែរកម្ពុជាក្រោមឲ្យវៀតណាមថ្ងៃទី៤មិថុនាឆ្នាំ១៩៤៩។ ប៉ុន្តែអាជ្ញាធររាជធានីភ្នំពេញតាមរយៈអភិបាលរងលោក ឃួង ស្រេងបានបដិសេធដោយលើកហេតុផលថាមកពីវត្តសាមគ្គីរង្សីសព្វថ្ងៃមានប្រជាពលរដ្ឋជាច្រើននាក់មកពីខេត្តក្រចេះស្នាក់នៅរង់ចាំដំណោះស្រាយលើជម្លោះដីធ្លី។
ចុះផ្សាយនៅថ្ងៃ៖
ស្តាប់ - ០២:៤៣
ថ្ងៃទី៤ខែមិថុនាឆ្នាំ២០១៤ជាខួបគំរប់៦៥ឆ្នាំដែលអាណានិគមបារាំងបានកាត់ទឹកដីខ្មែរកម្ពុជាក្រោមឲ្យវៀតណាមត្រួតត្រាបន្តរហូតសព្វថ្ងៃ។ដើម្បីចងចាំនូវថ្ងៃប្រវត្តិសាស្ត្រដ៏សែនឈឺចាប់នេះនិងសម្តែងនូវកតញ្ញូតាធម៌ចំពោះព្រះវិញ្ញាណក្ខន្ធព្រះវីរសមណៈព្រះវិញ្ញាណក្ខន្ធព្រះវីរព្រះមហាក្សត្រវិញ្ញាណក្ខន្ធវីរបុរស និងខ្មែរស្នេហាជាតិទាំងអស់អង្គការ-សមាគមខ្មែរកម្ពុជាក្រោមបានរៀបចំធ្វើពិធីបុណ្យរាប់បាត្រព្រះសង្ឃចំនួន១៩៤៩អង្គនិងប្រារព្ធទិវាកាន់ទុក្ខជាតិខ្មែរថ្ងៃ៤មិថុនាជារៀងរាល់ឆ្នាំ។
នៅថ្ងៃ៤មិថុនាឆ្នាំនេះក្រោយពីធីរាប់បាត្រព្រះសង្ឃដារបង្សុកូលរួចអង្គការ-សមាគមខ្មែរកម្ពុជាក្រោមនឹងរៀបចំវេទិកាសាធារណៈស្តីអំពីខ្មែរកម្ពុជាក្រោមបន្តរហូតដល់ម៉ោង៥ល្ងាច។
តាមសេចក្តីប្រកាសរបស់អង្គការសហគមន៍ខ្មែរកម្ពុជាក្រោម គោលបំណងនៃការរៀបចំវេទិកាសាធារណៈគឺដើម្បីប្រមូលយកអនុសាសន៍នានាដែលទាក់ទងនឹងជាតិសាសនានិងមាតុភូមិខ្មែរកម្ពុជាក្រោមក្នុងការរៀបចំជាយុទ្ធសាស្ត្រជួយការពារសិទ្ធិប្រជាពលរដ្ឋខ្មែរកម្ពុជាក្រោម។ពិធីជួបជុំប្រារព្ធខួបថ្ងៃបាត់បង់ទឹកដីកម្ពុជាក្រោមថ្ងៃ៤មិថុនានៅសប្តាហ៍ក្រោយត្រូវបានអង្គការសមាគមខ្មែរកម្ពុជាក្រោមកំណត់ថានឹងធ្វើឡើងនៅវត្តសាមគ្គីរង្សីនៅភ្នំពេញ។
ប៉ុន្តែអាជ្ញាធររាជធានីភ្នំពេញតាមរយៈលោកឃួងស្រេងអភិបាលរងបានបដិសេធមិនឲ្យជួបជុំនៅវត្តខ្មែរកម្ពុជាក្រោមនោះទេ។មូលហេតុមកពីសព្វថ្ងៃវត្តសាមគ្គីរង្ស៊ីមានប្រជាពលរដ្ឋច្រើននាក់ដែលមានជម្លោះដីធ្លីមកពីខេត្តក្រចេះកំពុងស្នាក់នៅ។
យ៉ាងណាក៏ដោយលោកថាច់សេដ្ឋានាយកប្រតិបត្តិសហគមន៍ខ្មែរកម្ពុជាក្រោមអះអាងនៅថ្ងៃទី៣០ឧសភាថាអង្គការសមាគមខ្មែរកម្ពុជាក្រោមនៅតែរក្សាគម្រោងជួបជុំដើម្បីប្រារព្ធរម្លឹកខួបថ្ងៃបាត់បង់ទឹកដីកម្ពុជាក្រោមដែលមានព្រះរាជតំណាងរបស់ព្រះមហាក្សត្រយាងចូលរួមជារៀងរាល់ឆ្នាំនេះ។
ជាការឆ្លើយតបលោកឡុងឌីម៉ង់អ្នកនាំពាក្យសាលារាជធានីភ្នំពេញបានបញ្ជាក់ថាបើសិនជាប្រជាពលរដ្ឋខេត្តក្រចេះចាកចេញពីវត្តសាមគ្គីរង្សីនៅថ្ងៃទី៣១ឧសភាដូចដំណឹងដែលទទួលបាននោះអាជ្ញាធរនឹងកោះប្រជុំជាអង្គការសមាគមខ្មែរកម្ពុជាក្រោមជាថ្មី។
មួយវិញទៀតអាជ្ញាធរក៏ត្រូវដឹងជាមុនពីប្រធានបទនៃវេទិកាសាធារណៈរបស់ខ្មែរកម្ពុជាក្រោមនៅថ្ងៃ៤មិថុនាបន្តពីកម្មវិធីសាសនានោះ។បើសិនជាខ្មែរកម្ពុជាក្រោមយកវេទិកាសាធារណៈដើម្បីវាយប្រហារប្រទេសណាមួយនោះច្បាប់រដ្ឋធម្មនុញ្ញក៏ដូចជាការបញ្ជាក់របស់លោកនាយករដ្ឋមន្ត្រីគឺមិនអនុញ្ញាតឲ្យធ្វើទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ