អង្គការថា«រំលោភ» រដ្ឋាភិបាលថា«ស្ម័គ្រចិត្ត»។ បក្សប្រឆាំងកម្ពុជាសោកស្តាយ។ នេះជារឿងទាក់ទងនឹងជនភៀសខ្លួន ដែលស្វែងរកសិទ្ធិជ្រកកោននៅប្រទេសអូស្ត្រាលី ប៉ុន្តែនឹងត្រូវបញ្ជូនបន្ត ឱ្យមកតាំងទីលំនៅ ក្នុងប្រទេសកម្ពុជា។ កិច្ចព្រមព្រៀងរវាងអូស្ត្រាលី និងកម្ពុជា ធ្វើឱ្យសង្គមស៊ីវិល និងគណបក្សសង្គ្រោះជាតិ មានមន្ទិលច្រើន ខណៈដែលព័ត៌មានពិស្តារ មិនត្រូវបានលាតត្រដាង។ ច្បាស់នោះគឺថា ហត្ថលេខារបស់លោក ស ខេង រដ្ឋមន្ត្រីមហាផ្ទៃកម្ពុជា លើអនុស្សរណៈនៃការយោគយល់គ្នាម្សិលមិញ ជាថ្នូរនឹងជំនួយរបស់លោក ស្កុត ម៉ូរីសុន រដ្ឋមន្ត្រីអន្តោប្រវេសន៍អូស្ត្រាលី ចំពោះកម្ពុជា។
