ព្រឹត្តិការណ៍អង្គរសង្រ្កាន្តរយៈពេលបួនថ្ងៃបានបើកជាផ្លូវការហើយ
អង្គរសង្ក្រាន្តដែលជាព្រឹត្តិការណ៍ធំទីពីរសម្រាប់បុណ្យចូលឆ្នាំថ្មីប្រពៃណីខ្មែរនេះ បានបើកជាផ្លូវការហើយកាលពីល្ងាចថ្ងៃអាទិត្យ។ ព្រឹត្តិការណ៍ដ៏ធំសម្រាប់ពិធីបុណ្យជាតិមួយនេះបានធ្វើឡើងរយៈពេលបួនថ្ងៃ ចាប់ពីថ្ងៃទី ១៣ដល់១៦ មេសា។ សហភាពសហព័ន្ធយុវជនកម្ពុជាដែលបានរៀបចំបានឲ្យដឹងថា ព្រឹត្តិកាណ៍នេះ មានទិសដៅបង្កើតបរិយាកាសសប្បាយរីករាយ ផ្តល់ឱកាសឲ្យក្រុមយុវជនស្វែងយល់ និងផ្សព្វផ្សាយពីវប្បធម៌ អរិយធម៌ខ្មែរ និងផ្តល់ឱកាសដល់ភ្ងៀវជាតិ និងអន្តរជាតិ ស្វែងយល់ពីល្បែងប្រជាប្រិយ និងបេតិកភណ្ឌខ្មែរផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
នៅល្ងាចថ្ងៃអាទិត្យទី ១៣ មេសា ព្រឹត្តិការណ៍អង្គរសង្ក្រាន្តដែលធ្វើឡើងនៅក្នុងខេត្តសៀមរាបបានបើកជាផ្លូវការហើយ ដោយមានការចូលរួមពីភ្ញៀវទេសចរជាតិ និង អន្តរជាតិយ៉ាងច្រើនកុះករ។ ព្រឹត្តិការណ៍នេះរៀបចំឡើងដោយក្រុមយុវជនស្ម័គ្រចិត្តរបស់សហភាពសហព័ន្ធយុវជនកម្ពុជាប្រមាណ ៣.០០០នាក់ ហើយធ្វើឡើងរយៈពេល បួនថ្ងៃ ចាប់ពីថ្ងៃទី ១៣ ដល់ថ្ងៃទី ១៦ មេសា ពោល គឺចំថ្ងៃនៃពិធីបុណ្យចូលថ្មីប្រពៃណីជាតិខ្មែរតែម្តង។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងឲ្យដឹងថា គោលបំណងនៃការរៀបចំព្រឹត្តការណ៍នេះ គឺដើម្បីបង្កើតបរិយាកាសសប្បាយរីករាយដល់ប្រជាពលរដ្ឋខ្មែរក្នុងការចូលរួមអបអរសាទរ និងកម្សាន្តក្នុងឱកាសបុណ្យចូលឆ្នាំថ្មីនេះ។ ម្យ៉ាងទៀត វាក៏ផ្តល់ឱកាសឲ្យយុវជនបានស្វែងយល់ និងផ្សព្វផ្សាយពីវប្បធម៌ អរិយធម៌ខ្មែរ របាំប្រពៃណី និង បេតិកភណ្ឌខ្មែរដល់ភ្ញៀវជាតិ និងអន្តរជាតិផងដែរ។ លោកបន្តថា អង្គរសង្ក្រាន្តជាព្រឹត្តិការណ៍ដែលឆ្លុះបញ្ចាំងអំពីឯកភាព សាមគ្គីភាព ស្មារតីគ្រួសារខ្មែរ សុភមង្គល ភាពសុខដុម សេចក្តីអំណរ និងមោទនភាពជាតិក្នុងចំណោមយុវជនក៏ដូចជា ប្រជាពលរដ្ឋខ្មែរទូទាំងប្រទេសជាមហាគ្រួសារខ្មែរតែមួយ។
លោក សុខ អាន ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានថ្លែងក្នុងពិធីបើកព្រឹត្តិការណ៍អង្គរសង្ក្រាន្តនេះថា សកម្មភាពដែលសហភាពសហព័ន្ធយុវជនកម្ពុជាកំពុងធ្វើនេះ ជាការរួមចំណែកយ៉ាងសំខាន់ដើម្បីលើកកម្ពស់ការយល់ដឹងអំពីការងារថែរក្សាអភិរក្សបេតិកភណ្ឌ និងកៀរគរការចូលរួមពីគ្រប់មជ្ឃដ្ឋានទាំងជាតិ និងអន្តរជាតិ។
លោកឧបនាយករដ្ឋមន្ត្រីបានកត់សម្គាល់ថា អង្គរសង្ក្រាន្តឆ្នាំនេះ មានកម្មវិធីពិសេសៗជាច្រើនដែលបង្កឲ្យភាពសប្បាយរីរាយ និងជំរុញការចូលរួមរបស់មហាជន ពិសេសយុវជនក្នុងការយល់ដឹងក្នុងកិច្ចការថែរក្សា ការពារបេតិកភណ្ឌ និង ប្រពៃណីទំនៀមទម្លាប់ជាតិ។ លោក សុខ អាន ក៏បានអំពាវនាវដល់គ្រប់មជ្ឃដ្ឋាន ពិសេសយុវជនត្រូវរួមគ្នាថែរក្សាឲ្យបានគង់វង្សនូវបេតិកភណ្ឌរូបិយ និងអរូបិយរបស់ជាតិផងដែរ។
លោក សោម រតនា អ្នកពាក្យនៃព្រឹត្តិការណ៍អង្គរសង្ក្រាន្តនេះ បានប្រាប់វិទ្យុបារាំងអន្តរជាតិ RFI នៅថ្ងៃចន្ទនេះថា ព្រឹត្តិការណ៍អង្គរសង្ក្រាន្តឆ្នាំនេះ មានកម្មវិធីជាច្រើន រួមមានការលេងល្បែងទាញព្រ័ត្រ កាត់អន្សមយក្ស និងការប្រគុំតន្រី្តផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ