ADBផ្តល់ប្រាក់កម្ចី៧៥លានដុល្លារដល់ធនាគារអេស៊ីលីដា
ធនាគារអភិវឌ្ឍន៍អាស៊ី ADB នៅថ្ងៃពុធទី២៨ ឧសភានេះ បានចុះហត្ថលេខាផ្តល់កម្ចីពាណិជ្ជកម្មចំនួន៧៥លានដុល្លារសហរដ្ឋអាមេរិកដល់ធនាគាអេស៊ីលីដារបស់កម្ពុជា។ ADB បានបញ្ជាក់ថាកម្ចីនេះ គឺដើម្បីឆ្លើយតបទៅនឹងតម្រូវការកម្ចីពីសហគ្រាសខ្នាតតូចបំផុត ខ្នាតតូច ឬខ្នាតមធ្យមដែលកំពុងកើនឡើង។
ចុះផ្សាយនៅថ្ងៃ៖
ស្តាប់ - ០២:០៤
ការលើកកម្ពស់លទ្ធភាពដំណើរការអាជីវកម្មខ្នាតតូចបំផុត ខ្នាតតូច និងសហគ្រាសខ្នាតមធ្យមនៅកម្ពុជាឱ្យទទួលបានការប្រើប្រាស់កម្ចីរយៈពេលវែងសម្រាប់អាជីវកម្មរបស់ខ្លួន។ នេះគឺជាគោលបំណងនៃការផ្តល់កម្ចីទឹកប្រាក់ ចំនួន៧៥លានដុល្លារសហរដ្ឋអាមេរិកពីADB មកកាន់ធនាគារអេស៊ីលីដា។
ធនាគារអភិវឌ្ឍន៍អាស៊ី បានបញ្ជាកថាការផ្តល់កម្ចីឱ្យធនាគាអស៊ីលីដានេះ គឺដើម្បីឱ្យធនាគារដែលមានបណ្តាញសាខាច្រើននៅតាមទីជនបទមួយនេះ អាចពង្រឹងមូលដ្ឋានកម្ចី និងពង្រីកសេវារបស់ខ្លួនដល់សហគមន៍ដែលមិនទាន់បានទទួលសេវាគ្រប់គ្រាន់នៅឡើយ។ តាមរយៈកម្ចីនេះ ប្រធាននាយកដ្ឋានប្រតិបត្តិការវិស័យឯកជននៃធនាគារអភិវឌ្ឍន៍អាស៊ី បានបញ្ជាក់ថា កម្ចីរយៈពេលវែងនេះ គឺដើម្បីកាត់បន្ថយភាពក្រីក្រតាមរយៈការបង្កើតចំណូល និងការងារនៅតាមជនបទ ដែលមានប្រជាពលរដ្ឋកម្ពុជាក្រីក្រប្រមាណជា៩០%រស់នៅ។
ADB បានបញ្ជាក់ថា សេវាហិរញ្ញវត្ថុនៅកម្ពុជាមានកម្រិតទាបជាងគេបើប្រៀបធៀបនឹងប្រទេសក្នុងតំបន់ ខណៈប្រជាពលរដ្ឋកម្ពុជាប្រមាណ៧៣ភាគរយៈកំពុងទទួលបានការងារធ្វើពីវិស័យសហគ្រិនខ្នាតតូចបំផុត ខ្នាតតូច និងខ្នាតមធ្យមនេះ។ ប៉ុន្តែផ្ទុយទៅវិញវិស័យសហគ្រាសនៅកម្ពុជាបែរជាទទួលបានលទ្ធភាពកម្ចីតិចតួចពីធនាគាក្នុងស្រុក ហើយមានអាត្រាការប្រាក់កម្ចីខ្ពស់។ សូមបញ្ជាក់ថា សហរគ្រាសខ្នាតតូចបំផុត ខ្នាតតូច និងមធ្យមនៅកម្ពុជាចំនួន៨៤% ទទួលបានកម្ចីពីវិស័យហិរញ្ញវត្ថុក្រៅប្រព័ន្ធដែលមានការប្រាក់រហូតដល់១០ក្នុងមួយខែ។ នេះបើតាមការបញ្ជាក់ពីធនាគារជាតិកម្ពុជា។
កង្វះថវិកាកម្ចីរយៈពេលវែងដល់សហគ្រិនដែលត្រូវកាប្រើប្រាស់ថវិកាពី៣ទៅ៥ឆ្នាំនោះ គឺជាមូលហេតុដែលធនាគាអេស៊ីលីដាត្រូវការកម្ចីពីធនាគារអភិវឌ្ឍន៍អាស៊ី។ នេះបើតាមការបញ្ជាក់ពីប្រធាននាយកប្រតិបត្តិធនាគារអេស៊ីលីដា លោក អ៊ិន ចន្នី។ លោកបន្តថាតាមពិតអេស៊ីលីដាមានទឹកប្រាក់ជិត២ពាន់លានដុល្លារសម្រាប់បម្រើសេវាកម្មកម្ចីប៉ុន្តែទឹកប្រាក់ទាំងនោះ គឺអាចផ្តល់បានត្រឹមតែរយៈពេលខ្លីតែប៉ុណ្ណោះ។
សម្រាប់កម្ចីទៅឱ្យធនាគារអេស៊ីលីដានេះ ធនាគារអភិវឌ្ឍន៍អាស៊ីADB ដែលមានមូលដ្ឋាននៅប្រទេសហ្វីលីពីនមួយនេះ បានមើលឃើញទំនាក់ទំនងកាន់តែស៊ីជម្រៅជាមួយអេស៊ីលីដា ដែលមានបណ្តាញរបស់ខ្លួននៅប្រទេសឡាវ និងភូមាជាបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ