ប្រវត្តិនៃការឡើងគ្រងរាជសម្បត្តិរបស់សម្តេចព្រះ បរមនាថ នរោត្តម សីហមុនី
ថ្ងៃទី ២៩ខែតុលា ឆ្នាំ ២០០៤ ថ្ងៃទី ២៩ខែតុលា ឆ្នាំ ២០១៨ គឺជាខួបលើកទី ១៤ឆ្នាំ នៃការឡើងគ្រង រាជសម្បត្តិ នៃព្រះមហាក្សត្រកម្ពុជា ព្រះបាទ សម្តេច ព្រះបរមនាថ នរោត្តម សីហមុនី។ នៅក្នុងឱកាសនេះ មន្ត្រីរាជការ បុគ្គលិកតាមស្ថានប័នឯកជន និងសិស្សសាលា ត្រូវបានអនុញ្ញាតឲ្យឈប់សម្រាករយៈពេល ១ថ្ងៃ ដើម្បីអបអរខួបនៃព្រះរាជាភិសេករបស់ព្រះមហាក្សត្រ។ ឆ្លៀតក្នុងឱកាសនេះ អ៊ឹង ប៊ុនថន សូមរំឭកពីប្រវត្តិនៃការឡើងគ្រងរាជសម្បត្តិរបស់សម្តេច ព្រះបរមនាថ នរោត្តម សីហមុនី ដូចតទៅ។
ចុះផ្សាយនៅថ្ងៃ៖ កែប្រែថ្ងៃទី៖
ព្រះករុណា សម្តេចព្រះ បរមនាថ នរោត្តម សីហមុនី ទ្រង់ជាបេក្ខជនតែមួយអង្គគត់ សម្រាប់ព្រះរាជតំណែងដ៏ខ្ពង់ខ្ពស់ ជាព្រះមហាក្សត្រ និងត្រូវបានក្រុមប្រឹក្សារាជសម្បត្តិ ជ្រើសតាំងជាឯកឆន្ទ ក្នុងសំឡេង៩ លើ៩ សំឡេង ដើម្បីឡើងសោយរាជ្យជាព្រះមហាក្សត្រ ជំនួសព្រះបិតា ព្រះបាទ នរោត្តម សីហនុ នៅថ្ងៃទី១៤ ខែតុលា ឆ្នាំ២០០៤ ខណៈព្រះអង្គកំពុងគង់នៅទីក្រុងប៉េកាំង ប្រទេសចិន ថែទាំព្រះរោគព្រះបិតា។
ព្រះមហាក្សត្រកម្ពុជា មានព្រះបរមងាថា ព្រះករុណា សម្តេចព្រះបរមនាថ នរោត្តម សីហមុនី សមានភូមិ ជាតិសាសនា ខេតិយា ខេមរារ៉ុងរឿង ពុទ្ធំព្រាធិរា មហាក្សត្រ ខេមរាជនា សមូហភា កម្ពុជៈ ឯករាជ្យរដ្ឋ បូរណសន្តិ សុភមង្គុលា សេរីវិបុលៈ ខេមរា ស្រីពិរាស្ត្រ ព្រះចៅក្រុងកម្ពុជាធិបតី។ សម្តេចព្រះបរមនាថ នរោត្តម សីហមុនី ទ្រង់ប្រសូត្រ នៅថ្ងៃទី១៥ ខែឧសភាឆ្នាំ១៩៥៣ នាទីក្រុងភ្នំពេញ។ ទ្រង់ ជាព្រះរាជបុត្រា សម្តេចព្រះនរោត្តម សីហនុ និងព្រះមហាក្សត្រីនរោត្តម មុនីនាថ សីហនុ។ ព្រះអង្គមានបងប្អូនរួមឧទ្ទរណ៍តែពីរព្រះអង្គប៉ុណ្ណោះ គឺទ្រង់ និងព្រះអង្គនរិន្ទរពង្សជាព្រះរាជអាណុច។
ក្រោយពីបានទទួលការជ្រើសតាំងជាព្រះមហាក្សត្រ នៅថ្ងៃទី១៤ ខែតុលា ឆ្នាំ២០០៤ នោះមក ព្រះអង្គទ្រង់រាជនុញ្ញាតឲ្យលោក ចាង ស៊ីវមិញ អតីតប្រធានាធិបតីនៃសាធារណរដ្ឋប្រជាមានិតចិន ចូលគាល់ និងប្រោសព្រះរាជទាន សវនាការជាលើកដំបូង នៅក្នុងទីក្រុងប៉េកាំង។ លុះដល់ថ្ងៃទី២០ ខែតុលា ឆ្នាំ២០០៤ ព្រះករុណា សម្តេចព្រះបរមនាថ នរោត្តម សីហមុនី បានយាងមកមាតុភូមិវិញ ដើម្បីទទួលព្រះរាជពិធីរាជាភិសេក គ្រងរាជសម្បត្តិ ជាផ្លូវការ។
នៅថ្ងៃទី២៩ ខែតុលា ឆ្នាំ២0១៨នេះ ព្រះរាជពិធីឡើងគ្រងរាជសម្បត្តិ ត្រូវបានរៀបចំឡើងជាឱឡារឹក គំរប់ខួប១៤ឆ្នាំនៃការឡើងគ្រងរាជសម្បត្តិ របស់សម្តេចព្រះបរមនាថ នរោត្តម សីហមុនី ។
ជារៀងរាល់ឆ្នាំ នៅថ្ងៃរំលឹកខួប នៃការឡើងគ្រងរាជសម្បត្តិ នៅក្នុងព្រះបរមរាជវាំង គេតែងចាត់ចែងឲ្យមានពិធីជាផ្លូវការ ដែលធ្វើតាមទំនៀមទំលាប់សាសនា។ នៅក្នុងឱកាសនៃការឡើងគ្រងរាជសម្បត្តិ នៃព្រះមហាក្សត្រខ្មែរ នៅគ្រប់ទីកន្លែងស្ថាប័នរដ្ឋ ឯកជន បានដាក់តាំងព្រះឆាយាល័ក្ខណ៏ ព្រះអង្គដោយមានភ្លើងចម្រុះពណ៌ និង ផ្កាផ្ញីលំអទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ