អតីតមន្ត្រីជាន់ខ្ពស់បក្សហ៊្វុនស៊ិនប៉ិច៤រូប ទទូចឲ្យសម្ដេចក្រុមព្រះបំភ្លឺជុំវិញការបណ្ដេញចេញ
បន្ទាប់ពីគណបក្សហ៊្វុនស៊ិនប៉ិច ចេញសេចក្ដីសម្រេចបញ្ចប់តួនាទីមុខតំណែងកាលពីថ្ងៃទី២០សីហាមក អតីតមន្រ្តីជាន់ខ្ពស់គណបក្សហ្វ៊ុនស៊ិនប៉ិចទាំង៤រូប ដែលធ្លាប់ស្និទ្ធជាមួយសម្ដេចក្រុមព្រះ នរោត្តម រណឬទ្ធ បានចេញមកធ្វើសន្និសីទកាសែត នៅថ្ងៃព្រហស្បតិ៍ទី២៣សីហានេះ។ តាមរយៈសន្និសីទកាសែតដែលមានរយៈពេលជាង២ម៉ោងមន្ត្រីទាំង៤ ទទូចទាមទារឲ្យគណបក្សហ្វ៊ុនស៊ិនប៉ិចក៏ដូចជា សម្ដេចក្រុមព្រះ បំភ្លឺជុំវិញការបញ្ចប់សមាជិកភាពរបស់ខ្លួន។
ចុះផ្សាយនៅថ្ងៃ៖
អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិចទាំង៤រូប បានអះអាងព្រមគ្នាថា ជាមនុស្សធ្លាប់មានភក្ដីភាព និងធ្វើការងារជាមួយសម្ដេចក្រុមព្រះនរោត្តម រណឬទ្ធ ជិត៤០ឆ្នាំមកហើយ មិនគួរឡើយការបញ្ចប់តួនាទីរបស់ពួកគេ ធ្វើឡើងដោយគ្មានការពន្យល់មូលហេតុឲ្យបានច្បាស់លាស់បែបនេះសោះ។
លោក យូ ហុកគ្រី អតីតអនុប្រធានគណបក្សហ្វ៊ុនស៊ិនប៉ិចលើកឡើងថា ការបញ្ចប់សមាជិកភាពជាចម្ងល់មួយមិនទាន់រកចម្លើយឃើញទៅហើយ នៅឡើយតែសុំធ្វើជាសមាជិកធម្មតានៅក្នុងគណបក្សហ្វ៊ុនស៊ិនប៉ិច ក៏មិនទទួលបានការយល់ព្រមទៅទៀត។
សម្រាប់លោក យូ ហុកគ្រី ការបញ្ចប់តួនាទីលោក ដោយពុំបានបញ្ជាក់មូលហេតុបែបនេះ ជាចំណែកមួយធ្វើឲ្យរូបលោកឈឺចាប់ បើធៀបនឹងពេលវេលាអតីតកាល ដែល លោកធ្លាប់ត្រូវបាន លោក ញឹក ប៊ុនឆៃ ដកចេញពីតំណែងអនុប្រធានទី២រដ្ឋសភា ក្នុងឆ្នាំ២០០៦ក៏ដោយ។
ស្របពេលដែលអ្នកកាសែតសួរថា តើការបញ្ចប់សមាជិកភាពមន្ត្រីទាំង៤ អាចមកពីមូលហេតុដែលជាប់ទាក់ទងនឹងការប្រើប្រាសត្រាក្លែងក្លាយ ដើម្បីលក់ទីស្នាក់ការបក្ស ឬក៏ការប្រើប្រាស់ត្រា ដើម្បីតម្លើងតួនាទីនានា នៅក្នុងបក្សយ៉ាងណានោះ? អតីតមន្រ្តីគណបក្សហ្វ៊ុនស៊ិនប៉ិចដែលរួមមានៈ លោក ញ៉េប ប៊ុនជិន លោកយូ ហុកគ្រី លោក វ៉ាន សុផាន់ណា និងលោក ប៉ោ ប៊ុនស្រ៊ឺ បានចេញមុខបដិសេធការចោទប្រកាន់នេះ។
បើតាមជំហរ មន្ត្រីទាំង៤បានអះអាងថា ពួកគេចង់ជួបសម្ដេចក្រុមព្រះនរោត្តម រណឬទ្ធ ជាលើកចុងក្រោយ។ ហើយបំណងចង់ជួបនោះមិនមែនឲ្យសម្ដេចក្រុមព្រះអន្តរាគមន៍ដើម្បីឲ្យពួកគេវិលចូលគណបក្សហ្វ៊ុនស៊ិនប៉ិចវិញទេ។ ប៉ុន្តែយ៉ាងក៏ដោយ ក្នុងចំណោមមន្ត្រីទាំង៤គឺលោក យូ ហុកគ្រី និង លោក ប៉ោ ប៊ុនស្រ៊ឺ បានប្រកាសមិនធ្វើនយោបាយទៀតឡើយ ហើយក៏មិនមានបំណងចូលរួមនយោបាយ ជាមួយគណបក្សកាន់អំណាចដែរ។
គួរកត់សម្គាល់ថា មុនបញ្ចប់សមាជិកភាពមន្ត្រីទាំង៤សម្ដេចក្រុមព្រះនរោត្តម រណឬទ្ធ ផ្ទេរតំណែងប្រធានគណបក្សស្តីទី ទៅឲ្យព្រះរាជបុត្រាច្បងនរោត្តម ចក្រាវុឌ្ឍ និងដក តំណែងលោក យឹម សាវី អគ្គលេខាធិការបក្ស ជំនួសដោយលោក ពេជ្រ សូដេថ្ថា កាលពីថ្ងៃទី៨ ខែសីហា ឆ្នាំ២០១៨។ សម្រាប់អ្នកវិភាគយល់ថា ផ្ទៃក្នុងគណបក្សហ្វ៊ុនកំពុងជាប់កុនបញ្ហាធ្ងន់ធ្ងរ ក្រោយការបណ្ដេញមន្ត្រីចាស់វស្សា ដែលជាគ្រឹះសំខាន់ចុងក្រោយរបស់ហ្វ៊ុនស៊ិនប៉ិច ចេញពីគណបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ