ការធ្វើជំរឿននៅកម្ពុជា មិនអាចបិទបញ្ចប់នៅថ្ងៃទី១៣មីនា តាមការគ្រោងទុកឡើយ
ការធ្វើជំរឿននៅកម្ពុជា ទំនងជាមិនអាចបញ្ចប់បានតាមការគ្រោងទុកនោះឡើយ ហើយអាចនឹងត្រូវបន្ថែមថ្ងៃជំរឿន២ថ្ងៃទៀត ពោលគឺដំណើរការរាប់ជំរឿននឹងត្រូវអូសបន្លាយរហូតដល់ថ្ងៃទី១៥មីនា។ ឧបសគ្គដែលធ្វើឲ្យដំណើរការជំរឿនត្រូវអូសបន្លាយពេលបន្ថែមនេះ គឺដោយសារការលាឈប់របស់មន្ត្រីជំរឿនជាបន្តបន្ទាប់។ នេះបើតាមលោកស្រី ហង់ លីណា អគ្គនាយិកាវិទ្យាស្ថានជាតិស្ថិតិនៃក្រសួងផែនការ ដែលបានថ្លែងប្រាប់វិទ្យុបារាំងអន្ដរជាតិកាលពីល្ងាចមិញ។
ចុះផ្សាយនៅថ្ងៃ៖
លោកស្រី ហង់ លីណា អគ្គនាយិកាវិទ្យាស្ថានជាតិស្ថិតិនៃក្រសួងផែនការបានអះអាងបន្តថា ដំណើរការរាប់ជំរឿនប្រជាជននឹងបន្ថែមពេល២ថ្ងៃរហូតដល់ថ្ងៃទី១៥មិនា សម្រាប់ខេត្តព្រះសីហនុ និងខេត្តសៀមរាប។ នេះក៏ដោយសារក្នុងចំណោមខេត្តក្រុងទាំង២៥ខេត្តព្រះសីហនុ និងខេត្តសៀមរាប ត្រូវបានរាយការណ៍មកថា មន្ត្រីលាឈប់មុនការកំណត់ច្រើនជាងគេ។
ក្រៅពីនេះ ដំណើរការរាប់ជំរឿនបានជួបបញ្ហាមួយចំនួនបន្ទាប់ពីមន្ត្រីជំរឿនចំនួន៥ម៉ឺននាក់លាឈប់ជាបន្តបន្ទាប់។ ការលាឈប់ដែលបណ្ដាលមកពីភាពលំបាកនៅក្នុងដំណើរការចុះរាប់ជំរឿនដែលបណ្ដាលមកពីកត្តាអាកាសធាតុក្ដៅខ្លាំង។ ដំណោះស្រាយចំពោះមុខវិទ្យាស្ថានជាតិស្ថិតិនៃក្រសួងផែនការលើកទឹកចិត្តឲ្យមន្ត្រីជំរឿនធ្វើការបន្ថែមទៅតាមលទ្ធភាពជាក់ស្ដែងដោយសារតែក្រសួងផែនការមិនអាចធ្វើការបណ្ដុះបណ្ដាលមន្ត្រីបន្ថែមទាន់ពេលវេលាឡើយ។ នេះបើតាមលោកស្រី ហង់ លីណា។
គួរជម្រាបដែរថា គិតមកដល់ថ្ងៃទី៥ នៃដំណើរការរាប់ជំរឿននេះខេត្តក្រុងមួយចំនួនទទួលបានទិន្នន័យ៤០ទៅ៥០ភាគរយហើយ ខណៈខេត្តខ្លះមិនទាន់បានបញ្ជូនទិន្នន័យមកកាន់ក្រសួងផែនការនៅឡើយដោយសារបញ្ហាអ៊ិនធើណេត។
សម្រាប់ការធ្វើជំរឿននៅកម្ពុជាក្នុងឆ្នាំ២០១៩ រដ្ឋាភិបាលកម្ពុជាគ្រោងចំណាយថវិកាសរុបចំនួនជាង៨លានដុល្លារ និងប្រើប្រាស់មន្ដ្រីជំរឿន៥ម៉ឺននាក់។ បើតាមក្រសួងផែនការ ការធ្វើជំរឿននេះ នឹងមានលក្ខណៈទំនើបជាងការធ្វើជំរឿនក្នុងឆ្នាំ១៩៩៨និងឆ្នាំ២០០៨កន្លងទៅ។ បើតាម លោកស្រី ហង់ លីណា តាមការប៉ាន់ស្មានមុនធ្វើជំរឿន ប្រជាជនខ្មែរមានជាង១៦លាននាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ