ឧទ្ធម្ភាគចក្រចិន៦គ្រឿង បានមកដល់កម្ពុជា ដើម្បីត្រៀមចូលរួមសមយុទ្ធនាគមាសឆ្នាំ២០១៩
ឧទ្ធម្ភាគចក្រចិនចំនួន៦គ្រឿង បានដឹកមកដល់ប្រទេសកម្ពុជាហើយ នៅព្រឹកថ្ងៃទី ១០ មីនានេះ ដើម្បីត្រៀមចូលរួមនៅក្នុងលំហាត់សមយុទ្ធនាគមាសឆ្នាំ២០១៩ រវាងកម្ពុជា-ចិន។ លំហាត់សមយុទ្ធដែលមានរយៈពេលជិត១ខែនេះ នឹងបើកជាផ្លូវការចាប់ពីថ្ងៃទី ១៣ មីនា តទៅ។
ចុះផ្សាយនៅថ្ងៃ៖
ឧទ្ធម្ភាគចក្រចិនទាំង៦គ្រឿងនេះ មានម៉ាក់ Mi17 ចំនួន៣គ្រឿង និងម៉ាក់ Z9 ចំនួន០៣គ្រឿង បានមកដល់ប្រទេសកម្ពុជា កាលពីព្រឹកថ្ងៃទី ១០ មីនា ខណៈសម្ភារៈនិងឧបករណ៍ផ្សេងៗទៀត មានដូចជា រថពាសដែក កំាភ្លើងធំ បាននិងកំពុងដឹកមកកម្ពុជាជាបន្តបន្ទាប់ទៀត។ លោក ឈុំ សុជាតិ អ្នកនាំពាក្យក្រសួងការពារជាតិបានអះអាងថា ការមកដល់នៃឧទ្ធម្ភាគចក្រចិនទាំង៦គ្រឿងនេះ គឺដើម្បីត្រៀមចូលរួមក្នុងលំហាត់សមយុទ្ធនាគមាសកម្ពុជា-ចិន ឆ្នាំ២០១៩ ដែលនឹងបើកជាផ្លូវការ ចាប់ពីថ្ងៃទី ១៣ ដល់ថ្ងៃទី ២៧ មីនា។ លំហាត់សមយុទ្ធជាទ្រង់ទ្រាយធំនេះ នឹងធ្វើឡើងនៅទីលានបាញ់គ្រាប់ពិត ស្ថិតនៅសាលាហ្វឹកហ្វឺនតេជោសែនជុំគីរី ស្ថិតនៅឃុំត្រពាំងរាំង ស្រុកជុំគីរី ខេត្តកំពត ដោយមានការចូលរួមពីកងទ័ពនៃប្រទេសទាំងពីរជិត៣០០០នាក់។
បើតាមលោក ឈុំ សុជាតិ ដដែល លំហាត់សមយុទ្ធនេះ ធ្វើឡើងដើម្បីពង្រឹងកិច្ចសហប្រតិបត្តិការល្អរវាងកងយោធពលខេមរភូមិន្ទ ជាមួយកងទ័ពរំដោះប្រជាជនចិន ដើម្បីផ្លាស់ប្តូរបទពិសោធ និងធ្វើលំហាត់រួមគ្នាលើកិច្ចការមនុស្សធម៌ ការជួយសង្គ្រោះគ្រោះមហន្តរាយ ការប្រឆាំងភេរវកម្ម និងការរក្សាសន្តិភាពនៅក្នុងក្របខ័ណ្ឌរបស់អង្គការសហប្រជាជាតិជាដើម។ លំហាត់សមយុទ្ធនេះ នឹងមានការចូលរួមពីកងទ័ពរំដោះប្រជាជនចិនចំនួន២៥២នាក់ និងភាគីកម្ពុជាជាង២ពាន់នាក់។ ចំណែកអាវុធយុទ្ធភណ្ឌសំខាន់ៗ ដែលប្រើប្រាស់នៅក្នុងលំហាត់នាគមាសនេះ មានដូចជា ឧទ្ធម្ភាគចក្រចិន៦គ្រឿង រថពាសដែក រថក្រោះ កាំភ្លើងធំ កាំភ្លើងត្បាល់ និងអាវុធគាំទ្រពីលើអាកាសជាដើម។ បើតាមលោក ឈុំ សុជាតិ តាមពិតទៅ លំហាត់សមយុទ្ធនាគមាសនេះ បានចាប់ផ្តើមតាំងពីថ្ងៃទី ២៨ កុម្ភៈ មកម្លេះ ប៉ុន្តែជាលំហាត់ផ្ទៃក្នុង។ ហើយនៅថ្ងៃទី ១៣ មីនា សប្តាហ៍ក្រោយនេះទៅ គឺជាពិធីបើកជាផ្លូវការ។
គួរជំរាបជូនថា ការធ្វើលំហាត់សមយុទ្ធនាគមាសជាទ្រង់ទ្រាយធំរវាងកងទ័ពកម្ពុជា-ចិននេះ បានធ្វើឡើងបន្ទាប់ពីប្រទេសកម្ពុជា បានផ្អាកការធ្វើសមយុទ្ធយោធាជាមួយកងទ័ពសហរដ្ឋអាមេរិក ចាប់តាំងពីឆ្នាំ២០១៧មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ