អតីតគណបក្សសង្គ្រោះជាតិអំពាវនាវជាថ្មីឲ្យដោះលែង លោក កឹម សុខា ខណៈការពន្យាពេលឃុំខ្លួនដល់កំណត់
អតីតគណបក្សសង្គ្រោះជាតិបានចេញសេចក្តីថ្លែងការណ៍មួយនៅថ្ងៃអាទិត្យនេះ ដោយអំពាវនាវជាថ្មីម្តងទៀតឲ្យដោះលែង លោក កឹម សុខា ជាបន្ទាន់ និងឥតលក្ខខណ្ឌ ព្រមទាំងអំពាវនាវដល់សហគមន៍អន្តរជាតិចាត់វិធានការក្លាំងក្លាថែមទៀត ដើម្បីឲ្យរដ្ឋាភិបាលរបស់លោកនាយករដ្ឋមន្រ្តី ហ៊ុន សែន ស្តាលទ្ធិប្រជាធិបតេយ្យឡើងវិញ។ សម្រាប់អ្នកនាំពាក្យរដ្ឋាភិបាលកម្ពុជា គ្មានអ្វីត្រូវឆ្លើយឆ្លងជាមួយគណបក្សដែលត្រូវបានតុលាការរំលាយចោលហើយនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
តាមរយៈសេចក្តីថ្លែងការណ៍ពីក្រៅប្រទេសដែលនៅបន្តប្រើប្រាស់និមិត្តសញ្ញាគណបក្សសង្រ្គោះជាតិ អតីតគណបក្សប្រឆាំងដ៍ធំមួយនេះបានរំលឹកថា មកដល់ថ្ងៃទី៣ខែមីនាឆ្នាំ២០១៩នេះ គឺមានរយៈពេល១៨ខែហើយ ដែលលោក កឹម សុខា ត្រូវបានអាជ្ញាធរទីក្រុងភ្នំពេញចាប់ឃុំខ្លួន។ ជាការឃុំខ្លួនទាំងនៅពន្ធនាគារត្រពាំងផ្លុង រួចបន្តមកនៅក្នុងផ្ទះមកទល់ពេលនេះ ដែលអតីតគណបក្សសង្រ្គោះជាតិ ហៅថាជាការឃុំខ្លួនដោយអយុត្តិធម៌ រំលោភលើច្បាប់ និងរដ្ឋធម្មនុញ្ញរបស់កម្ពុជា។
បើតាមអតីតគណបក្សប្រឆាំងនេះ ការចាប់ និងឃុំខ្លួន លោក កឹម សុខា ដោយរំលោភច្បាប់កំពូលរបស់ជាតិបែបនេះ គឺជាចេតនានយោបាយ ក្នុងការកម្ចាត់គូប្រជែងនយោបាយដ៍មានសក្តានុពល និងជាការបំបាក់ស្មារតីអ្នកប្រជាធិបតេយ្យ ដែលស្រលាញ់សេរីភាព ការគោរពសិទ្ធិមនុស្ស និងយុត្តិធម៌។
ក្រៅពីលើកហេតុផលទាំងនេះ អតីតគណបក្សសង្គ្រោះជាតិ បានអំពាវនាវជាថ្មីម្តងទៀត ឲ្យដោះលែង លោក កឹម សុខា ជាបន្ទាន់ និងឥតលក្ខខណ្ឌ ព្រមទាំងអំពាវនាវដល់សហគមន៍អន្តរជាតិ ចាត់វិធានការក្លាំងក្លាថែមទៀត ដើម្បីឲ្យរដ្ឋាភិបាលរបស់លោកនាយករដ្ឋមន្រ្តី ហ៊ុន សែន ស្តាលទ្ធិប្រជាធិបតេយ្យឡើងវិញ។
ទោះជាយ៉ាងណាក៏ដោយ អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានបញ្ជាក់យ៉ាងខ្លីថា លោកគ្មានអ្វីត្រូវឆ្លើយឆ្លងជាមួយគណបក្សដែលត្រូវបានតុលាការរំលាយចោលហើយនេះទេ ព្រោះបើលោកឆ្លើយតបមានន័យថាមិនគោរពសាលដីរបស់តុលាការកំពូល។ តុលាការកំពូលដែលបានរំលាយគណបក្សសង្រ្គោះជាតិ កាលពីចុងឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ