គណបក្សនយោបាយ៤ ជួបជុំនៅតាមទីស្នាក់ការបក្សនៅថ្ងៃដំបូងនៃយុទ្ធនាការឃោសនាបោះឆ្នោត
មានគណបក្សនយោបាយចំនួន៥ប៉ុណ្ណោះ ដែលឈរឈ្មោះបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ។ នៅថ្ងៃដំបូងនៃយុទ្ធនាការឃោសនាបោះឆ្នោតអសកលនេះ ក្រៅពីគណបក្សសង្គ្រោះជាតិ ដែលបានទៅជួបជុំនៅខេត្តកណ្តាល គណបក្ស៤ទៀត ក៏បានជួបជុំជាមួយ អង្គបោះឆ្នោតនៅតាមទីស្នាក់ការបក្សរៀងៗខ្លួនផងដែរ។
ចុះផ្សាយនៅថ្ងៃ៖
ស្តាប់ - ០២:២៨
នៅថ្ងៃដំបូងនេះយុទ្ធនាការឃោសនាបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ ហាក់មានសភាពស្ងប់ស្ងាត់ បើប្រៀបធៀបទៅនឹងការបោះឆ្នោតមុន។ ស្ងប់ស្ងាត់ដោយសារថា នេះជាការបោះឆ្នោតអសកល ហើយយុទ្ធនាការឃោសនាបានធ្វើឡើង សំដៅទៅរកតែសមាជិកក្រុមប្រឹក្សាឃុំសង្កាត់របស់គណបក្សនីមួយៗដែលជាអង្គបោះឆ្នោតប៉ុណ្ណោះ។
គណបក្សប្រជាជនកម្ពុជាដែលកំពុងកាន់អំណាច នៅថ្ងៃនេះ បានប្រមូលផ្តុំសមាជិកក្រុមប្រឹក្សាឃុំ សង្កាត់របស់ខ្លួន មកជួបជុំនៅតាមទីស្នាក់ការបក្ស ខេត្ត ក្រុង ស្រុក ខណ្ឌ រៀងៗខ្លួន ដោយនិយាយពីគោលនយោបាយ និងកម្មវិធីនយោបាយរបស់គណបក្សប្រជាជនតែប៉ុណ្ណោះ។ការជួបជុំ បានធ្វើឡើងនៅក្នុងក្របខណ្ឌទូទាំងប្រទេស ចាប់ពីថ្ងៃទី២ឧសភា រហូតដល់ថ្ងៃ ទី១៦ឧសភា។ នេះបើតាមការបញ្ជាក់ពីលោក ជាម យៀប និងលោក ឈាង វុន សមាជិកជាន់ខ្ពស់គណបក្សប្រជាជនកម្ពុជា។
ចំណែកឯគណបក្សហ្វុនស៊ីនប៉ិច ក៍មិនបានបង្ហាញការឃោសនាជាទ្រង់ទ្រាយធំដែរ ដោយគណបក្សនេះ គ្រាន់តែជួបជុំជាមួយអង្គបោះឆ្នោតនៅតាមខេត្ត ក្រុង ស្រុក ខណ្ឌ របស់ខ្លួនប៉ុណ្ណោះ។ នេះបើតាមការបញ្ជាក់ពីលោក ធៀង វណ្ណដារ៉ុង សមាជិកគណបក្ស ហ្វុនស៊ិនប៉ិច។ គណបក្សហ្វ៊ុនស៊ិនប៉ិច ដែលបានដាក់បេក្ខភាពក្រុមប្រឹក្សាខេត្តចំនួន៤ និងបេក្ខភាពក្រុមប្រឹក្សា ក្រុង ស្រុកចំនួន២។ គណបក្សនេះមានសមាជិកក្រុមប្រឹក្សាឃុំសង្កាត់ជាអង្គបោះឆ្នោតចំនួន ១៥១រូប។
ដោយឡែក គណបក្សសម្ព័ន្ធដើម្បីលទ្ធិប្រជាធិបតេយ្យ របស់លោក ខឹម វាសនា នៅថ្ងៃនេះ ក៍មិនមានអ្វីប្លែកដែរ ពោលគឺគណបក្សនេះ គ្រាន់តែចាក់ភ្លេង និង កម្មវិធីនយោបាយនៅតាមផ្សារនិងទីប្រជុំជនមួយចំនួននៅក្នុងស្រុកសូត្រនិគមខេត្តសៀមរាប។ ជាស្រុកតែ១គត់ ដែលគណបក្សនេះឈរឈ្មោះ។ គណបក្សសម្ព័ន្ធដើម្បីលទ្ធិប្រជាធិបតេយ្យ មានសមាជិក ឃុំ ចំនួន៥រូបនៅក្នុងស្រុកនេះ។ នេះបើតាមការបញ្ជាក់ពីលោក ខឹម វាសនា ជាប្រធានគណបក្ស។
មិនខុសគ្នានេះដែរ គណបក្សសាធារណរដ្ឋប្រជាធិបតេយ្យ ដែលចូលរួមដំបូងនៅក្នុងការបោះឆ្នោតអសកលនេះ ក៍មិនបានធ្វើយុទ្ធនាការទ្រង់ទ្រាយធំនោះដែរ។ នេះបើតាមការបញ្ជាក់ពីលោក ចាន់ យ៉េត ប្រធានស្តីទីគណបក្សសាធារណរដ្ឋប្រជាធិបតេយ្យ។
យុទ្ធនាការឃោសនាបោះឆ្នោត ក្រុមប្រឹក្សារាជធានី ខេត្ត ក្រុង ស្រុក ខណ្ឌ នឹងត្រូវបញ្ចប់ នៅថ្ងៃទី១៦ឧសភា ហើយថ្ងៃអាទិត្យទី១៨ឧសភា គឺជាថ្ងៃបោះឆ្នោត។ មានតែគណបក្សនយោបាយចំនួន៥ប៉ុណ្ណោះ ដែលឈរឈ្មោះបោះឆ្នោត ក្នុងនោះរួមមាន គណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីលទ្ធិប្រជាធិបតេយ្យ និងគណបក្សសាធារណរដ្ឋប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ