សាលារាជធានីភ្នំពេញ ច្រានចោលសំណើធ្វើសមាជមហាជនរបស់បក្សសង្គ្រោះជាតិជាលើកទី២
នៅទីបំផុតទៅ សាលារាជធានីភ្នំពេញ បានសម្រេចច្រានចោលសំណើទី២របស់គណបក្សសង្គ្រោះជាតិ ដែលសុំធ្វើសមាជមហាជននៅលើសួនច្បារមុខវត្តបុទុម ជំនួសទីតាំងទីលានប្រជាធិបតេយ្យ ដែលបានច្រានចោលម្តងរួចទៅហើយ។ ការច្រានចោលនេះ បានធ្វើឡើង បន្ទាប់ពីអាជ្ញាធរក្រុងភ្នំពេញ នៅរសៀលថ្ងៃសៅរិ៍នេះ បានជួបប្រជុំគ្នាប្រមាណជា២ម៉ោង ដើម្បីពិនិត្យទៅលើសំណើទី២របស់គណបក្សសង្គ្រោះជាតិ។ យ៉ាងណាក៍ដោយ មន្ត្រីគណបក្សសង្គ្រោះជាតិបញ្ជាក់ថា គណបក្សនេះ នឹងបន្តធ្វើសមាជមហាជនតាមការគ្រោងទុក នៅលើសួនច្បារមុខវត្តបុទុម ដោយមានអ្នកចូលរួម៥ពាន់នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
នៅទីបំផុតទៅ អាជ្ញាធរសាលារាជធានីភ្នំពេញ មិនអនុញ្ញាតឲ្យគណបក្សសង្គ្រោះជាតិ រៀបចំធ្វើសមាជមហាជននៅលើសួនច្បារមុខវត្តបុទុមវត្តីនោះទេ។ នេះគឺជាការច្រានចោលលើកទី២ ទៅនឹងសំណើសុំធ្វើសមាជមហាជនរបស់គណបក្សសង្គ្រោះជាតិ ដែលដើមឡើយគ្រោងរៀបចំនៅលើទីលានប្រជាធិបតេយ្យ ប៉ុន្តែត្រូវបានច្រានចោលម្តងរួចទៅហើយ ក្រោមហេតុផលថា រក្សាទុកទីលានប្រជាធិបតេយ្យឲ្យទំនេរដើម្បីឲ្យអាជ្ញាធរបន្តការស៊ើបអង្កេតនៅក្នុងការប៉ះទង្គិចគ្នានៅពេលមានបាតុកម្មនាពេលកន្លងមក។
លោក ឡុង ឌីម៉ង់ អ្នកនាំពាក្យសាលាក្រុងភ្នំពេញបានបញ្ជាក់ប្រាប់វិទ្យុបារាំងអន្តរជាតិនៅរសៀលថ្ងៃសៅរិ៍នេះថា អាជ្ញាធរក្រុងភ្នំពេញ បានទទួលដំណឹងក្រៅផ្លូវការរបស់គណបក្សសង្គ្រោះជាតិ ដែលបានស្នើសុំធ្វើសមាជមហាជននៅលើសួនច្បារមុខវត្តបុទុមវត្តី ជំនួសឲ្យការធ្វើសមាជនៅលើទីលានប្រជាធិបតេយ្យ ប៉ុន្តែសាលាក្រុងពុំអនុញ្ញាតបានទេ ដោយយោងទៅលើលិខិតរបស់ក្រសួងមហាផ្ទៃកាលពីថ្ងៃទី២៨ មីនា ដែលហាមមិនឲ្យគណបក្សសង្គ្រោះជាតិធ្វើសមាជនៅលើទីលានប្រជាធិបតេយ្យ និងទីតាំងសាធារណៈនានា។ បើតាមលោក ឡុង ឌីម៉ង់ ដដែល អាជ្ញាធរក្រុងក៍ពិបាកក្នុងការសម្រេចដែរ ដោយសារថា សំណើលើកទី២នេះ បានធ្វើឡើងនៅចំថ្ងៃចុងសប្តាហ៍ទៅហើយ។
យោងតាមលិខិតទី២របស់គណបក្សសង្គ្រោះជាតិដែលចេញផ្សាយនៅថ្ងៃទី២៩ មីនា គណបក្សនេះ បានស្នើសុំទីតាំងសួនច្បារមុខវត្តបុទុមវត្តី ដើម្បីរៀបចំធ្វើសមាជមហាជននៅថ្ងៃទី៣០ មីនា បន្ទាប់ពីបញ្ចប់ពិធីបុណ្យបង្សុកូលរម្លឹកវិញ្ញាណក្ខន្ធជូនជនរងគ្រោះដោយសារការគប់គ្រាប់បែកនៅមុខអតីតមន្ទីររដ្ឋសភាចាស់។ យោងតាមលិខិតនេះ គណបក្សសង្គ្រោះជាតិ នឹងរៀបចំធ្វើពិធីបង្សុកូលរាប់បាត្រ នៅចេតិយមុខអតីតមន្ទីររដ្ឋសភា ចាប់ពីម៉ោង៧ព្រឹក រហូតដល់ម៉ោង១២ថ្ងៃត្រង់ ហើយតភ្ជាប់នឹងពិធីបុណ្យនេះ គណបក្សសង្គ្រោះជាតិនឹងធ្វើសមាជមហាជន ចាប់ពីម៉ោង១២តទៅ រហូតដល់ម៉ោង៧ល្ងាច នៅលើទីតាំងសួនច្បារមុខវត្តបុទុមវត្តី ដោយមានការសំដែងមតិរបស់ប្រជាពលរដ្ឋ និងសង្គមស៊ីវិលនានាប្រមាណជា៥ពាន់នាក់។ សមាជនេះ ដឹកនាំដោយលោក សម រង្ស៊ី និងលោក កឹម សុខា។
យ៉ាងណាក៍ដោយ លោក ឡុង ឌីម៉ង់ បានបញ្ជាក់ថា សាលាក្រុងភ្នំពេញ អនុញ្ញាតឲ្យគណបក្សសង្គ្រោះជាតិធ្វើតែពិធីបុណ្យបង្សុកូលនៅលើសួនច្បារមុខវត្តបុទុមវត្តីនៅត្រឹមម៉ោង១១និង៣០នាទីប៉ុណ្ណោះ ហើយប្រសិនបើ គណបក្សនេះ បន្តការជួបជុំបន្តនោះមានន័យថា គណបក្សនេះនឹងរំលោភច្បាប់ ហើយអាជ្ញាធរនឹងចាត់វិធានការតាមច្បាប់។ បើទោះបីជាមានការព្រមានបែបនេះក្តី លោក ហូរ វ៉ាន់ ប្រធានគណៈកម្មការប្រតិបត្តិរាជធានីភ្នំពេញនៃគណបក្សសង្គ្រោះជាតិបានបញ្ជាក់ចុងក្រោយថា សមាជមហាជនរបស់គណបក្សសង្គ្រោះជាតិ នឹងនៅតែធ្វើតាមការគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ