សាលារាជធានីភ្នំពេញ មិនអនុញ្ញាតឱ្យបក្សសង្គ្រោះជាតិធ្វើសមាជប្រជាជនទេ
ក្រោយការដាក់លិខិតជូនដំណឹងទៅសាលាក្រុងភ្នំពេញស្តីពីការជួបជុំធ្វើវេទិកាសាធារណៈរបស់គណបក្សសង្គ្រោះជាតិកាលពីម្សិលមិញ សាលារាជធានីភ្នំពេញបានបដិសេធ មិនអនុញ្ញាតឱ្យមានការប្រមូលផ្តុំនោះទេ ដោយលើកឡើងពីហេតុផលថា ទីលានប្រជាធិបតេយ្យត្រូវទុកឱ្យទំនេរដើម្បីឱ្យមានការស៊ើបអង្កេតពាក់ព័ន្ធបាតុកម្មហិង្សា កាលពីដើមខែមករាកន្លងទៅនេះ។ ប៉ុន្តែអនុញ្ញាតឱ្យគណបក្សប្រឆាំងប្រារព្ឋពិធីបង្សុកូលរម្លឹកដល់អ្នកស្លាប់នៅមុខមន្ទីររដ្ឋសភាចាស់។ យ៉ាងណាក៏ដោយ ប្រធានគណបក្សសង្គ្រោះជាតិ អះអាងថានឹងអាចជួបជុំតាមរបៀបផ្សេងទៀតដើម្បីស្រង់មតិរបស់ប្រជាពលរដ្ឋដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
វេទិកាសាធារណៈរបស់គណបក្សសង្គ្រោះជាតិដែលគ្រោងធ្វើឡើងនៅទីលានប្រជា ធិប តេយ្យនោះ សាលារាជធានីភ្នំពេញមិនអនុញ្ញាតឱ្យប្រារព្ឋនោះឡើយ។ ប៉ុន្តែអនុញ្ញាតឱ្យគណបក្សប្រឆាំងរៀបចំពិធីបង្សុកូលរម្លឹកវិញ្ញាណក្ខន្ធនៅចេតិយ ខាងមុខមន្ទីររដ្ឋសភាចាស់ ជូនអ្នកស្លាប់ដោយព្រឹត្តិការណ៍គប់គ្រាប់បែកកាលពីឆ្នាំ១៩៩៧ ។ នេះបើតាមការបញ្ជាក់របស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញនៅព្រឹកថ្ងៃព្រហស្បតិ៍នេះ ក្រោយកិច្ចប្រជុំរវាងតំណាងគណបក្សសង្គ្រោះជាតិ និងសាលារាជធានី។
បើតាមអ្នកនាំពាក្យសាលារាជធានីភ្នំពេញដដែល ការទុកឱ្យទីលានប្រជាធិតេយ្យទំនេរដើម្បីឱ្យស្ថាប័នពាក់ព័ន្ធរបស់រដ្ឋបន្តការស៊ើបអង្កេតទាក់ទងនឹងព្រឹត្តិការណ៍ហិង្សាដែលបានបណ្តាលឱ្យមានមនុស្សស្លាប់និងរងរបួសកាលពីថ្ងៃទី២-ទី៣ មករា រួមទាំងការចាក់សោរបិទទ្វាររបងសាលារាជធានីភ្នំពេញពីជនមិនស្គាល់មុខដែលគេសង្ស័យថាជាមនុស្សដែលចូលរួមនៅទីលានប្រជាធិបតេយ្យ កាលពីពេលកន្លងទៅដែរនោះ គឺជាមូលហេតុរបស់សាលារាជធានីភ្នំពេញ។ ដោយឡែកពិធីសាសនារបស់គណបក្សសង្គ្រោះជាតិ នៅមុខមន្ទីររដ្ឋសភាជាតិចាស់នោះ លោក ឡុងឌីម៉ង បន្ថែមថា ត្រូវរងចាំគោលការណ៍ពីក្រសួងមហាផ្ទៃចំពោះការរៀបចំពិធីសាសនានេះ។ រង់ចាំគោលការណ៍ពីក្រសួងមហាផ្ទៃគឺដោយសារតែពិធីសាសនាបង្សុកូលរបស់បក្សប្រឆាំងនៅចុងសប្តាហ៍នេះ មានការចូលរួមតំណាងអង្គទូតប្រចាំព្រះរាជាណាចក្រកម្ពុជា។
នៅកិច្ចប្រជុំជាមួយសាលារាជធានីភ្នំពេញពេញមួយព្រឹកនេះ គឺលោក ហូរ វ៉ាន់ ជាតំណាងចរចាពីគណបក្សសង្គ្រោះជាតិ។ សូមរម្លឹកថា វេទិការជួបជុំរបស់គណបក្សសង្គ្រោះជាតិដែលគ្រោងធ្វើឡើងនៅថ្ងៃអាទិត្យចុងសប្តាហ៍នេះ គឺដើម្បីធ្វើសមាជស្តីពីបញ្ហានយោបាយនៅកម្ពុជាបច្ចុប្បន្ន។
តាមសេចក្តីជូនដំណឹងរបស់គណបក្សសង្គ្រោះជាតិទៅសាលារាជធានីភ្នំពេញ កាលពីម្សិលមិញ ពិធីជួបជុំនៅចុងសប្តាហ៍នេះ គឺដឹកនាំដោយលោក សម រង្ស៊ី និង លោក កឹម សុខា ដោយមានមនុស្សចូលរួមប្រមាណ៥ពាន់អ្នក។ ថ្លែងប្រាប់វិទ្យុបារាំងអន្តរជាតិRFI នៅព្រឹកនេះប្រធានគណបក្សសង្គ្រោះជាតិ លោក សម រង្ស៊ី បានបញ្ជាក់ថា គណបក្សសង្គ្រោះជាតិនឹងរកមធ្យោបាយផ្សេងរៀបចំពិធីជួបជុំដើម្បីស្រង់មតិ និងឆន្ទៈរបស់ពលរដ្ឋម្ចាស់ឆ្នោតដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ