ប្រតិភូសភាសហភាពអឺរ៉ុបជួបសង្គមស៊ីវិលបន្ទាប់ពីជួបអ្នកនយោបាយ
ក្រោយពីបានជួបពិភាក្សាជាមួយតំណាងរដ្ឋសភា រដ្ឋាភិបាល គណបក្សកាន់អំណាច និងគណបក្សប្រឆាំងរួចមក គណៈប្រតិភូសភាហភាពអឺរ៉ុបបានជួបជាមួយសង្គមស៊ីវិលម្តងនៅព្រឹកថ្ងៃព្រហស្បតិ៍នេះ។ ជាជំនួបដែលសហភាពអឺរ៉ុបចង់ដឹងពីបញ្ហាដែលលើកឡើងដោយអង្គការសង្គមស៊ីវិលទាក់ទងនឹងបញ្ហាសិទ្ធិមនុស្ស និងប្រជាធិបតេយ្យនៅកម្ពុជា។ អង្គការសង្គមស៊ីវិលបានផ្តោតសំខាន់លើសេរីភាពសម្តែងមតិ ដែលត្រូវបានអាជ្ញាធររារាំង។
ចុះផ្សាយនៅថ្ងៃ៖
ស្តាប់ - ០២:៣៤
នៅក្នុងជំនួបជាមួយគណៈប្រតិភូសភាសហភាពអឺរ៉ុបនៅព្រឹកថ្ងៃព្រហស្បតិ៍នេះ អង្គការសង្គមស៊ីវិលបានលើកបញ្ហាជាច្រើនប្រាប់ដល់សហភាពអឺរ៉ុប។ បញ្ហាទាំងនោះទាក់ទងជាពិសេសដល់ការគោរពសិទ្ធិមនុស្ស និង ប្រជាធិបតេយ្យនៅកម្ពុជា។
លោក ធន់ សារ៉ាយ ប្រធានអង្គការការពារសិទ្ធិមនុស្ស អាដហុក បានប្រាប់វិទ្យុបារាំងអន្តរជាតិនៅក្រោយជំនួបនោះថា ប្រតិភូសភាសហភាពអឺរ៉ុបចង់ស្វែងយល់ពីបញ្ហាពិតនៅកម្ពុជា។ ឆ្លើយតបនឹងការចង់ដឹងនោះ សង្គមស៊ីវិលបានលើកបញ្ហាសំខាន់ៗដូចជា បញ្ហាសេរីភាពសម្តែងមតិដែលត្រូវបានអាជ្ញាធររដ្ឋាភិបាលរារាំងមិនឲ្យមានការជួបជុំធ្វើបាតុកម្ម បញ្ហាដីធ្លី បញ្ហាប្រាក់ខែកម្មករ និងការរំលោភបំពានសិទ្ធិមនុស្សជាច្រើនទៀត។
បើយោងតាម លោក ធន់សារ៉ាយ សង្គមស៊ីវិលចាត់ទុកការរារាំងមិនឲ្យជួបជុំបញ្ចេញមតិជារឿងធ្ងន់ធ្ងរសម្រាប់ប្រជាធិបតេយ្យនៅកម្ពុជា។ អង្គការក្រៅរដ្ឋាភិបាលក៏បានសំណូមពរឲ្យសហភាពអឺរ៉ុបជួយអន្តរាគមន៍តាមលទ្ធភាពដែលអាចធ្វើបានដើម្បីដាក់សម្ពាធទៅលើរដ្ឋាភិបាលក្រុងភ្នំពេញឲ្យដោះស្រាយបញ្ហាដែលកំពុងតែប្រឈមនៅពេលនេះ។
សូមបញ្ជាក់ថា គណៈប្រតិភូសភាសហភាពអឺរ៉ុបដែលមានគ្នា ៧ នាក់បានមកដល់ភ្នំពេញកាលពីល្ងាចថ្ងៃអង្គារដើម្បីបំពេញទស្សនកិច្ចផ្លូវការរយៈពេល ៤ ថ្ងៃនៅកម្ពុជា។ ដំណើរទស្សនកិច្ចនេះគឺដើម្បីសិក្សាអំពីទំនាក់ទំនងកិច្ចសហប្រតិបត្តិការរវាងសភាសហគមន៍អឺរ៉ុបនិងកម្ពុជា និងក៏ដើម្បីស្វែងយល់អំពីគម្រោងទាំងឡាយ ដែលទ្រទ្រង់ថវិកាដោយសហគមអឺរ៉ុប ដូចជាសាលាក្តីខ្មែរក្រហម ការបោះឆ្នោតសាកល បញ្ហាដីធ្លី និងបញ្ហាលទ្ធិប្រជាធិបតេយ្យនៅកម្ពុជាជាដើម។
សមាជិកសភាអឺរ៉ុប ក៏ត្រូវស្វែងយល់ពីផលប៉ះពាល់ទាំងឡាយ ដែលកើតចេញពីគម្រោងផលិតទំនិញផ្សេងៗ ដើម្បីយកទៅលក់នៅលើទីផ្សារអឺរ៉ុប ព្រមទាំងផលប៉ះពាល់នៃគម្រោងអភិវឌ្ឍន៍ទៅលើប្រជាពលរដ្ឋ ក្នុងសហគមនានាផងដែរ។ គណៈប្រតិភូបានជួបរួចហើយ
កាលពីថ្ងៃពុជាមួយលោកស្រី ឃួន សុដារី អនុប្រធានទី២ រដ្ឋសភា លោក ឈាង វុន ប្រធានគណៈកម្មការកិច្ចការបរទេសនៃរដ្ឋសភា និងជួបជាមួយតំណាងរដ្ឋាភិបាល គណបក្សកាន់អំណាច និងមេដឹកនាំបក្សប្រឆាំងផងដែរ។
ក្នុងជំនួបទាំងនោះ សុទ្ធតែបានផ្តោតសំខាន់លើបញ្ហានយោបាយក្រោយការបោះឆ្នោតដែលគណបក្សជាប់ឆ្នោតទាំងពីរមិនអាចធ្វើការជាមួយគ្នាបាន។ បើយោងតាមលោក ធន់ សារ៉ាយ ជំនួយរបស់សហភាពអឺរ៉ុបសុទ្ធតែចងភ្ជាប់ជាមួយបញ្ហាសំខាន់ពីរ គឺការគោរពសិទ្ធិមនុស្ស និងប្រជាធិបតេយ្យ។ ដូច្នេះ ព័ត៌មានទាំងឡាយដែលសហភាពអឺរ៉ុបទទួលបាននឹងក្លាយជាមូលដ្ឋានសម្រាប់ពិចារណាក្នុងការបន្តកិច្ចសហប្រតិបត្តិការទ្វេភាគីកម្ពុជាសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ