គណបក្សទាំងពីរកំពុងលេងយុទ្ធសាស្ត្រវាយផង ចរចាផង
លោកនាយករដ្ឋមន្ត្រី ហ៊ុន សែន បានប្រកាសឲ្យដឹងនៅថ្ងៃចន្ទនេះថា ក្រុមអ្នកច្បាប់របស់រដ្ឋាភិបាលកំពុងសិក្សា និងរៀបចំពាក្យបណ្តឹងប្រឆាំងលោក សម រង្ស៊ី ពីបទប្រឆាំងសេចក្តីសម្រេចរបស់ក្រុមប្រឹក្សាធម្មនុញ្ញ។ នៅថ្ងៃនេះដែរ លោក សម រង្ស៊ី ក៏បានព្រមានថានឹងធ្វើបាតុកម្មធំមួយ នៅថ្ងៃទី២ ឧសភា ខាងមុខ។ ប៉ុន្តែ ទន្ទឹមនឹងនោះ គណបក្សទាំងពីរសុទ្ធតែបានបង្ហើបឲ្យដឹងពីកិច្ចចរចាគ្នាជាសម្ងាត់ដែលអាចនឹងមានលទ្ធផលក្នុងពេលឆាប់ៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ថ្លែងក្នុងពិធីចែកសញ្ញាបត្រដល់និស្សិតបញ្ចប់ការសិក្សានៅឯកោះពេជ្រ នៅព្រឹកថ្ងៃចន្ទទី ៧ មេសានេះ លោកនាយករដ្ឋមន្ត្រី ហ៊ុន សែន បានប្រកាសថា ក្រុមអ្នកច្បាប់របស់រដ្ឋាភិបាលកំពុងសិក្សាប្តឹងលោក សម រង្ស៊ី ពីបទប្រឆាំងនឹងសេចក្តីសម្រេចរបស់ក្រុមប្រឹក្សា ធម្ម នុញ្ញ ពីព្រោះនៅកម្ពុជាគ្មានច្បាប់ចែងពីទោសប្រមាថព្រះមហាក្សត្រឡើយ។
លោកនាយករដ្ឋមន្ត្រី ហ៊ុន សែន ក៏បានព្រមានលោក សម រង្ស៊ី កុំឲ្យរត់ចូលស្ថានទូតបរទេសដើម្បីគេចខ្លួន។ លោកបញ្ជាក់ថា ប្រសិនបើរដ្ឋាភិបាលត្រូវចាត់វិធានការផ្លូវច្បាប់នោះទោះជាលោក សម រង្ស៊ី រត់ឡើងយន្តហោះក៏មិនអាចគេចខ្លួនបានដែរ។
ប៉ុន្តែ លោក សម រង្ស៊ី ប្រធានគណបក្សសង្គ្រោះជាតិក៏បានព្រមានតបវិញថានឹងរៀបចំមហាបាតុកម្មមួយដែលអាចមានអ្នកចូលរួម២លាននាក់។ មហាបាតុកម្មនេះអាចនឹងត្រូវធ្វើឡើងនៅថ្ងៃទី២ឧសភាដែលជាថ្ងៃបើកយុទ្ធនាការឃោសនាបោះឆ្នោតក្រុមប្រឹក្សារាជធានីខេត្តស្រុខខណ្ឌ។ មេដឹកនាំបក្សប្រឆាំងអះអាងថា មិនរត់គេចខ្លួនទេហើយសុខចិត្តចូលគុកប្រសិនបើត្រូវគេចាប់ខ្លួនក្នុងសំណុំរឿងនេះមែន។ នេះជាការប្រកាសរបវស់លោកសម រង្ស៊ីប្រាប់អ្នកគាំទ្រក្នុងពិធីរម្លឹកខួបមួយឆ្នាំរបស់គណបក្សនៅព្រឹកថ្ងៃចន្ទនេះ។
ប៉ុន្តែ ទន្ទឹមនឹងការផ្លោងពាក្យសម្តីដាក់គ្នាយ៉ាងគ្រោតគ្រាតនេះ មេដឹកនាំគណបក្សទាំងពីរសុទ្ធតែបានប្រកាសប្រាប់មហាជនអំពីការចរចាជាសម្ងាត់ជាមួយគ្នាដើម្បីស្វះស្វែងរកដំណោះស្រាយនយោបាយ។ លោកសម រង្ស៊ីបញ្ជាក់ថា ក្រុមការងារគណបក្សទាំងពីរអាចចេញសេចក្តីថ្លែងការណ៍រួមគ្នាមួយក្នុងពេលឆាប់ៗនេះ ឬអាចចូលគាល់ព្រះមហាក្សត្ររួមគ្នាក៏ថាបាន ហើយប្រសិនបើមានកិច្ចព្រមព្រៀងបែបនេះមែន បាតុកម្មដ៏ធំដែលគ្រោងធ្វើនៅថ្ងៃទី២ឧសភាខាងមុខនឹងត្រូវលុបចោលវិញ។
ចំណែកលោកនាយករដ្ឋមន្ត្រី ហ៊ុន សែន ក៏បានផ្តល់ព័ត៌មានស្រដៀងគ្នានេះដែរ។ លោកបញ្ជាក់ថា គណបក្សទាំងពីរនឹងបន្តជួបគ្នានៅព្រឹកថ្ងៃចន្ទនេះដើម្បីពិភាក្សាបញ្ចប់បញ្ហាដែលនៅសេសសល់ហើយលទ្ធផលនៃកិច្ចចរចានេះនឹងដឹងនៅពេលឆាប់។ ស្តាប់ទៅគណបក្សទាំងពីរហាក់កំពុងលេងយុទ្ធសាស្ត្រវាយផងចរចាផងដើម្បីដាក់សម្ពាធលើគ្នាទៅវិញទៅមក។ មហាជនខ្មែរកំពុងរង់ចាំអ៊ុតមើលលទ្ធផលចុងក្រោយនៃល្បែងនយោបាយដែលបានអូសបន្លាយជិត៩ខែមកហើយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ