កម្ពុជា និងភាគីពាក់ព័ន្ធនៅតែជម្រុញឲ្យឡាវសិក្សាបន្ថែមទៀតពាក់ព័ន្ធការសាងសង់ទំនប់វារីអគ្គិសនីដនសាហុង
ទោះបីការប្រជុំរយៈពេល ២ ថ្ងៃស្តីពីបញ្ហាទន្លេមេគង្គនៅក្នុងទីក្រុងហូជីមិញ ប្រទេសវៀតណាមមិនបានលើកយកបញ្ហាសាងសង់ទំនប់វារីអគ្គិសនីដនសាហុងជាប្រធានបទសំខាន់ដ៏ដោយ ក៏កម្ពុជា និងភាគីពាក់ព័ន្ធនៅតែជម្រុញឲ្យភាគីឡាវសិក្សាវាយតម្លៃពីផលប៉ះពាល់បរិស្ថានបន្ថែមទៀតទៅលើប្រទេសជិតខាង។លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានប្រាប់អ្នកកាសែតក្រោយពីត្រឡប់ពីកិច្ចប្រជុំនោះ ថា កម្ពុជាតែងតែបានស្នើឲ្យប្រទេសឡាវផ្អាកការសាងសង់ទំនប់វារីអគ្គិសនីដនសាហុង ហើយបញ្ហានេះនឹងនៅតែលើកមកពិភាក្សាក្នុងកិច្ចប្រជុំនាពេលខាងមុខបន្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ថ្លែងប្រាប់អ្នកកាសែតនៅព្រលានយន្តហោះអន្តរជាតិភ្នំពេញ កាលពីរសៀលថ្ងៃទី០៥ មេសា លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមបានឲ្យដឹងថា កិច្ចប្រជុំជាមួយប្រទេសពាក់ព័ន្ធនឹងបញ្ហាទន្លេមេគង្គមិនបានផ្តោតសំខាន់តែលើគម្រោងសាងសង់ទំនប់វារីអគ្គិសនីដនសាហុងរបស់ឡាវនោះទេ តែបាននិយាយជាទូទៅ។
លោក លឹម គានហោ បានអមដំណើរលោកនាយករដ្ឋមន្ត្រី ហ៊ុន សែន ទៅចូលរួមកិច្ចប្រជុំក្រោមប្រធានបទ " ទឹក ថាមពល និងសន្តិសុខស្បៀង នៅក្នុងបរិបទបម្រែបម្រួលអាកាសធាតុសម្រាប់អាងទន្លេមេគង្គ"នៅក្នុងទីក្រុង ហូជីមិញ ប្រទេសវៀតណាមរយៈពេលពីរថ្ងៃចាប់ពីថ្ងៃទី០៤ដល់ថ្ងៃទី០៥ មេសា។
លោករដ្ឋមន្ត្រីក្រសួងធនធានទឹក និងឧតុនិយមបានដឹងទៀតថា ប្រមុខរដ្ឋាភិបាលកម្ពុជា និងភាគីពាក់ព័ន្ធផ្សេងទៀតបានស្នើឲ្យរដ្ឋាភិបាលឡាវធ្វើការសិក្សាឲ្យបានទូលំទូលាយបន្ថែមទៀតអំពីផលប៉ះពាល់នៃកម្រោងសាងសង់ទំនប់វារីអគ្គិសនីដនសាហុង។បើតាមលោករដ្ឋមន្ត្រី កន្លងមកភាគីឡាវបានសិក្សាផលប៉ះពាល់តែនៅក្នុងទឹកដីរបស់ខ្លួនតែប៉ុណ្ណោះ គឺមិនបានសិក្សាស៊ីជម្រៅដល់ប្រទេសពាក់ព័ន្ធដូចជាកម្ពុជា វៀតណាម និងថៃនោះឡើយ។យ៉ាងណាក៏ដោយ លោកលឹម គានហោ បានអះអាងថា បញ្ហាទំនប់វារីអគ្គិសនីដនសាហុងនេះ នឹងលើកមកពិភាក្សាជាបន្តទៀតក្នុងកិច្ចប្រជុំលើកទី៣ក្នុងឆ្នាំ២០១៨ ដែលកម្ពុជានឹងធ្វើជាម្ចាស់ផ្ទះ។
លោក ជា សារុំ ប្រធានផ្នែកស្រាវជ្រាវ និង ព័ត៌មានរបស់វេទិកានៃអង្គការមិនមែនរដ្ឋាភិបាលស្តីពីកម្ពុជាបាននិយាយថា ការជម្រុញរបស់រដ្ឋាភិបាលកម្ពុជាឲ្យភាគីឡាវសិក្សាថែមទៀតពាក់ព័ន្ធនឹងទំនប់វារីអគ្គិសនីដនសាហុងនេះជាចំណុចវិជ្ជមាន។លោកបន្តថា លោកចង់ឡាវសិក្សា និងពិនិត្យឲ្យបានស៊ីជម្រៅពីផលប៉ះពាល់នៃការសាងសង់ទំនប់វារីអគ្គិសនីនេះ។
បើតាមលោក ជា សារុំ វេទិកានៃអង្គការមិនមែនរដ្ឋាភិបាលស្តីពីកម្ពុជា ចង់ឲ្យរដ្ឋាភិបាលឡាវបញ្ឍប់កម្រោងសាងសង់ទំនប់នេះតែម្តង ពីព្រោះវានឹងផ្តល់ផលប៉ះពាល់យូរអង្វែងដល់ការប្រជាពលរដ្ឋដែលរស់នៅជាប់ដងទន្លេមេគង្គ។
សូមជំរាបជូនថា ទំនប់វារីអគ្គិសនី ដនសាហុង ដែលមានថាមពល ២៦០ មេហ្គាវ៉ាត់ គឺជាទំនប់មួយក្នុងចំណោមគម្រោងទំនប់វារីអគ្គិសនីទាំង ១២ ដែលត្រូវគេគ្រោងសាងសង់ទៅលើតួទន្លេមេនៃទន្លេមេគង្គក្រោម។ ទំនប់នេះស្ថិតនៅក្នុងតំបន់ស៊ីផាន់ដន ក្នុងខេត្តចំប៉ាសាក់របស់ឡាវ ដែលមានចំងាយប្រមាណជា២គីឡូម៉ែតប៉ុណ្ណោះពីព្រំដែនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ