កម្ពុជាគ្រោងបង្កើតសាលាភាពយន្តនៅខែវិច្ឆិកាខាងមុខ
អង្គការភាពញញឹមនៃកុមារនឹងដាក់អោយដំណើរការសាលាភាពយន្តលើកដំបូងនៅក្នុងប្រទេសកម្ពុជានៅដើមខែវិច្ឆិកាខាងមុខនេះ។ សាលាភាពយន្តដែលគ្រោងនឹងបង្កើតឡើងមានគោលបំណងពីរយ៉ាងសំខាន់ៗ។ ទីមួយ ៖ បណ្តុះបណ្តាលអ្នកជំនាញថតភាពយន្តនិងទីពីរ៖ជំរុញអោយវិស័យភាពយន្តខ្មែររស់ឡើងវិញ។
ចុះផ្សាយនៅថ្ងៃ៖
ស្តាប់ - ០១:៥៩
ក្នុងខណៈពេលដែលវិស័យភាពយន្តខ្មែរស្ទើរតែបាត់ឈ្មោះពីលើទីផ្សាររបស់ខ្លួននោះ អង្គការភាពញញឹមនៃកុមារដែលហៅកាត់តាមភាសារបារាំងថា PSE គ្រោងនឹងបង្កើតសាលាភាពយន្តនៅដើមខែវិច្ឆិកាខាងមុខនេះ។ នេះគឺជាសាលាភាពយន្តដំបូងគេនៅក្នុងប្រទេសកម្ពុជាដែលត្រូវបង្កើតឡើងនៅក្នុងវិទ្យាស្ថាន PSE មានទីតាំងនៅក្នុងសង្កាត់ស្ទឹងមានជ័យរាជធានីភ្នំពេញ។ កូនសិស្សក្រីក្រចំនួន១២នាក់នឹងត្រូវជ្រើសរើសអោយចូលរៀនក្នុងសាលាភាពយន្តនេះដើម្បីទទួលបានជំនាញកាមេរ៉ាមែន ជំនាញយកសំឡេង ជំនាញរូបភាព ជំនាញកាត់ត និងជំនាញសមិទ្ធិករ។ ការសិក្សាមានរយៈពេល៤ឆ្នាំពោលគឺកម្រិតបរិញ្ញាប័ត្រ។
លោក ពិជ សុភ័ណ អ្នកទទួលខុសត្រូវជាន់ខ្ពស់ម្នាក់នៃសាលាភាពយន្ត PSE បានបញ្ជាក់ប្រាប់ថា ការបង្កើតសាលានេះឡើងគឺមានគោលបំណងពីរយ៉ាងសំខាន់ៗ។ ទីមួយ ៖ បណ្តុះបណ្តាលអ្នកជំនាញថតភាពយន្តនិងទីពីរ៖ជំរុញអោយវិស័យភាពយន្តខ្មែររស់ឡើងវិញ។ លោក Des Pallieres Christian ស្ថាបនិកអង្គការភាពញញឹមនៃកុមារនិងស្ថាបនិកនៃសាលាភាពយន្តបានបន្ថែមទៀតថា ការបង្កើសាលានេះឡើងគឺដោយសារយុវជនខ្មែរជាច្រើនចង់ក្លាយជាអ្នកជំនាញខាងភាពយន្តម៉្យាងនិងម៉្យាងទៀតសមិទ្ធិករខ្មែរវ័យចំណាស់នៅសល់តិចតួចប៉ុណ្ណោះ។
លោក ជា ចន្ទបរិបូរណ៍ អ្នកជំនាញឯករាជ្យខាងតន្រ្តីនិងភាពយន្តនៅក្នុងប្រទេសកម្ពុជាបានអបអសាទរដំណឹងនៃការបង្កើតសាលាភាពយន្តលើកដំបូងនៅក្នុងប្រទេសកម្ពុជា។ លោកបានពន្យល់ថា៖«មានសាលា ទើបមានធនធានមនុស្ស មានធនធានមនុស្សល្អ ទើបអាចផលិតភាពយន្តបានល្អ»។ នាពេលកន្លងមក ភាពយន្តខ្មែរដែលត្រូវបានមហាជនរិះគន់ថាមិនល្អនោះ គឺមិនមែនបណ្តាលមកពីផលិតករ ខ្វះទុនផលិតតែម្យ៉ាងនោះទេ តាមពិត ភាពយន្តខ្មែរមិនល្អគឺអាចបណ្តាលមកពីសមត្ថភាពផលិតករច្រើនជាងកត្តាផ្សេងៗទៀត។
សូមបញ្ជាក់ថា ទស្សនិកជនខ្មែរមិនអោយតម្លៃភាពយន្តខ្មែរខ្លួនឯង ហើយបែរទៅចាប់អារម្មណ៍លើភាពយន្តថៃ កូរ៉េ ចិន អាមេរិកកាំងនោះ ពីព្រោះបច្ចេកទេសថតនិងអត្ថន័យនៃភាពយន្តខ្មែរនៅមានកម្រិតទាបពេក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ