កម្ពុជាបដិសេធថា មិនជាប់ពាក់ព័ន្ធនឹងបាតុកម្មវឹកវរក្នុងប្រទេសថៃ
ស្របពេលដែលប្រទេសថៃកំពុងជួបភាពវឹកវរជាថ្មី ទីស្តីការគណៈរដ្ឋមន្ត្រីកម្ពុជាបានបដិសេធថា កម្ពុជាមិនជ្រៀតជ្រែកចូលកិច្ចការផ្ទៃក្នុងប្រទេសជិតខាងទេ។ ផ្ទុយទៅវិញ កម្ពុជាចង់រួមរស់ដោយសន្តិសហវិជ្ជមានជាមួយប្រទេសទាំងអស់ក្នុងពិភពលោក។ ការបដិសេធបែបនេះបានធ្វើឡើង បន្ទាប់ពីបណ្តាញផ្សាយព័ត៌មានថៃមួយបានចោទថា លោកថាក់ស៊ីន អតីតនាយករដ្ឋមន្ត្រីថៃ ត្រៀមប្រើប្រាស់ពលរដ្ឋខ្មែរ ៥០០០ នាក់ក្រោមការជួយឧបត្ថម្ភរបស់លោកនាយករដ្ឋមន្ត្រី ហ៊ុន សែន ដើម្បីធ្វើចលាចលក្នុងពេលក្រុមអាវលឿងប្រមូលផ្តុំគ្នាក្នុងមហាបាតុកម្មនៅក្រុងបាងកកនៅថ្ងៃសៅរ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
សកម្មជនអាវលឿងថៃម្នាក់គឺលោក សូមកៀត ផុងផៃប៊ូន បានថ្លែងប្រាប់គេហទំព័រ ASTV Manager Online របស់ថៃថា មានក្រុមខ្មែរសេរី ៣ខ្សែចំនួនប្រមាណពី៤ ទៅ ៥ពាន់នាក់ ដែលជាកម្លាំងរបស់កម្ពុជា នឹងក្លែងខ្លួនធ្វើជាពួកអាវក្រហមថៃដើម្បីគាំទ្ររដ្ឋាភិបាលលោកស្រីយីងឡាក់ ស៊ីណាវ៉ាត្រា។ ក្រុមជនកម្ពុជាទាំងនោះទទួលថវិកាពីលោកនាយករដ្ឋមន្ត្រី ហ៊ុន សែន ចំនួន ១០០លានបាតដើម្បីទៅបង្កចលាចលនៅក្នុងការប្រមូលផ្តុំគ្នាក្នុងប្រទេសថៃ ដែលកំពុងរំជើបរំជួលជាថ្មីទៀតដោយសារមហាបាតុកម្មប្រឆាំងរដ្ឋាភិបាល។
ព័ត៌មានបែបនេះបានលេចលឺឡើងក្នុងបណ្តាញសារព័ត៌មានថៃ នៅខណៈដែលប្រទេសជិតខាងកម្ពុជាមួយនេះកំពុងតែទទួលរងចលនាមហាបាតុកម្មរបស់ក្រុមអាវលឿងដែលប៉ុនប៉ងទម្លាក់រដ្ឋាភិបាលលោកស្រីយីងឡាក់ ស៊ីណាវ៉ាត្រា។ ប៉ុន្តែ ព័ត៌មាននេះត្រូវបានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បដិសេធចោលទាំងស្រុង។ ក្នុងសេចក្តីថ្លែងការណ៍មួយកាលពីល្ងាចថ្ងៃទី២៣ ខែវិច្ឆិកា ម្សិលមិញ អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបានស្រាយបំភ្លឺថា កម្ពុជាគោរពយ៉ាងម៉ឹងម៉ាត់នូវរដ្ឋធម្មនុញ្ញរបស់ខ្លួន ដែលចែងអំពីការរួមរស់ដោយសន្តិសហវិជ្ជមានជាមួយប្រទេសជិតខាង និងប្រទេសដទៃទៀតទាំងអស់នៅលើពិភពលោក។
រដ្ឋធម្មនុញ្ញកម្ពុជាក៏ហាមមិនឲ្យឈ្លានពានប្រទេសណាជាដាច់ខាត និងក៏មិនជ្រៀតជ្រែកកិច្ចការផ្ទៃក្នុងនៃប្រទេសណាមួយដោយផ្ទាល់ ឬដោយប្រយោលទេ ទោះបីជាស្ថិតក្រោមរូបភាពណាក៏ដោយ។ កម្ពុជាមិនអនុញ្ញាតឲ្យមានមូលដ្ឋានយោធាបរទេសណាមួយ នៅលើទឹកដីរបស់ខ្លួន ហើយក៏មិនអនុញ្ញាតឲ្យមានមូលដ្ឋានយោធារបស់ខ្លួននៅលើទឹកដីបរទេសដែរ លើកលែងតែក្នុងក្របខណ្ឌនៃសំណូមពររបស់អង្គការសហប្រជាជាតិ។
ទីស្តីការគណៈរដ្ឋមន្ត្រីកម្ពុជាបានចាត់ទុកព័ត៌មាននេះថា ជាការប្រឌិតភូតភរប្រកបដោយភាពពឹសពុលខ្មៅកខ្វក់។ សេចក្តីថ្លែងការណ៍ដដែលនោះក៏បានសុំឲ្យប្រព័ន្ធផ្សព្វផ្សាយព័ត៌មានថៃASTV បញ្ឈប់ការអនុវត្តយុទ្ធវិធីទុច្ចរិតតាមបែបនេះតទៅទៀត។
សូមបញ្ជាក់ថា ក្រុមអាវលឿងថៃច្រើនម៉ឺននាក់បានជួបជុំគ្នានៅថ្ងៃសៅរ៍នេះដើម្បីធ្វើមហាបាតុកម្មទម្លាក់រដ្ឋាភិបាលលោកស្រីយីងឡាក់ ស៊ីណាវ៉ាត្រា។ ការចោទប្រកាន់ដែលក្រុមអាវលឿងថៃតែងបានភ្ជាប់កម្ពុជាទៅនឹងចលនានយោបាយរបស់លោកថាក់ស៊ីនក្នុងប្រទេសថៃត្រូវបានទីស្តីការគណៈរដ្ឋមន្ត្រីកម្ពុជាចាត់ទុកថា មិនមែនជាលើកទី១ទេ និងមានបំណងបំបែកបំបាក់ទំនាក់ទំនងកម្ពុជាថៃដែលកំពុងតែល្អប្រសើរឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ