កំណើនភ្ញៀវទេសចរទៅក្រៅប្រទេសកាន់តែច្រើនក្នុងថ្ងៃបុណ្យជាតិធំៗ
ខណៈពេល ដែលភ្ញៀវទេសចរណ៍ជាតិ បានសម្រុកចេញពីទីប្រជុំជនទៅកាន់តំបន់ប៉ូលទេសចរណ៍សំខាន់ៗ ក្នុងប្រទេសកម្ពុជា ជាពិសេស គឺការចូលរួមព្រឹត្តិការណ៍អង្គរសង្ក្រាន្តក្នុងខេត្តសៀមរាបនោះ ក៏មានភ្ញៀវទេសចរណ៍ក្នុងស្រុកជាច្រើនបានសម្រុកទៅក្រៅប្រទេស។ ភ្ញៀវទេសចរណ៍ជាតិ ដែលសម្រុកទៅក្រៅប្រទេសមានប្រមាណជិត១លាន់នាក់ ដែលមានការកើនឡើងប្រមាណជាង១០ភាគរយ បើប្រៀបធៀបនឹងឆ្នាំមុន។
ចុះផ្សាយនៅថ្ងៃ៖
ស្តាប់ - ០២:១០
លោក ហូ វណ្ណឌី ជាសហប្រធានក្រុមការងារទេសចរណ៍កម្ពុជា បានបញ្ជាក់ប្រាប់វិទ្យុបារាំងថា កំណើនភ្ញៀវទេសចរ ដែលចេញទៅក្រៅស្រុកក៏មានចំនួនគួរសមដែរ ក្នុងឆ្នាំ២០១៥នេះ។ តាមការប៉ាន់ប្រមាណរបស់លោកដោយផ្អែកលើរបាយការណ៍របស់ក្រសួងទេសចរណ៍ បានឲ្យដឹងថាភ្ញៀវទេសចរប្រមាណជិត១លាននាក់ បានចេញទៅទេសចរណ៍នៅក្រៅប្រទេស។ ព្រឹត្តិការណ៍ ដែលធ្វើឲ្យភ្ញៀវទេសចរជាតិ ចេញទៅក្រៅប្រទេសច្រើនជាងគេនោះ គឺថ្ងៃបុណ្យចូលឆ្នាំប្រពៃណីចិន-វៀតណាម បុណ្យចូលឆ្នាំប្រពៃណីខ្មែរ និងក្នុងថ្ងៃព្រះរាជពិធីបុណ្យអុំទូក។ ក្រៅពីព្រឹត្តិការណ៍ធំៗទាំងបីនេះ ក៏មានព្រឹត្តិការណ៍ផ្សេងៗទៀតដែរ គឺព្រឹតិ្តការណ៍ឆ្លងឆ្នាំ និងបុណ្យភ្ជុំបិណ្ឌ។
បើតាមលោក ហូ វណ្ណឌី ដដែលបានឲ្យដឹងថាប្រទេស ដែលភ្ញៀវទេសចរខ្មែរធ្វើដំណើរទៅកម្សាន្តក្នុងឱកាសឈប់សម្រាកនោះ មានប្រទេសក្នុងតំបន់អាស៊ាន និងប្រទេសក្នុងតំបន់អាស៊ី។ មូលហេតុ ដែលបណ្តាល ភ្ញៀវទេសចរខ្មែរចេញទៅក្រៅស្រុក គឺដោយសារតែស្ថានភាពនយោបាយកម្ពុជាល្អប្រសើជាងមុន ស្ថានភាពសន្តិសុខសុវត្តិភាពក្នុងប្រទេសក៏ល្អប្រសើរ ស្ថានភាពសេដ្ឋកិច្ចរបស់ប្រជាពលរដ្ឋកម្ពុជាក៏មានការកើនឡើង រួមជាមួយនឹងកំណើនមនុស្សពេញវ័យកាន់តែច្រើនក្នុងចំណោមប្រជាជនកម្ពុជា។
មិនមានការខាតបង់ទេសម្រាប់កម្ពុជាចំពោះកំណើនភ្ញៀវទេសចរទៅក្រៅស្រុក ព្រោះភ្ញៀវទេសចរបរទេសក៏មកកម្ពុជាច្រើនដែរ។ នេះបើតាមការបញ្ជាក់របស់សហប្រធានក្រុមការងារទេសចរណ៍កម្ពុជា។ យ៉ាងណាមិញ បើតាមរដ្ឋមន្ត្រីក្រសួងទេសចរណ៍ លោក ថោង ខុន ដែលបានថ្លែងប្រាប់វិទ្យុបារាំងកាលពីថ្ងៃទី១៧ ខែមេសា ថាគ្រាន់តែខែត្រសៀមរាប ក្នុងថ្ងៃបុណ្យចូលឆ្នាំខ្មែរ មានភ្ញៀវទេសចរបរទេសប្រមាណ ២៧០០០នាក់ ដែលមានកំណើន ២៥ភាគរយ។
ក្នុងការចាយវាយរបស់ភ្ញៀវទេសចរខ្មែរទៅបរទេសវិញ លោក ហូ វណ្ណឌី បានបញ្ជាក់ថា អ្នកទេសចរណ៍ខ្មែរចំណាយចាប់ពី៣០០ដុល្លារអាមេរិកឡើងទៅ។ ចំណែកឯភ្ញៀវទេសចរបរទេស ដែលមកកម្ពុជាចំណាយប្រហែលប្រមាណ៧០០ដុលា្លរសហរដ្ឋអាមេរិកក្នុងម្នាក់។ ជាក់ស្តែងក្នុងថ្ងៃចូលឆ្នាំនាខេត្តសៀមរាប ចំណូលប្រមាណ ១៨លានដុល្លារអាមេរិក ដែលកម្ពុជាទទួលបានពីភ្ញៀវទេសចរអន្តរជាតិ នេះបើតាមលោក ថោង ខុន។
សូមបញ្ជាក់ថា ភ្ញៀវទេសចរជាតិ ដែលចេញទៅកម្សាន្តនៅក្រៅប្រទេសមានប្រមាណពី៧០ម៉ឺននាក់ ទៅ៨០ម៉ឺននាក់កាលពីឆ្នាំកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ