ភូមា៖លោកស្រី ហ៊ីលឡារី គ្លីនតុននឹងពង្រីកឥទ្ធិពលអាមេរិកនៅអាស៊ី ប្រឈមនឹងចិន
នៅថ្ងៃពុធ ទី៣០ វិច្ឆិកា ភូមាផ្តើមក្រាលព្រំក្រហមទទួលលោកស្រីប្រមុខការទូតអាមេរិក Hillary Clinton។ គឺជាដំណើរទស្សនកិច្ចលើកទីមួយរបស់ប្រមុខការទូតអាមេរិកនៅលើទឹកដីភូមា ក្នុងរយៈពេលជាងកន្លះសតវត្សកន្លងទៅ។ ទស្សនកិច្ចនេះបានធ្វើឡើង ចំពេលដែលភូមាបាននិងកំពុងបន្តអនុវត្តនយោបាយបើកចំហ។ លោកស្រី គ្លីនតុនបានឆក់យកឱកាសនេះដើម្បីផ្តើមពង្រឹងឡើងវិញនូវទំនាក់ទំនងរវាងទីក្រុងវ៉ាស៊ីនតោន និងទីក្រុងរ៉ង់ហ្គូន ព្រមទំាងឆ្លៀតពង្រីកឥទ្ធិពលរបស់អាមេរិកនៅក្នុងតំបន់ ប្រឈមនឹងប្រទេសចិន។
ចុះផ្សាយនៅថ្ងៃ៖
ស្តាប់ - ០២:៣០
គឺនៅថ្ងៃពុធ ទី៣០ វិច្ឆិកា ដែលមានប្រមុខការទូតអាមេរិកម្នាក់ត្រូវដាក់ជើងជាន់ទឹកដីភូមាជាលើកទីមួយក្នុងរយៈពេលជាងកន្លះសតវត្សកន្លងទៅនេះ។ នៅទីនោះ លោកស្រី ហ៊ីលឡារី គ្លីនតុនត្រូវចូលជួបសន្ទនាជាមួយលោកប្រធានាធិបតីភូមា ថេន សេន និងលោកស្រីប្រមុខគណបក្សប្រឆំាង អ៊ុង សានស៊ូជី។ គេនៅមិនទាន់ដឹងទេថា តើលោកស្រី គ្លីនតុននឹងយកប្រធានរឿងអ្វីខ្លះ ទៅជជែកជាមួយថ្នាក់ដឹកនំាភូមាទេ។ បើតាមមើលទៅ ប្រមុខការទូតអាមេរិករូបនេះប្រាកដជាទាមទារឲ្យរបបថ្មីភូមាបន្តអនុវត្តនយោបាយបើកចំហឆ្ពោះទៅរកការគោរពសិទ្ធិមនុស្ស និងលទ្ធិប្រជាធិបតេយ្យ។ ប៉ុន្តែទន្ទឹមគ្នានេះ ទីក្រុងវ៉ាស៊ីនតោនក៏មិនទាន់អាចនិយាយពីការសម្រាល ឬមួយក៏លើកទ័ណ្ឌកម្មសេដ្ឋកិច្ចរបស់ខ្លួនចេញពីភូមាវិញដែរ។
ចំពោះសហរដ្ឋអាមេរិក ទីក្រុងវ៉ាស៊ីនតោនមានការប្រយ័ត្នប្រយែងដោយមិនចង់បង្ហាញឲ្យគេដឹងថា ខ្លួនបាននិងកំពុងពង្រឹងទំនាក់ទំនងជាមួយទីក្រុងរ៉ង់ហ្គូនឡើងវិញនោះទេ។ ក៏ប៉ុន្តែ ការដែលថ្នាក់ដឹកនំាជាន់ខ្ពស់អាមេរិកម្នាក់ដាក់ជើងជាន់ទឹកដីភូមាពេលនេះ ពិតជានិមិត្តរូបពិសេសណាស់នៅក្នុងប្រទេសមួយដែលជាសម្ព័ន្ធមិត្តចាក់ទឹកមិនលិចរបស់ចិន។ ត្រង់ចំណុចនេះ ទីក្រុងប៉េកំាងពិតជាយល់មិនច្រឡំទេ។ អ៊ីចឹងហើយបានជាកាលពីថ្ងៃច័ន្ទ ទី២៨ វិច្ឆិកា លោក Xi Jinping អគ្គលេខាធិការគណបក្សកុម្មុយនិស្តចិន និងជាអនាគតប្រធានាធិបតីចិននៅឆ្នំា ២០១២ បានស្នើឲ្យកងទ័ពចិន និងភូមាពង្រឹងកិច្ចសហប្រតិបត្តិការរវាងគ្នាស៊ីជម្រៅបន្ថែមទៀត។ សេចក្តីស្នើនេះបានធ្វើឡើងតាមរយៈដំណើរទស្សនកិច្ចរបស់អគ្គមេបញ្ជាការភូមានៅក្នុងប្រទេសចិន។
ជាលក្ខណៈប្រវត្តិសាស្រ្ត ចិនជាប្រទេសដែលបានចេញមុខការពារ និងគំាទ្រភូមាតំាងពីរបបសឹកចូលកាន់អំណាចក្នុងឆ្នំា ១៩៦២។ ប៉ុន្តែតំាងពីក្រោយការបោះឆ្នោតនាចុងឆ្នំា ២០១០ និងបន្ទាប់ពីបានបង្កើតរដ្ឋាភិបាលស៊ីវិលមក ទំនាក់ទំនងរវាងរដ្ឋាភិបាលថ្មីភូមា និងទីក្រុងប៉េកំាងមិនសូវរលូនប៉ុន្មាន និងមានពេលខ្លះតានតឹងទៀតផង។ ជាក់ស្តែងនាពេលថ្មីៗនេះ ភូមាបានសម្រេចចិត្តផ្អាកគម្រោងសាងសង់ទំនប់វារីអគ្គិសនីមួយរបស់ក្រុមហ៊ុនចិនក្នុងទឹកដីរបស់ខ្លួន។ បន្តិចម្តងៗ ភូមាបាននិងកំពុងងាកចេញពីចិន ដោយបានបែរក្បាលទៅរកអ្នកផ្សេងមានដូចជាឥណ្ឌា ប្រទេសដទៃទៀតនៅអាស៊ីអាគ្នេយ៍ និងឥឡូវនេះ សហរដ្ឋអាមេរិក។
ក្រុមអ្នកវិភាគបានមើលឃើញថា ការដែលអាមេរិកបានបែរក្បាលមកចាប់អារម្មណ៍តំបន់អាស៊ី និងភូមានាពេលនេះ គឺក្នុងគោលដៅប្រឈមទប់នឹងឥទ្ធិពលរបស់ចិន និងឆ្លៀតពេលដែលចិនកំពុងមានជម្លោះដណ្តើមទឹកដីគ្នាជាមួយប្រទេសអាស៊ីមួយចំនួនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ