អ្នកភូមិបឹងកក់ទាមទារជាថ្មីឲ្យតុលាការដោះលែងអ្នកស្រីយោម បុប្ផា
សាលាឧទ្ធរណ៍ កាលពីរសៀលថ្ងៃនេះ បានបើកសវនាការលើបណ្ដឹងទាស់របស់អ្នកស្រីយ៉ោម បុប្ផាក្រោយពេលអ្នកស្រីបានជាប់ពន្ធនាគារចំនួន២៧៥ថ្ងៃកន្លងមក។ សវនាការនេះធ្វើឡើងនៅក្នុងសាលសាលាឧទ្ធរណ៍ ខណៈនៅក្រៅរបងសាលាឧទ្ធរណ៍វិញ ក្រុមអ្នកតវ៉ាបឹងកក់ និងក្រុមអ្នករត់ម៉ូតូឌុបបានធ្វើបាតុកម្ម ក្រោមតំណក់ទឹកភ្លៀងរលឹម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
អ្វីដែលលោកអ្នកឮមុននេះ គឺជាសម្រែកសុំយុត្តិធម៌របស់ក្រុមអ្នកតវ៉ាបឹងកក់ និងសមាគមអ្នករត់ម៉ូតូ ឌុប នៅមុខសាលាឧទ្ធរណ៍រាជធានីភ្នំពេញ កាលពីម៉ោង២រសៀលថ្ងៃមិញនេះ។
នៅក្រៅរបងសាលាឧទ្ធរណ៍ ក្រុមអ្នកតវ៉ាបឹងកក់ប្រមាណជា២០០នាក់ ប្រដាប់ដោយឧបករណ៍បំពងសំឡេងបួន-ប្រាំ ជួតក្បាលដោយក្រណាត់ក្រហម ភ្ជាប់ដោយសារផ្សេងៗ ក្នុងន័យស្នើឲ្យដោះលែងអ្នកស្រី យ៉ោម បុប្ផា បានស្រែកបន្ទរព្រមៗគ្នាថា «ដោះលែងអ្នកស្រីយ៉ោម បុប្ផា»។ លុះបន្តិចក្រោយមក ខាងក្រុមអ្នករត់ម៉ូតូឌុបដែលមានគ្នាប្រមាណជា៥០នាក់ ស្ថិតក្នុងឯកសណ្ឋានអាវកាក់ក្រហមអមដោយបដាធំៗ ដែលដាក់បង្ហាញរូបភាពរបួសរបស់ អ្នករត់ម៉ូតូឌុបជាជនរងគ្រោះ ក៏ចាប់ផ្ដើមស្រែកដាក់មេក្រូ ដែលនៅក្នុងដៃរបស់ខ្លួនថា «វាយគេ ត្រូវតែជាប់គុក»។ បើទោះបី នេះគ្រាន់តែជាសង្គ្រាមពាក្យសម្ដីរវាងភាគីទាំងពីរក្ដី ក៏អាជ្ញាធរមានសមត្ថកិច្ចជាច្រើននាក់បានតាមឃ្លាំមើលសកម្មភាពរបស់ក្រុមអ្នកតវ៉ាទាំងពីរក្រុមនេះជានិច្ច។
រហូតដល់ម៉ោង២ និង៤៥នាទី អ្នកស្រីយ៉ោម បុប្ផាត្រូវបាននាំខ្លួនមកដល់សាលាឧទ្ធរណ៍តាមច្រកទ្វារក្រោយ ដោយមិនមានការរំខានពីសំណាក់ក្រុមអ្នកតវ៉ាដែលឈរចាំនៅច្រកទ្វារខាងមុខឡើយ។ បន្ទាប់ពីនោះ សវនាការក៏ប្រព្រឹត្តទៅយ៉ាងស្ងៀមស្ងាត់ ក្រោមវត្តមានអ្នកតំណាងទូត អង្គការ ព្រមទាំងអ្នកសារព័ត៌មានជាច្រើននាក់ ដែលធ្វើឲ្យមនុស្សមួយចំនួនធំត្រូវបង្ខំចិត្តឈរស្ដាប់សវនាការ ព្រោះតែអស់កន្លែងអង្គុយ។
សវនាការដំណើរការទៅមុខដោយមិនខ្វល់ពីក្រុមអ្នកតវ៉ាទាំងពីរក្រុមដែលឈរស្រែកនៅក្រោមតំណក់ទឹកភ្លៀងរលឹមតិចៗ ទាមទាររកយុត្តិធម៌។ យុត្តិធម៌របស់ក្រុមអ្នកបឹងកក់ គឺស្នើឲ្យតុលាការដោះលែងសកម្មជនដីធ្លី អ្នកស្រីយ៉ោម បុប្ផា។ ចំណែកយុត្តិធម៌របស់ក្រុមអ្នករត់ម៉ូតូឌុបវិញ គឺជម្រុញឲ្យតុលាការដាក់ទោសទណ្ឌអ្នកស្រី យ៉ោម បុប្ផា ដែលត្រូវបានចោទថា បានវាយអ្នករត់ម៉ូតូឌុបពីរនាក់ឲ្យបែកក្បាល។
បើទោះជាយ៉ាងនេះក្ដី សាលាឧទ្ធរណ៍ នាម៉ោង៦មុននេះ បានសម្រេចពន្យារពេលសវនាការ ដោយលើកទៅធ្វើ នៅថ្ងៃទី១៤ ខែមិថុនា ខាងមុខទៀត។
គួរបញ្ជាក់ផងដែរថា អ្នកស្រីយ៉ោម បុប្ផាជាសកម្មជនដីធ្លី ត្រូវបានសាលាដំបូងរាជធានីភ្នំពេញ កាលពីថ្ងៃទី២៧ ខែធ្នូ ឆ្នាំ២០១២កន្លងទៅ បានកាត់ទោសពីបទប្រើហិង្សាវាយបុរសអ្នករត់ម៉ូតូឌុបពីរនាក់ឲ្យរងរបួស ហើយត្រូវផ្តន្ទាទោសឲ្យជាប់ពន្ធនាគារ៣ឆ្នាំ ព្រមទាំងពិន័យជាប្រាក់៦០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ