អាជ្ញាធរចាប់រុះរើបំផ្លាញលំនៅឋានអ្នកភូមិបឹងកក់
អាជ្ញាធរ ដែលមានកម្លាំងចម្រុះ ជាសមត្ថកិច្ចប៉ូលិសខណ្ឌដូនពេញ និងកម្លាំងសន្តិសុខរបស់ក្រុមហ៊ុន ស៊ូកាគូ អ៊ិន ប្រមាណជា ៦០ នាក់ បានចុះរុះរើផ្ទះប្រជាពលរដ្ឋ នៅភូមិ ទី២៤ ក្នុងតំបន់បឹងកក់ កាលពីព្រឹកថ្ងៃទី១៤មករានេះ។ ក្នុងពេលវាយកម្ទេចផ្ទះឈើ ប្រក់ស័ង្កសី ចំនួន ១៩ បន្ទប់ សង់លើទឹកបឹងកក់នោះ កម្លាំងចម្រុះ បានចាប់ខ្លួនអ្នកកាសែត ភ្នំពេញប៉ុស្តិ៍ និងដកហូតយកម៉ាស៊ីនថតរូប។ ក៏ប៉ុន្តែ ដោយមានការតវ៉ាពីក្រុមអ្នកភូមិ ទីបំផុតទៅ អ្នកកាសែត ត្រូវបានដោះលែង ជាមួយនឹងម៉ាស៊ីនថតរូប។
ចុះផ្សាយនៅថ្ងៃ៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
ជម្លោះដីធ្លីដ៏រ៉ាំរ៉ៃ នៅតំបន់បឹងកក់ បានផ្ទុះឡើងជាថ្មី នៅព្រឹកថ្ងៃសុក្រនេះ នៅពេលដែលអាជ្ញាធរ ដែលមានកម្លាំងចម្រុះ ជាប៉ូលីសខណ្ឌដូនពេញ និងកម្លាំងសន្តិសុខរបស់ក្រុមហ៊ុន ស៊ូកាគូ អ៊ិន សរុបប្រមាណ ៦០ នាក់ ប្រដាប់ដោយកាំភ្លើង ខែល និងដំបងបង្ក្រាបបាតុកម្ម បានដឹកនាំកម្លាំងចុះរុះរើ និងវាយកម្ទេចផ្ទះអ្នកភូមិបឹងកក់ ចំនួន ១៩ បន្ទប់ នៅភូមិ លេខ២៤ ជិតទីស្នាក់ការក្រុមហ៊ុន។
នៅពេលចាប់ផ្តើមវាយកម្ទេចផ្ទះអ្នកភូមិបឹងកក់ នៅព្រឹកថ្ងៃព្រហស្បតិ៍ កម្លាំងសមត្ថកិច្ចចម្រុះ បានហាមឃាត់មិនឲ្យអ្នកកាសែតចូលថតរូបឡើយ។ ចំណែកអ្នកភូមិ ជាម្ចាស់ផ្ទះ បានធ្វើការតវ៉ា នាំដល់ការរុញច្រាន ហើយបានប្រឈមមុខដាក់គ្នាយ៉ាងតឹងតែងមួយរយៈ។ ទោះយ៉ាងណា មិនមានអំពើហិង្សាធ្ងន់ធ្ងរ កើតឡើងទេ។
ទីបំផុតទៅ កម្លាំងសមត្ថកិច្ចចម្រុះ បានរារាំង និងរហូតឈានដល់ការចាប់ក្រៀកអ្នកថតរូប កាសែតភ្នំពេញប៉ុស្តិ៍ និងដកហូតយកម៉ាស៊ីនថត។ ក៏ប៉ុន្តែក្រុមអ្នកភូមិ និងអ្នកកាសែត បានធ្វើការតវ៉ាប្រឆាំងទង្វើល្មើស និងរំលោភសិទ្ធិអ្នកកាសែតដ៏ធ្ងន់ធ្ងរ។ មួយសន្ទុះក្រោយមក អ្នកថតរូបកាសែតភ្នំពេញប៉ុស្តិ៍ លោក សុវណ្ណ ភីឡុង ត្រូវបានដោះលែង និងទទួលបានម៉ាស៊ីនថតរូបមកវិញ ប៉ុន្តែអាជ្ញាធរ បានតម្រូវឲ្យលុបរូបថតនៃព្រឹត្តិការណ៍វាយកម្ទេចផ្ទះអ្នកភូមិទាំងនោះ។
តំបន់បឹងកក់ ត្រូវបានរដ្ឋាភិបាល ប្រគល់សិទ្ធិឲ្យក្រុមហ៊ុនស៊ូកាគូ របស់លោកឧកញ៉ា ឡៅ ម៉េងឃិន សមាជិកព្រឹទ្ធសភា របស់គណបក្សប្រជាជនកម្ពុជា ដើម្បីអភិវឌ្ឍជាមជ្ឈមណ្ឌលពាណិជ្ជកម្មទំនើប។ ក៏ប៉ុន្តែ ការអភិវឌ្ឍន៍នោះ តម្រូវឲ្យប្រជាពលរដ្ឋជាង ៤០០០ គ្រួសារ ត្រូវរុះរើលំនៅឋាន ជាថ្នូរនឹងគោលនយោបាយដោះដូរ នូវទឹកប្រាក់ ៨៥០០ដុល្លារ ក្នុងមួយគ្រួសារ។ ចាប់តាំងពីឆ្នាំ២០០៧ រហូតដល់សព្វថ្ងៃ ប្រជាពលរដ្ឋភាគច្រើន មិនព្រមទទួលយកគោលនយោបាយរបស់ក្រុមហ៊ុន និងសាលាក្រុង ហើយបន្តការតវ៉ា បើទោះបីជា គ្មានការអើពើពីសំណាក់ថ្នាក់ដឹកនាំប្រទេសឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ