ភូមាលេចត្រដែតក្នុងនាមជាប្រធានផ្លាស់វេនអាស៊ាន តែការរិះគន់ក៏មានច្រើន
ភូមាដែលជាប្រទេសដ៏ឯកា ធ្លាប់រស់ក្រោមរបបដឹកនាំសឹកអស់ជិតកន្លះសតវត្ស កំពុងបង្ហាញខ្លួនជាលើកទីមួយ លើឆាកអន្តរជាតិ តាមរយៈការទទួលរៀបចំជំនួបកំពូលអាស៊ានសប្តាហ៍នេះ។ ជាប្រធានផ្លាស់វេនអាស៊ាន ភូមាបានទទួលចំណាប់អារម្មណ៍ពិសេស និងត្រូវទទួលស្វាគមន៍លើកទីពីរប្រធានាធិបតីអាមេរិក លោក បារ៉ាក់ អូបាម៉ា។ ទន្ទឹមនឹងការលេចមុខលេចមាត់ ការរិះគន់ក៏មានច្រើន ព្រោះការបោះឆ្នោតសភា នឹងឈានមកដល់នៅរវាងតែមួយឆ្នាំទៀតប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ប្រមុខដឹកនាំប្រទេសជាសមាជិកសមាគមប្រជាជាតិអាស៊ីអាគ្នេយ៍ អាស៊ាន និងប្រធានាធិបតីអាមេរិក កំពុងជួបប្រជុំគ្នានៅទីក្រុងណៃពិដោ រយៈពេលពីរថ្ងៃ នាថ្ងៃពុធនិងព្រហស្បតិ៍ទី ១៣វិច្ឆិកានេះ។
ជាមួយនឹងសក្កានុពលសេដ្ឋកិច្ច មានប្រជាជនជាង៦០លាននាក់ មានផ្ទុកធនធានធម្មជាតិក្រោមដីយ៉ាងសន្ធឹកសន្ធាប់ តាំងពីមានរដ្ឋាភិបាលជាស៊ីវិលមក ភូមាបានទទួលការយកចិត្តទុកដាក់ជាពិសេសពីសហរដ្ឋអាមេរិក។ លោកអូបាម៉ា តាមដានអន្តរកាលនយោបាយនៅប្រទេសនេះ យ៉ាងប្រកៀកប្រកិតបំផុត។ នៅលើកនេះ លោកអូបាម៉ា ត្រូវជួបពិភាក្សាជាមួយប្រធានាធិបតីភូមា លោក ថេន សេនផង និងលោកស្រីប្រមុខបក្សប្រឆាំង អ៊ុង សានស៊ូជីផង។
ប៉ុន្តែប៉ុន្មានថ្ងៃចុងក្រោយ ការរិះគន់ មានកាន់តែច្រើនឡើងៗ ចំពោះភាពយឺតយ៉ាវនៃការធ្វើកំណែទម្រង់។ លោកស្រី អ៊ុងសានស៊ូជី បានអំពាវនាវឱ្យសហរដ្ឋអាមេរិកប្រុងប្រយ័ត្ន កុំមានសុទិដ្ឋនិយមខ្លាំងពេកលើរដ្ឋាភិបាលភូមា។ ទីប្រឹក្សាសន្តិសុខរបស់លោកអូបាម៉ា ក៏ទើបតែនឹងបានទទួលស្គាល់ដែរថា មានការជឿនលឿនមែន ប៉ុន្តែនៅសល់ និងមានការជ្រុលជ្រួសច្រើន ក្នុងដំណើរការកំណែទម្រង់។
វិបត្តិជុំវិញកំណែទម្រង់រដ្ឋធម្មនុញ្ញ អំពើហិង្សាអន្តរសាសនា ជម្លោះជាមួយទ័ពព្រៃរហូតដល់មានស្លាប់ និងជនភៀសខ្លួនជាច្រើនពាន់នាក់ ការរឹតបន្តឹងសេរីភាពសារព័ត៌មាន ការចាប់ឃុំឃាំងអ្នកកាសែត សុទ្ធសឹងបញ្ហាប្រឈមដែលមកបង្អាប់តុល្យការនៃសកម្មភាពធ្វើកំណែទម្រង់តាំងពីបីឆ្នាំមករបស់រដ្ឋាភិបាលស៊ីវិលភូមា។ នៅតែមួយឆ្នាំទៀត ការបោះឆ្នោតសភា២០១៥នឹងមកដល់ ! បក្សប្រឆាំងរបស់លោកស្រី អ៊ុងសានស៊ូជី មានសំណាងច្រើននឹងឈ្នះឆ្នោត ប៉ុន្តែរដ្ឋធម្មនុញ្ញជារនាំងបាំងលោកស្រីជ័យលាភីរង្វាន់ណូបែលសន្តិភាព មិនឱ្យកាន់តំណែងជាប្រធានាធិបតី បានឡើយ។ លោកស្រីកំពុងពុះពារធ្វើយុទ្ធនាការយ៉ាងសកម្មដើម្បីទាមទារឱ្យមានការប្តូរផ្លាស់រដ្ឋធម្មនុញ្ញចាស់នេះ។
នៅក្នុងបរិបទដូច្នេះ អាមេរិករបស់លោកអូបាម៉ា ដែលមាននយោបាយផ្តល់អាទិភាពដល់អាស៊ី ដើម្បីទប់ទល់សន្ទុះដ៏ខ្លាំងក្លារបស់ចិន ត្រូវតែគិតគូរលើកទឹកចិត្តការពារលោកស្រីអ៊ុងសានស៊ូជី ដោយមិន ដកទំនុកចិត្តពីរដ្ឋាភិបាលលោកថេនសេនទេ។ ប៉ុន្តែនៅក្នុងរបៀបវារៈនៃជំនួបកំពូលអាស៊ានថ្ងៃនេះ ជាផ្លូវការគេឃើញមានតែសំណុំរឿងសេដ្ឋកិច្ចតំបន់ ឬវិបត្តិដែនដីនៅសមុទ្ទចិន ដែលសម្ព័ន្ធមិត្តអាមេរិកនៅអាស៊ី ត្រូវបន្តពិភាក្សាគ្នានៅភូមា ក្រោយជំនួបAPEC នៅប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ