ប្រធានាធិបតីភូមាប្រើពាក្យព្រមានសេរីភាពសារព័ត៌មាន ក្រោយមានអំពើហិង្សាសហគមន៍
សារព័ត៌មានបារាំង អា អេហ្វ ប៉េ AFP បានចុះផ្សាយនៅថ្ងៃអង្គារនេះថា ក្រោយអំពើហិង្សាសហគមន៍សាសនានៅប្រទេសភូមា ក្នុងសប្តាហ៍មុន ដែលបានសម្លាប់មនុស្ស២នាក់ ប្រធានាធិបតីភូមា ថេន សេន បានសន្យាមិនអត់ឱនជនដៃដល់ដែលជំរុញអោយមានហិង្សានេះឡើយ។ គួររំលឹកថា អំពើហិង្សាសហគមន៍សប្តាហ៍មុន បានសម្លាប់មនុស្ស២នាក់ ជាហិង្សាកើតឡើងដោយសារការចុះផ្សាយពាក្យចចាមអារ៉ាមក្នុងអ៊ីនថឺនេត។ ដូច្នេះ ប្រធានាធិបតីភូមា ឆ្លៀតវាយប្រហារផ្នែកសារព័ត៌មានផងដែរ ទាក់ទងនឹងសេរីភាពនៃការសរសេរចុះផ្សាយក្នុងអ៊ីនថឺនេត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
យោងតាមសារព័ត៌មានបារាំង អា អេហ្វ ប៉េ ចុះផ្សាយនៅថ្ងៃអង្គារនេះ ប្រធានាធិបតីភូមា ថេន សេន បានលើកឡើងថា ស្របតាមគុណសម្បត្តិកំណែទម្រង់នយោបាយអន្តរកាលដ៏សំខាន់ ការប្រើសិទ្ធិសេរីភាពសារព័ត៌មាន មានដូចជាសិទ្ធិបញ្ចេញមតិ រឺសិទ្ធិសរសេរដោយសេរី ក្នុងប្រទេសភូមា សិទ្ធិទាំងនេះបានឈានដល់កម្រិតខ្ពស់បំផុតមួយ នៅអាស៊ីអាគ្នេយ៍។
ប្រធានាធិបតីថេន សេន លើកឡើងបែបនេះ ក្រោយពេលភូមាបានរងអំពើហិង្សាសហគមន៍រវាងក្រុមអ្នកកាន់សាសនាព្រះពុទ្ធ និងក្រុមអ្នកកាន់សាសនាអ៊ីស្លាម កាលពីថ្ងៃអង្គារសប្តាហ៍មុន។ ក្រុមមនុស្សទាំងនេះបានចូលវាយតូបទំនិញមួយកន្លែង នៅក្រុងម៉ាន់ដាឡៃ ក្រោយបានមានពាក្យចចាមអារ៉ាម តាមអ៊ីនថឺនេត បំផ្លើសចោទម្ចាស់តូបទំនិញមួយនោះ ថាបានរំលោភផ្លូវភេទ។ អំពើហិង្សាសប្តាហ៍មុន បានសម្លាប់ពុទ្ធសាសនិកជនម្នាក់ និងអ្នកកាន់សាសនាអ៊ីស្លាមម្នាក់។ ក្រោយដាក់បម្រាមគោចរមក អាជ្ញាធរបានចាប់មនុស្សជាង៤០០នាក់។
ដោយឡែក ក្រោយរបបសឹកភូមាដួលរលំនៅឆ្នាំ២០១១មក រដ្ឋាភិបាលភូមាតែងរងការចោទប្រកាន់ថា មិនទាន់មានសមត្ថភាពបញ្ចប់បញ្ហាហិង្សាសហគមន៍ក្នុងស្រុកនៅឡើយ។ ហើយពាក្យចចាមអារ៉ាមតាមអ៊ីនថឺនេតទៀតសោត ក៏អាជ្ញាធរពុំទាន់មានវិធានការអ្វីចាត់ការនៅឡើយដែរ។ ដូច្នេះ ក្រោយពេលហិង្សាសហគមន៍កើតឡើងជាថ្មី កាលពីសប្តាហ៍មុន ប្រធានាធិបតីភូមាបានឆ្លៀតលើកពីវិធានការចាត់ការ ការចុះផ្សាយព័ត៌មានមិនពិតតាមអ៊ីនថឺនេត ដែលជាការប៉ះពាល់ដល់សេរីភាពសារព័ត៌មាន ពិសេសការចុះផ្សាយព័ត៌មានតាមអ៊ីនថឺនេតតែម្តង។ លោក ថេន សេន លើកឡើងបន្ថែមថា ប្រសិនបើសេរីភាពសារព័ត៌មាន គំរាមដល់សុវត្ថិភាពសន្តិសុខជាតិ ជាជាងចូលរួមជួយជាតិ នោះរដ្ឋាភិបាលភូមាសូមព្រមានថា នឹងប្រតិកម្មចាត់ការមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ