រដ្ឋាភិបាលភូមាបានយល់ព្រមផ្តល់អាជ្ញាប័ណ្ណឲ្យធនាគារបរទេស
នៅថ្ងៃពុធ ទី២ តុលា រដ្ឋាភិបាលនៃប្រទេសភូមាបានប្រកាសឲ្យដឹងពីការយល់ព្រមផ្តល់អាជ្ញាប័ណ្ណលើកដំបូងឲ្យធនាគារបរទេសចូលទៅរកស៊ីនៅភូមា។ អាជ្ញាប័ណ្ណដំបូងនេះត្រូវបានប្រគល់ទៅធនាគារបរទេសចំនួន ៩ ដែលមានមូលដ្ឋាននៅក្នុងតំបន់អាស៊ីប៉ាស៊ីហ្វិក មានជាអាទិ៍ ធនាគារ ANZ របស់អូស្រ្តាលី ធនាគារ ICBC របស់ចិន ឬមួយក៏ធនាគារជប៉ុនឈ្មោះ Bank of Tokyo-Mitsubishi ជាដើម។ ភូមាជាប្រទេសមួយដែលវិស័យធនាគារកំពុងបោះជំហានទៅមុខ តែនៅមានលក្ខណៈផុយស្រួយដោយសារតែប្រទេសបានស្ថិតក្នុងភាពឯកោអស់ជាច្រើនទសវត្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
វាពិតជាមិនមានអ្វីគួរឲ្យភ្ញាក់ផ្អើលឡើយដែលរដ្ឋាភិបាលភូមាបានយល់ព្រមប្រគល់អាជ្ញាប័ណ្ណឲ្យធនាគារបរទេសពេលនេះ ព្រោះភូមាបានយល់យ៉ាងច្បាស់ថា ការអភិវឌ្ឍន៍វិស័យសេដ្ឋកិច្ចរបស់ប្រទេសជាតិចំាបាច់ត្រូវតែឆ្លងកាត់តាមកំណែទម្រង់វិស័យធនាគារដោយចៀសមិនរួច។ អ៊ីចឹងហើយបានជាកាលពីឆ្នំា ២០១៣ កន្លងទៅ រដ្ឋាភិបាលបានដាក់បញ្ចូលច្បាប់ថ្មីមួយដោយសុទ្ធចិត្តផ្តល់ឯករាជ្យភាពបន្ថែមឲ្យធនាគារជាតិរបស់ខ្លួន។ ការយល់ព្រមផ្តល់អាជ្ញាប័ណ្ណឲ្យធនាគារបរទេសពេលនេះបានធ្វើឲ្យធនាគារឯកជនក្នុងស្រុកមានក្តីបារម្ភជាពន់ពេក តែលោកទេសាភិបាលរងនៃធនាគារជាតិសេត អ៊ុងបានប្រកាសធានាកាលពីខែមិថុនាកន្លងទៅថា អាជ្ញាប័ណ្ណដែលប្រគល់ទៅឲ្យធនាគារបរទេសត្រូវបានភ្ជាប់ដោយលក្ខខណ្ឌមួយចំនួនដែលធនាគារបរទេសទំាងនោះត្រូវគោរពឲ្យខានតែបាន។ លក្ខខណ្ឌទំាងនោះរួមមាន ការហាមមិនឲ្យបម្រើសេវាដល់អតិថិជនឯកជន ការហាមមិនឲ្យបើកសាខាលើសពីមួយ និងត្រូវតម្កល់ប្រាក់តិចបំផុតចំនួន ៧៥លានដុល្លារ។
គួរជម្រាបជូនថាមកដល់ពេលនេះ ធនាគារបរទេសត្រូវបានរដ្ឋាភិបាលភូមាអនុញ្ញាតឲ្យមានតែការិយាល័យតំណាងរបស់ខ្លួនប៉ុណ្ណោះ និងមិនអនុញ្ញាតឲ្យមានសកម្មភាពអ្វីទំាងអស់។ បច្ចុប្បន្ននេះ ភូមាមានធនាគាររដ្ឋចំនួន ៤ និងធនាគារឯកជនប្រមាណជា ២០ ហើយធនាគារឯកជនទំាងនេះទើបតែមានវត្តមានតំាងពីឆ្នំា ១៩៩០ ប៉ុណ្ណោះ។ យ៉ាងណាក៏ដោយ វិស័យធនាគារភូមានៅមានលក្ខណៈផុយស្រួយខ្លំាងដោយសារតែសំណល់ពីការអនុវត្តន៍នយោបាយតាមបែបសង្គមនិយមក្នុងជំនាន់របបសឹក។ វិបត្តិធនាគារកាលពីឆ្នំា ២០០៣ បានធ្វើឲ្យធនាគារជាច្រើនក្ស័យធន និងអ្នកទុកប្រាក់នៅធនាគារបាត់បង់លុយកាក់អស់រលីង។ ជាង ១០ឆ្នំាក្រោយព្រឹត្តិការណ៍នោះមក សុបិន្តអាក្រក់នៅបន្តតាមលង និងដែលបានធ្វើឲ្យប្រជាជនភូមាមួយចំនួនធំរៀងចាលលែងទុកចិត្តធនាគារ ហើយនំាគ្នាបន្តសន្សំលុយទុកនៅផ្ទះវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ