ភូមាទើបប្រកាសដឹងថា ប្រជាជនខ្លួនមានចំនួនតិចជាងការប្រមើលទុកដល់ទៅ ៩លាននាក់
រដ្ឋាភិបាលនៃប្រទេសភូមាទើបបានប្រកាសឲ្យដឹងថា ចំនួនប្រជាជនសរុបរបស់ខ្លួនបច្ចុប្បន្នមានតែជាង ៥១លាននាក់ប៉ុណ្ណោះ ពោលគឺតិចជាង ៩លាននាក់ដែលគេបានទន្ទឹងរង់ចំា។ នេះជាលើកទី១ ក្នុងរយៈពេល ៣ទសវត្សកន្លងទៅដែលប្រទេសក្រីក្រនៅអាស៊ីអាគ្នេយ៍មួយនេះបានធ្វើជំរឿនប្រជាជនរបស់ខ្លួន។ ជំរឿងចុងក្រោយត្រូវបានធ្វើឡើងកាលពីឆ្នំា ១៩៨៣ ដែលប្រទេសស្ថិតក្រោមការកាន់កាប់របស់យោធា។
ចុះផ្សាយនៅថ្ងៃ៖
ស្តាប់ - ០២:២៥
៥១ ៤១៩ ៤២០នាក់ នេះជាតួលេខថ្មីនៃចំនួនប្រជាជនរបស់ប្រទេសភូមាសព្វថ្ងៃ។ តួលេខថ្មីនេះទើបត្រូវបានលោកស្រីរដ្ឋមន្រ្តីអន្តោប្រវេសន៍ឃិន យីប្រកាសឲ្យដឹងនៅក្នុងសន្និសីទកាសែតមួយនាថ្ងៃសៅរ៍ ទី៣០ សីហា។ បើយោងតាមលោកស្រីឃិន យី ចំនួនប្រជាជនភេទស្រីបានកើនលើសភេទប្រុសប្រមាណជា ១លាន ៧សែននាក់នៅក្នុងតួលេខថ្មីនេះ។ យ៉ាងណាក៏ដោយ លទ្ធផលផ្លូវការនៃជំរឿនប្រជាជនដែលបានធ្វើកាលពីខែមីនា និងមេសាកន្លងទៅនឹងត្រូវរដ្ឋាភិបាលផ្សព្វផ្សាយនៅក្នុងខែឧសភា ឆ្នំា ២០១៥។ ដោយឡែក ក្រៅពីបញ្ជាក់ពីចំនួនប្រជាជនសរុប លទ្ធផលផ្លូវការក៏នឹងប្រាប់ឲ្យដឹងផងដែរ ពីចំនួនប្រជាជនភូមាអ្នកកាន់សាសនាខុសៗគ្នា និងពីប្រភពជាតិពិន្ធុដើមរបស់ពួកគេ។ គឺទាក់ទងនឹងបញ្ហាជាតិពិន្ធុនេះឯងដែលបានបង្កឲ្យមានភាពចម្រូងចម្រាសខ្លំាងនៅក្នុងការធ្វើជំរឿនលើកនេះ ព្រោះថា សំណួរមួយក្នុងចំណោមសំណួរទំាង ៤១ ដែលគេបានសួរទៅប្រជាជននោះ គឺជាតិពិន្ធុដើមរបស់ប្រជាជនម្នាក់ៗ។
តែពួកអ្នកកាន់សាសនាអ៊ីស្លាមរ៉ូហ៊ីនយ៉ាមិនត្រូវបានគេអនុញ្ញាតឲ្យបញ្ជាក់ពីជាតិពិន្ធុដើមរបស់ខ្លួនទេ។ តាមពិតទៅនៅភូមា ពួករ៉ូហ៊ីនយ៉ាមិនត្រូវបានគេចាត់ទុកជាជនជាតិភាគតិចភូមាទេ តែជាជនអន្តោប្រវេសន៍ខុសច្បាប់មកពីប្រទេសបង់ក្លាដែស នោះបើទោះបីជាភាគច្រើនបានរស់នៅក្នុងទឹកដីភូមាអស់ជាច្រើនជំនាន់មកហើយក្តី។ ដោយឡែក លទ្ធផលនៃការធ្វើជំរឿនលើកនេះមិនបានរាប់បញ្ចូលមនុស្សប្រមាណជា ១លាន ២សែននាក់ដែលកំពុងរស់នៅក្នុងរដ្ឋរ៉ាក់ឃីន កាឈិន និងរដ្ឋការ៉ែនទេ ព្រោះសុទ្ធជារដ្ឋដែលកំពុងមានជម្លោះ។ កាលពីឆ្នំា ២០១២ អំពើហិង្សារវាងសហគមន៍អ្នកកាន់សាសនាព្រះពុទ្ធ និងអ៊ីស្លាមក្នុងរដ្ឋរ៉ាក់ឃីនបានបណ្តាលឲ្យមានមនុស្សស្លាប់រាប់សិបនាក់ និងអ្នករត់ភៀសខ្លួនប្រមាណជា ១៤០ ០០០នាក់ ពិសេសពួករ៉ូហ៊ីនយ៉ា។
គួររម្លឹកជូនថា នេះជាលើកទី១ បង្អស់ក្នុងរយៈពេល ៣ទសវត្សចុងក្រោយដែលភូមាបានធ្វើជំរឿនប្រជាជនខ្លួន។ ជំរឿនចុងក្រោយបានធ្វើឡើងកាលពីឆ្នំា ១៩៨៣ ក្នុងអំណាចយោធា។ គឺដោយផ្អែកលើលទ្ធផលកាលពីឆ្នំា ១៩៨៣ នោះឯងដែលគេប្រមើលមើលថា ចំនួនប្រជាជននឹងអាចមាន ៦០លាននាក់។ តែជាក់ស្តែងមានតែជាង ៥០លាននាក់ប៉ុណ្ណោះ ពោលគឺមាន ៩លាននាក់តិចជាងការគ្រោងទុក។ លោកស្រីរដ្ឋមន្រ្តីអន្តោប្រវេសន៍ឃិន យីបានបញ្ជាក់ថា ការថយចុះនៃកំណើតទារកអាចជាមូលហេតុមួយនៃការធ្លាក់ចុះចំនួនប្រជាជនដែលបានគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ