ក្រៅពីទៅវត្ត ពលរដ្ឋខ្មែរ ទៅកំសាន្តក្នុងស្រុក និងខ្លះទៀត ចេញទៅក្រៅប្រទេស
ក្នុងពេលបុណ្យភ្ជុំបិណ្ឌ ប្រជាពលរដ្ឋខ្មែរបានយកចង្ហាន់ទៅវត្ត ប្រគេនព្រះសង្ឃ ឧទ្ទិសកុសល ជូនដល់វិញ្ញាណក្ខន្ធបុព្វការីជន ជីដូនជីតា មាតាបិតា និងញាតិសន្តាន ដែលបានចែកឋាន។ ទន្ទឹមនឹងបុណ្យភ្ជុំបិណ្ឌ ដែលជាថ្ងៃឈប់សម្រាក ពលរដ្ឋខ្មែរក៏បានទៅកំសាន្ត តាមតំបន់រមណីយដ្ឋានសំខាន់ៗ ដូចជា នៅតំបន់សមុទ្រ និងនៅតំបន់ព្រៃភ្នំ ជាដើម។ ទន្ទឹមនឹងនោះ ពលរដ្ឋខ្មែរមួយចំនួនទៀត ក៏បានចេញទៅដើរលេងនៅក្រៅប្រទេសផងដែរ។ នៅតំបន់ទេសចរណ៍ ក្នុងស្រុក តម្លៃសេវាដឹកជញ្ជូន ម្ហូបអាហារ និងការស្នាក់នៅ បន្តឡើងថ្លៃទ្វេដង។ នេះបើតាមលោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ដោយសារតែបុណ្យភ្ជុំបិណ្ឌ រយៈពេលបីថ្ងៃ ហើយបូកនឹងថ្ងៃសៅរ៍អាទិត្យទៀតនោះ គឺជាថ្ងៃឈប់សម្រាក នាំឲ្យប្រជាពលរដ្ឋខ្មែរ បានធ្វើដំណើរទៅវត្ត និងទៅស្រុកកំណើតរៀងៗខ្លួន។ លោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា បានកត់សម្គាល់ថា ពលរដ្ឋខ្មែរ ក្រៅពីទៅវត្ត និងទៅស្រុកកំណើតជួបជុំក្រុមគ្រួសារ និងមិត្តភ័ក្ត ក្នុងឱកាសបុណ្យភ្ជុំបិណ្ឌនេះ ប្រជាពលរដ្ឋខ្មែរ ក៏បានចំណាយពេលដើរកំសាន្ត តាមតំបន់ទេសចរណ៍ក្នុងស្រុក ដូចជា នៅតំបន់ឆ្នេរសមុទ្រ ក្នុងខេត្តកោះកុង ខេត្តព្រះសីហនុ កែប និងខេត្តកំពត។ ចំណែកភ្នំបូកគោ ក្នុងខេត្តកំពត ក៏អ្នកទេសចរក្នុងស្រុក មិនរំលង សម្រាប់ពិធីបុណ្យទាននេះទេ។
ក្រៅពីនោះ លោកអាងគឹមអៀង បានកត់សម្គាល់ថា នៅតំបន់ទេសចរណ៍ នៅភាគឥសាន ដូចជា ខេត្តរតនគិរី មណ្ឌលគិរី និងខេត្តស្ទឹងត្រែង ជាដើម ដោយសារតែផ្លូវលំបាកធ្វើដំណើរ ដូច្នេះនៅពេលបុណ្យភ្ជុំបិណ្ឌនេះ អាចមានអ្នកទេសចរតិចទៅលេង។ ប៉ុន្តែផ្នែកខាងកំពង់ធំ ព្រះវិហារ ឧត្តរមានជ័យ និងខេត្តសៀមរាប មានផ្លូវចាក់កៅស៊ូ ទើបនឹងធ្វើហើយ ដូច្នេះ មានអ្នកទៅលេងច្រើន។
យ៉ាងណាក៏ដោយ ការធ្វើដំណើរ និងការទៅកំសាន្តពេលបុណ្យភ្ជុំបិណ្ឌ សេវាដឹកជញ្ជូន ឡានតាក់ស៊ី បានឡើងស្ទើរទ្វេដង។ រីឯភោជនីយដ្ឋាន សណ្ឋាគារ និងផ្ទះសំណាក់ ក៏បានឡើងថ្លៃ មិនស្តាប់សេចក្តីអំពាវនាវរបស់អាជ្ញាធរទេ។
តំណាងក្រុមហ៊ុនភ្នាក់ងារទេសចរណ៍ លោក អាង គឹមអៀង បានគូសបញ្ជាក់ថា អាជ្ញាធរ គួរតែរឹតបន្តឹង ហើយម្ចាស់អាជីវកម្ម ត្រូវតែប្រកាន់នូវធម៌ព្រះពុទ្ធ កុំយកចំណេញហួសហេតុ ក្នុងឱកាសបុណ្យទាន។
ក្រៅពីអ្នកចេញពីផ្ទះក្នុងឱកាសបុណ្យភ្ជុំបិណ្ឌ លោក អាង គឹមអៀង ក៏បានកត់សម្គាល់ថា ក្នុងពេលបុណ្យភ្ជុំបិណ្ឌនេះ ក៏មានអ្នកចេញទៅលេងនៅក្រៅប្រទេស ដូចឆ្នាំមុនៗដែរ។ បណ្តាប្រទេសសមាជិកអាស៊ាន ដូចជា ម៉ាឡេស៊ី សឹង្ហបុរី ប្រទេសចិន ហុងកុង ម៉ាកាវ និងកូរ៉េ ជាដើម នៅតែជាគោលដៅទេសចរណ៍របស់ពលរដ្ឋខ្មែរ។ តំបន់គោលដៅទេសចរណ៍ទាំងនោះ បានភ្ជាប់ជើងហោះហើរត្រង់ មកកាន់កម្ពុជា។
ដោយឡែកនៅប្រទេសជិតខាង ពិសេសប្រទេសថៃ ត្រូវបានលោក អាង គឹមអៀង លើកឡើងថា អ្នកទេសចរកម្ពុជា ហាក់ថយចុះនូវចំនួនអ្នកទៅលេង ក្នុងពេលបុណ្យភ្ជុំបិណ្ឌនេះ ដោយសារស្ថានការណ៍នយោបាយថៃ និងការប្តូររដ្ឋាភិបាល។
យ៉ាងណាក៏ដោយ ពលរដ្ឋខ្មែរ ចេញទៅក្រៅប្រទេស ពេលបុណ្យទានធំៗនេះ ត្រូវបានលោក អាង គឹមអៀង គូសបញ្ជាក់ថា អ្នកទៅក្នុងបំណងទេសចរ ច្រើនជាងទៅពិនិត្យជំងឺ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ