ចិនចាប់មេធាវីការពារសិទ្ធមនុស្សម្នាក់ទៀតពីបទធ្វើសកម្មភាពប្រឆាំងរដ្ឋាភិបាល
ភរិយារបស់លោកមេធាវី តាំង ជីងលីង បានសរសេរនៅលើទំព័របណ្តាញសង្គមរបស់គាត់ថា ប្តីគាត់ត្រូវបានអាជ្ញាធរចិនចាប់ខ្លួន ដោយចោទថាបានធ្វើសកម្មភាពប្រឆាំងនឹងរដ្ឋាភិបាលក្រុងប៉េកាំង។ លោកមេធាវី តាំង ជីងលីង ត្រូវបានគេស្គាល់ថាជាសកម្មជនសិទ្ធមនុស្សដ៏សកម្មម្នាក់ ដែលបានជួយការពារជនរងគ្រោះដោយការរំលោភបំពានកម្មសិទ្ធដីធ្លី និងការរំលោភសិទ្ធមនុស្សទូទៅនៅចិន។
ចុះផ្សាយនៅថ្ងៃ៖
ស្តាប់ - ០២:៣៣
លោកមេធាវីតាំង ជីងលីង ដែលជាមេធាវីការពារសិទ្ធមនុស្សនៅក្រុង ហ្គ័ងចូវប្រទេសចិន ត្រូវបានអាជ្ញាធរចាប់ខ្លួន កាលពី ខែឧសភា ទន្ទឹមពេលជាមួយនឹងការចាប់ខ្លួនសកម្មជនសិទ្ធមនុស្ស និងបញ្ញវន្តជាច្រើនរូបទៀតដែរ។ ការចាប់ខ្លួននេះ គឺធ្វើឡើងនៅមុនពេលដល់ថ្ងៃខួបនៃការបង្រ្កាបការបះបោរ នៅទីលានធានអានមិន កាលពីថ្ងៃទី ៤ ខែឧសភា ឆ្នាំ១៩៨៩។អាជ្ញាធរចិនបានចាប់ខ្លួនពួកគេ ក្នុងគោលបំណងបំបិតមាត់ហើយបញ្ជៀសមិនឲ្យពួកគេ ធ្វើសកម្មភាពណាមួយរំលឹកដល់ព្រឹត្តិការណ៍កាលពីឆ្នាំ១៩៨៩។
ចាប់តាំងពីការឡើងកាន់អំណាចរបស់ប្រធានាធិបតីចិនថ្មី គឺលោក ស៊ី ជីនពីង មតិសាធារណៈទូទៅបានមើលឃើញការកើនឡើងកាន់តែខ្លាំងទៅៗ នូវការរឹតបន្តឹង និង បង្ក្រាបទៅលើបុគ្គលដែលហ៊ានប្រឆាំង និងបរិហារការដឹកនាំរបស់របបកុម្មុយនីស្តចិន។ កន្លងមក អាជ្ញាធរ ធ្លាប់ចោទសកម្មជនទាំងនោះ ត្រឹមបទបង្កអសន្តិសុខសង្គម រឺញុះញង់ឲ្យមានអំពើហិង្សាតែប៉ុណ្ណោះ។ ប៉ុន្តែលើកនេះ ករណីលោកមេធាវី តាំង ជីងលីង ត្រូវបានអាជ្ញាធរចិន ឈានទៅដល់ចោទថាបានធ្វើសកម្មភាពប្រឆាំងនឹងរបបគ្រប់គ្រង។ យោងតាមសម្តីរបស់មេធាវីចិនម្នាក់ លោកថាការផ្លាស់ប្តូបទចោទប្រកាន់ ពីបទបង្កអសន្តិសុខសង្គម ដែលជាបទព្រហ្មទណ្ឌទូទៅ មកជាបទល្មើសធ្វើសកម្មភាពប្រឆាំងរដ្ឋាភិបាល ដែលជាការចោទប្រកាន់បែបនយោបាយ គឺមានន័យថាស្ថានភាពកាន់តែធ្ងន់ធ្ងរទៅ ហើយស្ថានទម្ងន់ទោសក៏កាន់តែធ្ងន់ធ្ងរដែរ។
គួររំលឹកផងដែរថា ចាប់តាំងពីដើមឆ្នាំ២០១៤នេះ រដ្ឋអំណាចក្រុងប៉េកាំងបានធ្វើការចាប់ខ្លួនសកម្មជនយោបាយការពារសិទ្ធមនុស្សជាច្រើននាក់។ តួយ៉ាងថ្មីៗនេះមានមេធាវីនិងសកម្មជន២នាក់ទៀត ត្រូវបានតុលាការចិនផ្តន្ទាទោសឲ្យជាប់គុក៦ឆ្នាំកន្លះ ដោយគ្រាន់តែពួកគេធ្វើសកម្មភាពទាមទារឲ្យមានតម្លាភាពក្នុងការកាត់បន្ថយអំពើពុករលួយ។ មេធាវីការពារសិទ្ធមនុស្សដ៏ល្បីម្នាក់ទៀតឈ្មោះ ពូ ជីឈាំង ក៏ត្រូវបានតុលាការកាត់ទោសដែរ ពីបទបង្កចលាចល និងលួចផ្សព្វផ្សាយព៌តមានឯកជនដោយខុសច្បាប់។ ដូចគ្នាដែរ លោក លីវ ស៊ាវបូ ដែលបានទទួលពានរង្វាន់ណូបែលសន្តិភាព កាលពីឆ្នាំ២០១០ ក៏ត្រូវបានតុលាការកំពូលចិនផ្តន្ទាទោស១១ឆ្នាំផងដែរ ពីបទធ្វើសកម្មភាពប្រឆាំងនឹងរដ្ឋាភិបាល។
ករណីនៃការចាប់ខ្លួនទាំងនេះ ធ្វើឡើងក្នុងគោលបំណង គ្មានអ្វីក្រៅពីការចង់បំបិទសម្លេងប្រឆាំងរិះគន់ របស់បណ្តាសកម្មជនទាំងនោះ ហើយជាការព្រមានដល់បណ្តាអ្នកប្រឆាំងផ្សេងៗទៀត ថាទ្វាគុកបើកចំហរចាំជានិច្ចប្រសិនបើពួកគេ ហ៊ានរិះគន់ការដឹកនាំរបស់គណបក្សកុម្មុយនីស្តចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ